Татарстанда яңа уку елына 2,5 мең укучыга портфель бүләк ителде

23-31 августта Татарстанда “Мәктәпкә җыенырга ярдәм ит” республика хәйрия акциясенең төп чаралары узачак. Бүген акция кысаларында 1,5 мең - I сыйныф укучысы һәм 1 мең II-XI сыйныф укучысы бүләккә портфель алды. Бу хакта бүген Министрлар Кабинетында узган брифингта ТР Президенты ярдәмчесе Ләйлә Фазлыева хәбәр итте.

“Акция республикада 2007 елдан башлап үткәрелә. Шул вакыт эчендә 165 мең I сыйныф укучысы мәктәп букчасы алды. 210 млн сум күләмендә акча җыелган. Акция кысаларында уку-язу кирәк-яраклары тутырылган букча тапшырыла. Аларны күп балалы һәм аз керемле гаиләләргә бүләк ителә”, - дип искә алды ул.

Быел Татарстанда I сыйныфка 47 мең бала бара. 20 мең чамасы укучы яңа уку елында “Мәктәпкә җыенырга ярдәм ит!” акциясе кысаларында иганәчеләр ярдәмен алачак. Алар – быел гына I сыйныфка баручылар, шулай ук ярдәмгә мохтаҗ II-XI сыйныф укучылары.

“Мәктәпкә җыенырга ярдәм ит!” акциясе кысаларында Татарстанда быел беренче тапкыр сәламәтлек мөмкинлекләре чикләнгән балаларга аерым игътибар биреләчәк.

18-24сентябрьдә уку-укыту семинарлары узачак. Алар “Мәктәпкә җыенырга ярдәм ит!” республика хәйрия акциясенең дәвамы булачак.

Педагоглар һәм медицина хезмәткәрләре өчен семинарлар уздыруга акча республика бюджетыннан бирелми, ә хәйриячеләр тарафыннан җыелган. Бу эшне Хәйриячелек эшчәнлеге буенча республика советы алып бара, дип өстәде ТР Президенты ярдәмчесе.