Бүген Татарстан Президенты Рөстәм Миңнеханов “Чистай” индустриаль паркының төзелеш мәйданчыгында булды. Парк төзелеше белән шулай ук ТР Премьер-министры вазифаларын башкаручы Равил Моратов, икътисад министры Мидхәт Шаһиәхмәтов һәм башка рәсми затлар танышты.

“Радиоприбор” җәмгыяте 70 еллык юбилеен билгеләп үтә. Әлеге бәйрәм уңаеннан бүген предприятиедә ТР Президенты Рөстәм Миңнеханов булды. Бирегә шулай ук “Ростехнологии” Дәүләт корпорациясе генераль директорының беренче урынбасары Алексей Алешин, “Радиоэлектронные технологии” концерны генераль директоры Николай Колесов һ.б. килгән иде.Биредә республика башлыгын предприятиенең финанс күрсәткечләре белән таныштырдылар.

Бүген “Ашан” гипермаркетлар челтәренең Казандагы тәүге кибете ишекләрен ачты. Аның ачылышы ТР Президенты Рөстәм Миңнеханов катнашында узды. Чарада шулай ук Премьер-министр урынбасары-авыл хуҗалыгы һәм азык-төлек министры Марат Әхмәтов, Казан мэры Илсур Метшин, “Ашан”ның Россиядәге президенты Франсуа Коломбье, “Ашан Россия” генераль директоры Жан-Пьер Жермен, “Ашан Казан” гипермаркеты директоры Ришар Деннелен һ.б. катнашты.

Газ инфраструктурасы объектларының имин эшчәнлеге өчен “Газпром трансгаз Казан” ҖЧҖ һәм торак-коммуналь хуҗалыгы предприятиеләре генә түгел, республика җитәкчелеге, муниципаль хакимият органнары да җавап бирергә тиеш. Бүген Татарстан Президенты Рөстәм Миңнеханов ТР Хөкүмәте йортында узган газ инфраструктурасының имин эшчәнлеге мәсьәләләренә багышланган киңәшмәдә катнашучыларга әнә шул хакта искәртте.

2018 елгы футбол буенча дөнья чемпионатына әзерлек чорында планлаштырылган зур спорт чаралары чемпионатны оештыру өчен Казанның гаять зур өстенлеге булып тора. Бүген “Россия-2018 оештыру комитеты” коммерцияле булмаган автоном оешмасы генераль директоры Алексей Сорокин Казанда 2018 елда футбол буенча дөнья чемпионатын үткәрүгә әзерлек буенча төбәк оештыру комитеты утырышы төгәлләнгәннән соң журналистларга биргән интервьюсында әнә шулай дип белдерде.

Бүген кешелек дөньясына белем өләшүчеләр – укытучылар һөнәри бәйрәмнәрен билгеләп үтә. Шул уңайдан “Корстон”да республика мөгаллимнәрен хөрмәтләделәр. Авыр, ләкин мактаулы һөнәр ияләрен котларга ТР Президенты Рөстәм Миңнеханов, Дәүләт Советы рәисе Фәрит Мөхәммәтшин, Казан мэры Илсур Метшин, Мәгариф һәм министры Альберт Гыйльметдинов, РФ Иҗтимагый палатасы әгъзасы Тина Канделаки килгән иде.

Татарстан Республикасы үсеш, кече һәм урта бизнес проектларына ярдәм күрсәтү өлкәсендә Финляндия тәҗрибәсен өйрәнде. Хәзерге вакытта, Финляндия белгечләре катнашында, бу эш тагын да системалырак төс алды. Бүген Татарстан Республикасы Президенты Рөстәм Миңнеханов Финляндиянең әйләнә-тирә мохит министры урынбасары Ханнеле Покка белән очрашуда әнә шулай дип белдерде.

Бүген ТР Хөкүмәте йортында Лахти шәһәре Инновация-технология үзәге белән Казандагы “Идея” технопаркы арасында хезмәттәшлек Меморандумына кул куелды.

“Австралиядә яшәүче милләттәшләребез белән очрашу Татарстан делегациясендә ике төрле хис калдырды. Аларның барысы да саф татар әдәби телендә сөйләшә, гореф-гадәтләребезне саклый, татар телендә җырлый, бии, Габдулла Тукай, Гаяз Исхакый, Муса Җәлил кебек әдипләребез әсәрләрен өйрәнә, милли бәйрәмнәрне билгеләп үтәләр. Болар бездә зур соклану уятты. Икенче яктан, Татарстандагы татар яшьләрен күз алдына китергәндә, моңсурак та. Аларның да Австралиядәге милләттәшләребездән калышмыйча камил дәрәҗәдә татар телендә сөйләшүенә ирешергә иде”. Президент Рөстәм Миңнеханов җитәкчелегендәге Татарстан рәсми делегациясенең Австралиягә рәсми сәфәре кысаларында Аделаидада милләттәшләребез белән булган очрашуын делегация әгъзасы, ТР Президентының Тышкы элемтәләр департаменты директоры-ТР Президенты ярдәмчесе Искәндәр Мөфлиханов әнә шулай шәрехләде. Бүген ТР Хөкүмәт йортында үткән брифинг Татарстан рәсми делегациясенең узган атнада Сингапур һәм Австралиягә визиты йомгакларына багышланган иде.

Узган 9 ай нәтиҗәләренә караганда, ТР нефть, газ, химия комплексы предприятиеләренең кайберләрендә табышның кимүе күзәтелә. Табышның сизелерлек өлешен чимал һәм материалларга бәяләр арту “йота бара икән. Бу хакта бүген “Татнефтехиминвест-холдинг” җәмгыятенең ТР Президенты Рөстәм Миңнеханов рәислегендә узган Директорлар Советы утырышында хәбәр ителде. ТР нефть, газ, химия комплексы предприятиеләренең 9 айдагы эшчәнлегенең якынча нәтиҗәләре аның көн тәртибенә чыгарылган төп мәсьәләләрнең берсе иде.