Бүген Татарстан Республикасы Президенты Рөстәм Миңнеханов Казахстан Республикасының Казан шәһәрендәге Генераль консулы Әсхәт Нускабай белән очрашты. 

Очрашу Татарстан Республикасы Хөкүмәте Йортында узды, анда шулай ук Татарстан Республикасы Президентының халыкара мәсьәләләр буенча киңәшчесе Радик Гыйматдинов, Татарстан Республикасы Президенты Аппараты Җитәкчесе Әсгать Сәфәров, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов катнашты.

А.Н.Туполев исемендәге халыкара премияне бүген Татарстан Республикасы Премьер-министры Алексей Песошин техник фәннәр докторы, профессор, РФАнең мөхбир әгъзасы Александр Иноземцевка тапшырды.

Премия инженерлык фәннәре өлкәсендә атаклы өлеш керткәне өчен бирелгән.

Бу премияне тапшыру ТР Хөкүмәте йортында Алексей Песошинның эш кабинетында узды.

Бүген Казанда Тораны өйрәнү буенча илдә беренче төбәк үзәге ачылды (Профсоюз ур., 15). Тантанада Татарстан Республикасы Президенты Рөстәм Миңнеханов, Россиянең баш раввины Берл Лазар, Казанның һәм Татарстанның баш раввины Ицхак Горелик, России Еврей общиналары федерациясе президенты Александр Борода һәм башкалар катнашты. 

Казанда бүген Россия Эчке эшләр министрлыгы Казан идарәсенең “Сафиуллин” 9нчы полиция бүлегенең яңа бинасы ачылды. Анда Татарстан Республикасы Президенты Рөстәм Миңнеханов һәм Татарстан Республикасы буенча эчке эшләр министры Артем Хохорин катнашты.

Рөстәм Миңнеханов полиция бүлеге җитәкчесе полиция полковнигы Алексей Ершовка ТР “Фидакарь хезмәте өчен” медален һәм «Форд Фокус» яңа эш автомобиле ачкычын тапшырды.

Татарстан Республикасында бер татар теле укытучысы да эштән азат ителмәячәк, ә рус теле укытучылары саны арттырылачак дигән карар кабул ителде. Бүген бу хакта Татарстан Республикасы Президенты Рөстәм Миңнеханов Татарстан Республикасы Дәүләт Советының утыз өченче утырышында хәбәр итте.

Искәртәбез, парламентарийлар бүген Татарстан Республикасы Дәүләт Советының аерым карарларына үзгәрешләр кертү турында һәм Татарстан Республикасы дәүләт телләрен һәм Татарстан Республикасында яшәүче халыкларның туган телләрен укыту һәм өйрәнү турында фикер алыштылар.   

Бүген Татарстан Республикасы Хөкүмәте Йортында Бөтендөнья банкы эксперты Флорентин Бланк «Контроль-күзәтү эшчәнлеге нәтиҗәлелеген арттыру һәм, икътисадый үсешкә ярдәм коралы буларак, аның потенциалын гамәлгә ашыру» темасына лекция укыды.   

Лекцияне Татарстан Республикасы Президенты Рөстәм Миңнеханов, Татарстан Республикасы Премьер-министры Алексей Песошин, Татарстан Республикасы Президенты Аппараты Җитәкчесе Әсгать Сәфәров, Бөтендөнья банкының Россия Федерациясендәге директоры һәм даими вәкиле Андраш Хорваи, республика министрлыклары һәм ведомстволары җитәкчеләре тыңладылар.

Бүген Татарстан Республикасы Дәүләт Советы бинасында парламентның утыз өченче сессиясе дәвам итә.   

Искәртәбез, 2017 елның 26 октябрендә утыз өченче сессия эшендә тәнәфес игълан ителгән иде. Көн тәртибендә дүрт мәсьәлә калды – Татарстан Республикасы законнары торышы турында нотык, Законлылык һәм хокук тәртибе комитеты эше турында хисап, Татарстан Республикасы Дәүләт Советының аерым карарларына үзгәрешләр кертү турында һәм Татарстан Республикасы дәүләт телләрен һәм Татарстан Республикасында яшәүче халыкларның туган телләрен укыту һәм өйрәнү турында.   

Бүген Татарстан Республикасы Президенты Рөстәм Миңнеханов Бөтендөнья банкының Россия Федерациясендәге директоры һәм даими вәкиле Андраш Хорваи белән очрашты.

Очрашу Татарстан Республикасы Хөкүмәте Йортында узды. Анда шулай ук Татарстан Республикасы Президенты ярдәмчесе Альберт Нәфыйгин, Эшкуарлар хокукларын яклау буенча Татарстан Республикасы Президенты каршындагы вәкаләтле вәкил Тимур Нагуманов, Бөтендөнья банкы экспертлары һәм белгечләре катнашты.

“Халык контроле” системасына 2017 елның 10 аенда 43,5 меңнән артык гариза килгән, бу 2016 елның шушы чорына караганда 14%ка күбрәк. Шул ук вакытта хәл ителгән гаризаларның өлеше дә югары – 75%. Бу хакта бүген Татарстан Республикасы Министрлар Кабинетында узган брифингта Татарстан Республикасында Кеше хокуклары буенча вәкил Сәрия Сабурская хәбәр итте.

Брифингта “Халык контроле” системасының  2017 елның 10 аендагы эшчәнлегенә нәтиҗә ясадылар.

Бүген Татарстан Республикасы Президенты Рөстәм Миңнеханов "ГМС төркеме" ҖЧҖ генераль директоры Артем Молчанов белән  көннең икенче яртысында очрашты. 

Чара ТР Хөкүмәте Йортында узды. 

Рөстәм Миңнеханов һәм Артем Молчанов багланышлар мөмкинлекләре юнәлешләре турында, шул исәптән сәнәгать юнәлеше турында сөйләштеләр.