3 сентябрьдән 5 сентябрьгә кадәр Казанда беренче тапкыр "Комплекслы куркынычсызлык – 2026" иминлекне тәэмин итү чараларының XVI халыкара салоны узачак

«Комплекслы куркынычсызлык – 2026" XVI халыкара иминлекк чаралары салоны Казанда 3-5 сентябрьдә узачак. Чара программасын бүген Татарстан Хөкүмәте Йортында узган брифингта тәкъдим иттеләр.

«Комплекслы куркынычсызлык» халыкара салоны - Россиянең халык һәм территорияләрнең иминлеген тәэмин итү өлкәсендәге төп тармак мәйданчыкларының берсе. Ул илнең Гадәттән тыш хәлләр министрлыгы системасы үсеше өчен стратегик әһәмияткә ия. Биредә соңыннан янгын сүндерү-коткару бүлекчәләре һәм катнаш тармаклар эшчәнлегендә гамәли кулланышка керә торган хәл ителешләр күрсәтелә.

2026 елда чара беренче тапкыр Мәскәүдән һәм Мәскәү өлкәсеннән читтә — Татарстан Республикасы башкаласында уздырыла. Халыкара салонның үзәк өлешләреннән берсе - күргәзмә программасы.

Үз эшләнмәләрен 230 оешма тәкъдим итәчәк. 84 берәмлек техниканың үзенчәлекләре белән танышырга мөмкин булачак.

Россия Гадәттән тыш хәлләр министрлыгының Мәгариф һәм фәнни-техник эшчәнлек департаменты директоры Александр Макаров сөйләгәнчә, экспозиция бер үк вакытта янгын-коткару техникасының тарихи үсешен һәм заманча технологик мөмкинлекләрне күрсәтә. "Бу янгын сүндерү автоцистерналары, насос-җиңсәле автомобильләр, насос станцияләре, янгын сүндерү баскычлары һәм автокүтәргечләр, газ һәм порошок сүндерү автомобильләре, авария-коткару автомобильләре һәм мотоцикллар, барып җитү авыр булган катлаулы территорияләрдә эшләү өчен махсус техника», - диде ул.

2026 елда салонның уникаль аермасы су объектларында иминлек өлкәсендә мөстәкыйль юнәлеш формалаштыру булган. Күзәтчелек һәм эзләү-коткару бурычлары өчен билгеләнгән кече үлчәмле суднолар һәм көймәләр үрнәкләрен күрергә мөмкин булачак. Алар арасында – компакт көймәләр дә, 12 метрдан артык озынлыктагы суднолар да бар.

Экспозициянең мөһим элементы булып 2 вертолет торачак. Мәскәү авиация үзәгендә Ка-32А янгын-коткару вертолеты, транспорт-коткару кабинасы һәм очышлар белән идарә итүнең күчмә пункты булачак. Казан вертолетлар заводы Ми-38ПС эзләү-коткару вертолетының үзенчәлекләрен күрсәтәчәк.

Күргәзмәгә килүчеләр шулай ук «Аэропорт» тимер юл станциясендә янгын сүндерү поездын да күрә алачак.

5 сентябрьдә күргәзмәне Казан халкы һәм Салон кунаклары карый алачак. Моның өчен алдан теркәлү узарга кирәк.

Салонның эшлекле программасы федераль, тармак, фән һәм халыкара дәрәҗәдәге 30дан артык чараны берләштерә. Аларда 30лап ил вәкилләре катнаша: Бәхрәйн, Беларусь, Бруней, Вьетнам, Иордания, Испания, Кения, Малайзия, Берләшкән Гарәп Әмирлекләре һәм башкалар.

Эшлекле программаның төп көннәре - 3-4 сентябрь. Иң әһәмиятле чаралар арасында: Наиф исемендәге Гарәпиминлек турында фәннәр университеты белән берлектә «Нефть объектларының иминлеген тәэмин итү» III халыкара фәнни-гамәли конференциясе; «Куркыныч табигать күренешләрен һәм гадәттән тыш хәлләрне мониторинглау, модельләштерү һәм фаразлау» халыкара фәнни-гамәли конференциясе.

Шулай ук янгын куркынычсызлыгы өлкәсендә сертификацияләү, янгын-коткару гарнизоннары көчләре һәм чараларына идарәнең дәүләт мәгълүмат системасын үстерү мәсьәләләре турында да фикер алышачаклар. Гадәттән тыш хәлләрне фаразлау өчен заманча алымнар тәкъдим ителәчәк.

4 сентябрьдә Лаеш районында янгын сүндерүчеләрне һәм коткаручыларны әзерләү өчен югары технологияле укыту-күнегүләр полигоны ачылу көтелә. Бу Россиядә мондый зурлыктагы бердәнбер объект, дип билгеләп үтте Россия Гражданнар оборонасы эшләре, гадәттән тыш хәлләр һәм табигый бәла-казалар нәтиҗәләрен бетерү министры киңәшчесе Даниил Мартынов.

22 гектарда 5 кластер төзелгән: техноген һәм янгын куркынычсызлыгы, эзләү-коткару эшләре, спорт һәм административ-көнкүреш кластерлары. Комплекс елына 3,5 мең белгеч әзерләүгә исәпләнгән.

Чит ил партнерлары шулай ук хезмәттәшлеккә зур кызыксыну белдерә, Россия янгын сүндерүчеләренең һәм коткаручыларның югары әзерлек дәрәҗәсен билгеләп үтә. Малайзиядән, Согуд Гарәбстаныннан, Берләшкән Гарәп Әмирлекләреннән һәм башкалардан өйрәнүгә дип гаризалар килде инде.

Халыкара салонның эшлекле программасы кысаларында Россия Гадәттән тыш хәлләр министрлыгы һәм халыкны һәм территорияләрне гадәттән тыш хәлләрдән саклау, янгын куркынычсызлыгын һәм су объектларында кешеләрнең иминлеген тәэмин итү өлкәсендә эшчәнлек алып баручы ирекле оешмаларның үзара хезмәттәшлегенә багышланган конференция булачак.

"Безнең ихтыярыйлар күп еллар дәвамында югалган кешеләрне һәм балаларны эзләү белән шөгыльләнәләр, гуманитар миссияләрдә катнашалар, гадәттән тыш хәлләр һәм аларның нәтиҗәләре вакытында халыкка ярдәм итәләр. Бу тәҗрибә иң мөһимен күрергә мөмкинлек бирә: ярдәм итү теләге генә җитми. Ихтыярыйларны әзерләргә, аларның мөмкинлекләрен аңларга, аларга бурычны дөрес куярга һәм аларның эшен һөнәри хезмәтләр белән хезмәттәшлек итүнең бердәм системасына кертергә кирәк», - дип хәбәр итте Югалган һәм зыян күргән балаларга ярдәм итү илкүләм үзәгенең Төбәк бүлекләре белән хезмәттәшлек һәм ихтыярыйлык эшчәнлеген үстерү департаменты җитәкчесе Гиорги Булиа.

Россия гадәттән тыш хәлләр министрлыгының ТР буенча Баш идарәсе башлыгы Ирек Кадамов күргәзмә кысаларында Татарстан сәнәгате стенды тәкъдим ителәчәге турында сөйләде. Шулай ук республика уку йортларының коткаручылар әзерләү буенча белем бирү программалары һәм мөмкинлекләре турында сөйләячәкләр.

3 сентябрьдә «Янгын сүндерү Олимпы» һөнәри осталык ярышлары була. Анда 400дән артык кеше катнашыр дип көтелә. Республика коткаручылары да осталыкларын күрсәтәчәк.

5 сентябрьдә 9:00дән 16:00гә кадәр «Казан Экспо» ХКҮ каршындагы мәйданчыкта ТР территориаль янгын-коткару гарнизоны шәхси составының юл-транспорт һәлакәте нәтиҗәләрен бетерү буенча күрсәтмә чыгышлары узачак.