Татарстанда 1,1 миллионнан артык кеше санитар-экологик икеайлыкта катнашкан

Татарстанда санитар-экологик икеайлык чараларында 1 миллион 127 мең кеше катнашкан. Бу хакта Татарстан Министрлар Кабинетында узган брифингта Татарстан экология һәм табигый байлыклар министры Фәрит Габделганиев җиткерде.

Республикада масштаблы чүплекләрне юк итүдә уңай үзгәрешләр күзәтелә. Бигрәк тә район үзәкләрендә. Актаныш, Алексеевск, Әлки, Әлмәт, Апас, Арча, Әтнә, Баулы, Балтач, Чүпрәле, Алабуга, Зәй, Кайбыч, Кама Тамагы, Кукмара, Мамадыш, Менделеевск, Мөслим, Түбән Кама һәм тагын кайбер районнарда чүплекләр бөтенләй бетерелгән.

Сарман районында, мәсәлән, 600 квадрат метрда, Чаллыда 721 квадрат метрда чүп урыннары җыештырылган.

1 июльдә Татарстанда “Чиста ярлар” акциясе старт ала. Республикада айлык кысаларында яр буйлары чүпләрдән, чүплекләрдән арындырыла.

“Былтыр әлеге акциядә якынча 50 мең кеше катнашты, 800 чакрым озынлыкта яр буйлары чистартылды”, – дип билгеләп үтте Фәрит Габделлганиев.

1 июньнән Татарстанда “Экология велопатруле” акциясе старт алган иде. Биредә төп игътибар Казансу яр буйларына юнәлдерелгән. Ул 31 августка кадәр һәркөнне дәвам итә. Хәзер эш Биектау, Арча районнарында бара.

“Эре оешмалар урнашкан су буйларына ныклы игътибар бирелә. Нәкъ менә алар төп пычрату чыганагы булып тора. Биредә без төп ике транспорт: велосипед һәм катер кулланабыз. Сулыкларга антропоген тәэсир зәңгәр-яшел суүсемнәр китереп чыгара, ә алар черегәндә,  агулы матдәләр бүленә һәм алар балык үлеменә китерә. Шунлыктан, сулыкларга пычрак матдәләр агып төшүне булдырмас өчен, җитди эш алып бару мөһим”, – дип билгеләп үтте министр.