Бүген Россия Президенты Дмитрий Медведев илебезнең танылган гражданнарына дәүләт бүләкләре бирде. Бүләкләнүчеләр арасында – Татарстан Республикасы Премьер-министрының беренче урынбасары Равил Моратов. Ул IV дәрәҗә “Ватан алдындагы хезмәтләре өчен” ордены белән бүләкләнде.
Шуны искәртик: бүләкләү турындагы Указга 2009 елның 11 нче октябрендә кул куелган (Россия Федерациясе Президентының 2009 ел, 11 нче октябрь, 1144 нче номерлы Указы).

2009 елның 18 нче – 20 нче ноябрендә Казанда Бөтендөнья сыйфат көне һәм Европа сыйфат атналыгына багышланган “Иң яхшы тәҗрибә - иң яхшы тормыш өчен!” Бөтенроссия сыйфат форумы узачак. Бүген форумны оештыру комитеты утырышында бу турыда Татарстан Республикасы Премьер-министрының беренче урынбасары Борис Павлов хәбәр итте.
Утырышта Бөтенроссия сыйфат оешмасы президенты Геннадий Воронин, Татарстан Республикасы сәнәгать һәм сәүдә министрының беренче урынбасары Владимир Соловьев катнашты.

28 нче октябрьдән 1 нче ноябрьгә кадәр Татарстан Республикасы Премьер-министрының беренче урынбасары Борис Павлов җитәкчелегендәге делегация Түбән Новгородта узган “Бердәм Россия” XIV халыкара фәнни-сәнәгый форумында катнашты.
Татарстан делегациясе составына Татарстан Республикасының сәнәгать һәм сәүдә министры Равил Зарипов, Татарстан Республикасы икътисад министрының урынбасары Наил Гобәев, Татарстан Республикасы мәгариф һәм фән министрының урынбасары Вадим Хоменко, “Татарстан Республикасының Инвестиция-венчур фонды” коммерцияле булмаган дәүләт оешмасы директорының урынбасары Руслан Габидуллин, А.Н.Туполев исемендәге КДТУ проректоры Сергей Михайлов, республикабыздагы предприятие һәм оешмалар белгечләре катнашты.

“Финанс кризисы шартларында кече һәм урта эшмәкәрлекне үстерү” Форумы кысаларында “Үсеш һәм тышкы икътисади эшчәнлек банкы” (Внешэкономбанк), KfW IPEX-Bank GmbH (KfW) алман банклар төркеме һәм Татарстан Республикасы Хөкүмәте үзара аңлашу турындагы Меморандумга кул куйды.

Халыкара хоккей федерациясе рәисе Леонардо Негре фикеренчә, Россиядә Татарстанның чирәмдәге хоккейны үстерү өлкәсендәге эш үрнәгенә тиңнәр юк. Ул бу турыда “Россия – спорт державасы” Бөтенроссия халыкара спорт форумы кысаларында Татарстан Премьер-министрының беренче урынбасары Борис Павлов белән оештырылган очрашуда әйтте.
Форум 22 нче – 24 нче октябрьдә Казанда узды.

2012 елда яшьләр арасында җиңел атлетика буенча дөнья чемпионаты Казанда үткәрелергә мөмкин. Бүген Татарстан Республикасы Министрлар Кабинетында узган традицион брифингта бу турыда Татарстан Республикасының яшьләр эшләре, спорт һәм туристлык министры Марат Бариев әйтте.
Марат Бариев сүзләренә караганда, бу мәсьәлә хакында “Россия – спорт державасы” I спорт форумы кысаларында (22 нче – 24 нче октябрьдә Казанда узды) фикер алышканнар.

Бүген Татарстан Республикасы Премьер-министры Татарстан Республикасының Хөкүмәт йортында Красноярск крае губернаторының беренче урынбасары - Красноярск краеның хөкүмәт рәисе Әдхәм Акбулатов белән очрашты.
Очрашуда Татарстан Республикасы Министрлар Кабинеты аппараты җитәкчесе Шамил Гаффаров, Татарстан Республикасының төзелеш, архитектура һәм торак-коммуналь хуҗалык министры Марат Хөснуллин катнашты.

Бүген Татарстан Республикасы Премьер-министры Рөстәм Миңнеханов “Россия – спорт державасы” исемле спорт форумының йомгаклау пленар утырышында катнашты. Шуны искәртик: беренче Бөтенроссия спорт форумы 22 нче – 25 нче октябрьдә Казанда (“Корстон” мәдәни-күңел ачу комплексы) уза.
Утырышны Россия Хөкүмәте вице-премьеры Александр Жуков ачып җибәрде. Ул Казанда форумның иң югары дәрәҗәдә оештырылуын һәм үткәрелүен билгеләп үтте. “Форум Россиянең спорт хәрәкәтендә сизелерлек этап булды”, - диде ул.
Россиянең спорт, туристлык һәм яшьләр сәясәте министры Виталий Мутко Россиядә спорт форумының ел саен үткәрелә торган традицион вакыйгага әвереләчәген әйтте. Ул шулай ук бүгенге форумда Россия Президенты Дмитрий Медведев катнашу сәбәпле, анда карала торган бөтен мәсьәләләрне дә тормышка ашыру мөмкинлеге булуын билгеләп үтте.
Форумда катнашучылар алдында чыгыш ясап, Татарстан Премьер-министры Рөстәм Миңнеханов, үз чиратында, форумның Россиядә яңа вакыйга булуын әйтте. Аның сүзләренчә, Россия Президенты Указы (“Россия – спорт державасы” форумын үткәрү турында) барыбызның да спортка мөнәсәбәтен үзгәрткән, хакимият һәм бизнес бу мәсьәләләргә - физик культура үсешенә, профессиональ спортка – башкача карый башлаган.

Бүген Казанда Татарстан Республикасы Премьер-министры – “Татнефть” ААҖ нең Директорлар советы рәисе Рөстәм Миңнеханов компаниянең чираттагы Директорлар советы утырышын үткәрде.
Анда “Татнефть” ААҖ нең тугыз айда бюджетны үтәү нәтиҗәләре каралды һәм агымдагы елның ноябренә бюджет расланды.

Казанда 2013 ел Универсиадасына спорт объектларын төзү мондый темплар белән барса, спорт бәйрәмен үткәрүгә бер ел кала шәһәр аңа 100 процент әзер булачак. Бу турыда журналистларга Россия Федерациясенең Исәп-хисап палатасы рәисе Сергей Степашин әйтте. Ул Татарстан башкаласына “Россия – спорт державасы” Бөтенроссия спорт форумында катнашу өчен килгән.