Рөстәм Миңнеханов «Уралның сугышчан даны» хәрби техника музеенда булды

Бүген Свердловск өлкәсенә эш сәфәре кысаларында Татарстан Республикасы Президенты Рөстәм Миңнеханов «Уралның сугышчан даны» хәрби техника музеенда булды. 

Музей комплексы Екатеринбургның юлдаш шәһәре Югары Пышмада урнашкан. Музей илебезнең героик киләчәге турында истәлекне саклау максатларында 2005 елда оештырылган. 

Башта Рөстәм Миңнеханов Бөек Ватан сугышында һәлак булган сугышчы-металлурглар истәлегенә багышланган «Журавли» мемориалына чәчәкләр  салды.   

Экскурсия барышында Рөстәм Миңнеханов уникаль хәрби техника коллекциясе белән танышты, ул ачык һавада урнаштырылган. Монда Т-34 һәм ИС легендар танклары, реактив самолётлар, үзйөрешле җайланмалар, истребительләр, хәрби катерлар, су асты көймәсе макеты һәм башкалар бар. Тимер юл техникасы экспозициясенә бронепоездлар, паровозлар, тимер юлда йөри торган бронеавтомобильләр керә. 

Аннары Татарстан Президенты күргәзмәләр үзәгенә юнәлде. Рөстәм Миңнеханов Бөек Ватан сугышы заманында ленд-лиза буенча СССРга китерелгән төрле типтагы бронетехниканы һәм уникаль чит илләр самолетларын карап чыкты.  

Шуннан соң Рөстәм Миңнеханов автомобиль техникасы өчен аерым павильонга килде. Мәйданчыкка 200нән артык төрле төрдәге илебез машиналары үрнәкләре куелган: Горький автозаводының күп серияле совет автомобильләре, шул исәптән сирәкләрен (ГАЗ-М415), экспериментальләрен («Старт» микроавтобусы), аз сериялеләрен («Москвич-400» пикап), вәкиллек автомобильләрен (ЗИС-110 һәм ГАЗ-14 «Чайка») дә кертеп.