Илдар Халиков: Соңгы елларда Татарстанда юл хәрәкәте иминлеген күтәрү өчен күп эшләнде

Бүген ТР Хөкүмәте йортында РФ транспорт министры Максим Соколов рәислегендә “Имин һәм сыйфатлы юллар” проектын Татарстанда гамәлгә ашыру мәсьәләләре буенча киңәшмә узды. Анда Татарстан Премьер-министры Илдар Халиков катнашты.

Соңгы елларда Татарстанда юл хәрәкәте иминлеген күтәрү буенча күп эш башкарылган, дип белдерде Илдар Халиков. 5 ел эчендә 24 күпер төзелгән, 1,5 мең км автомобиль юллары салынган, 51 күпер һәм 2 мең км дан артык юл төзекләндерелгән. Премьер-министр ассызыклаганча, “акыллы” юл гамәлгә кертелгән, “112” номеры буенча экстрен оператив хезммәтне чакыру системасы үстерелгән.

ТР Премьер-министры сүзләренчә, “Имин һәм сыйфатлы юллар” проектын Татарстанда гамәлгә ашыру кысаларында Казан юлларын үстерү һәм норматив транспорт-файдаланылучы хәлгә китерү буенча комплекслы программа эшләү планлаштырыла. Татарстан башкаласыннан тыш 7 муниципаль район каралган: Биектау, Лаеш, Питрәч, Арча, Югары Ослан, Яшел Үзән һәм Теләче.

Киңәшмәдә катнашучыларны Республика көне белән котлап, Максим Соколов, “Имин һәм сыйфатлы юллар” проектын Россиянең халкы 1 млн. нан арткан төбәкләрендә гамәлгә ашыру планлаштырыла, дип белдерде. Татарстан шул төбәкләр исәбенә кергән.