Татарстанның Johnson&Johnson компаниясе белән медицина өлкәсендә озак хезмәттәшлек итүнең уңай тәҗрибәсе бар һәм ул киләчәктә хезмәттәшлек үсешенә өметләнә. Бу хакта бүген Татарстан Премьер-министры Илдар Халиков компания делегациясе белән очрашу барышында белдерде. Очрашуда шулай ук ТР сәламәтлек саклау министры Гадел Вафин, ТР Икътисад министры Артем Здунов, Татарстанның Инвестицион үсеш агентлыгы җитәкчесе Талия Миңнуллина катнашты.

Бүген ТР Дәүләт Советының бюджет, салымнар һәм финанслар комитеты утырышында парламент депутатлары, министрлык һәм ведомство вәкилләре “2015 елга һәм 2016-2017 елларның планлы чорына Татарстан Республикасы бюджеты турында” закон проектына төзәтмәләр кертү хакында фикер алыштылар. Аны комитет рәисе Леонид Якунин алып барды. Утырышта ТР Премьер-министры Илдар Халиков һәм ТР Дәүләт Советы рәисе урынбасары Юрий Камалтынов катнашты.

Бүген Татарстан Республикасы Президенты Рөстәм Миңнеханов Төрекмәнстан Икътисад һәм үсеш министры Вепа Абделхәкимов җитәкчелегендәге делегациясе белән очрашты. Очрашу Татарстан Республикасы Президентының Казан кремлендәге резиденциясендә узды. Исегезгә төшерәбез, Төрекмәнстанның әлеге вәкиллекле делегациясе Татарстанга сәүдә-икътисадый, фәнни-техник һәм мәдәни хезмәттәшлеге буенча Төрекмәнстан-Татарстан уртак эш төркеменең икенче утырышында катнашу өчен килде.

Күп фатирлы торак йортларны капиталь ремонтлау программасы – Россия Федерациясе җитәкчелеге булдырган программаларның иң нәтиҗәлеләренең берсе. Мондый фикерне бүген Мәскәүдә “Россия бүген” ХМАнда “Күп фатирлы торак йортларны капиталь ремонтлау” темасына узган матбугат конференциясендә Татарстан Республикасы Президенты Рөстәм Миңнеханов белдерде. Чарада шулай ук РФ төзелеш һәм ТКХ министры урынбасары Андрей Чибис, РФ Дәүләт Думасының төзелеш сәясәте һәм ТКХ буенча комитеты рәисе Галина Хованская, Татарстан Республикасы төзелеш, архитектура һәм ТКХ министры Ирек Фәйзуллин катнаштылар.

Бүген “Казан” халыкара аэропортына Перу Республикасы Президенты Ольянто Умала самолеты килде. Кунакны гадәттәгечә милли икмәк һәм чәк-чәк белән каршы алдылар. Очрашуда Татарстан Премьер-министры Илдар Халиков, ТР сәнәгать һәм сәүдә министрының беренче урынбасары Руслан Кәбиров, Россия Тышкы эшләр министрлыгының Казандагы вәкиле Радик Вахитов катнашты.

Бүген, 12 ноябрь көнне ТР Дәүләт Советы Рәисе Фәрит Мөхәммәтшин Татарстанның иң өлкән ял йортларыннан саналган «Ижминводы» шифаханәсе хезмәткәрләрен учреждениенең 90 яшьлек юбилее белән тәбрикләде.

Бүген “Бөтенроссия җирле үзидарә советы” ҖЧҖ Гомумроссия иҗтимагый оешмасы Татарстан төбәк бүлегенең хисап-сайлау конференциясе узды. Анда катнашучыларны Татарстан Республикасы Дәүләт Советы Рәисе Фәрит Мөхәммәтшин сәламләде.

Киләсе ел Татарстанда парклар һәм скверлар елы итеп игълан ителде. Шул уңайдан, башкаланың зооботаника бакчасы да зур үзгәрешләр кичерәчәк. ТР Президенты Рөстәм Миңнеханов Указы нигезендә, “Татинвестгражданпроект” институты объектны төзекләндерү буенча проект эскизы төзегән. Әлеге оешманың директоры Гадел Хөснетдинов бүген ТР Хөкүмәтендә узган брифингта хәбәр иткәнчә, “түгәрәк өстәл”ләр оештырып, проектны өйрәнәчәкләр, тикшерәчәкләр һәм бер ай эчендә ул расланырга тиеш. Зооботаника бакчасын төзекләндерү эшләре исә киләсе ел башына планлаштырыла.