Эпидемия сезоны башланганнан бирле Татарстанда 242 кеше грипп йоктырган

Декабрь уртасыннан хәзерге көнгә кадәр Татарстанда 242 тапкыр А(Н3N2) грипп белән авыру очрагы теркәлгән, шуларның 93е балалар. Бу хакта Татарстан Республикасы Министрлар Кабинетында узган брифингта Роспотребнадзорның Татарстан Республикасы буенча идарәсе җитәкчесе Марина Патяшина хәбәр итте.

Грипп белән авыру очраклары Казанда (134 очрак),Чаллыда (75), Чистай һәм Әлмәттә (11 шәр), Алабугада (5) һәм Яшел Үзәндә (6) күзәтелгән. “Зур шәһәрләрдә февраль аенда авыручылар саны артыр дип уйлыйбыз”, - дип белдерде Роспотребнадзорның Татарстан Республикасы буенча идарәсе җитәкчесе.

Марина Патяшина А(Н3N2) вирус гриппы кискен респиратор вирус инфекцияле авырулар арасында декабрь урталарыннан күренә башлады, дип белдерде. Беренче вакытта гомуми авыручылар саныннан ул 20 – 25 процент тәшкил иткән булса, гыйнварның беренче атнасында якынча 80 процентка җиткән. “Эпидемия сезоны сентябрьдә башланды. Хәзерге көндә ОРВИ һәм грипп белән Татарстанда 347 мең 14 кеше авырды. Бу республиканың 9 процент халкы”, - диде Патяшина һәм В вирус гриппы белән авыру очрагы ачыклануын да өстәде.

Бу елның дүртенче атнасында 25 мең 381 кешенең ОРВИ һәм грипп белән авыру очрагы теркәлгән. “Авырулар саны өлкән буын кешеләре исәбенә артты”, - диде Марина Патяшина.

Ул Казанда авыручылар саны гыйнварның беренче атнасында башланды һәм хәзергә кадәр дәвам итә, дип белдерде. “Беренче атнада авручылар санының 86 процентка артуы, икенче һәм өченче атнада ике тапкыр, ә дүртенче атнада 4 процентка артуы күзәтелде. Иң күп авыручылар саны Чаллы, Әлмәт һәм Яшел Үзәндә теркәлде”, - диде спикер.

“Быелгы сезонда 15 мәктәптә өлешчә 34 класс һәм 3 мәктәп тулысы белән ябылган иде. Бүген  биш мәктәптә өлешчә 10 класс ябык. Тулысынча ябылган мәктәпләр юк”, - диде Патяшина.