С. Сәйдәш исемендәге Зур дәүләт концертлар залында Татарстан Республикасында Санкт-Петербург сәнгать осталары концерты булды

Бүген кич С. Сәйдәш исемендәге Зур дәүләт концертлар залында Татарстан Республикасында Санкт-Петербург сәнгать осталары концерты булды.  

Концерт Татарстан Республикасында Санкт-Петербург көннәре кысаларында узды.  

Тамашачыларга сәламләү сүзләре белән Татарстан Республикасы Президенты Рөстәм Миңнеханов һәм Санкт-Петербург губернаторы Георгий Полтавченко чыгыш ясады.

«Без Татарстан Республикасында Санкт-Петербург көннәрен ачабыз, аның пограммасы бай һәм кызыклы», - диде Рөстәм Миңнеханов. Ул искәрткәнчә, бүген Санкт-Петербург Хөкүмәте һәм Татарстан Республикасы арасында сәүдә-икътисадый, фәнни-техник, социаль һәм мәдәни хезмәттәшлек турында килешү һәм аны гамәлгә ашыру беркетмәсе имзаланган. 

Рөстәм Миңнеханов сүзләренчә, Санкт-Петербург сәнгать осталары концерты – татарстанлылар өчен бәйрәм. Ул барысына да күңелле кичәләр теләде.

Санкт-Петербург губернаторы  Георгий Полтавченко билгеләп үткәнчә,   Невадагы шәһәрдә бөтен илдән килгән талантлы һәм иҗат кешеләре хезмәт итә, алар Санкт-Петербург үсешенә генә түгел, барлык Россия үсешенә дә зур өлеш кертә. «Без сезне якташларыгыз иҗаты белән таныштырырга булдык, - диде Полтавченко. – Бу безнең сезгә бүләгебез».

Концерт программасында – Татарстан Республикасының халык артисты, РСФСРның атказанган артисты Альберт Асадуллин һәм Татарстан Республикасының атказанган артисты Тимур Абдикеев һәм башкалар чыгышлары.