Рөстәм Миңнеханов Тукай районында һәм Чаллыда мәгариф учреждениеләрен карады

Бүген Татарстан Рәисе Рөстәм Миңнеханов Чаллыда эш сәфәрендә. Визитның төп максаты - мәгариф һәм фән хезмәткәрләренең Республика август киңәшмәсендә катнашу. Конференция башланыр алдыннан Рөстәм Миңнеханов «Следопыт» балалар савыктыру лагере һәм «Хыялланырга батырчылык итәбез!» гаилә мәктәбе эшчәнлеге белән танышты.

Тукай районында «Следопыт» балаларны савыктыру лагерен агымдагы елның июлендә капиталь ремонттан соң ачтылар. Монда инде 600 дән артык бала ял иткән. Яңартылганнан соң объект ел әйләнәсе эшли торган яшьләр мәгариф үзәге статусын алды. Республика Рәисе торак корпусларны, медицина пунктын, ашханәне карап чыкты һәм биредә балаларның имин һәм сыйфатлы ялы һәм эре чаралар уздыру өчен барлык шартлар да тәэмин ителгән, дип билгеләп үтте.

«Следопыт» лагеренда бу көннәрдә Татарстан һәм Идел буеның иң эре студентлар форумнарының берсе - «Лига форум» уза. Рөстәм Миңнехановка «ТР Студентлар лигасы» төбәк яшьләр иҗтимагый оешмасы проектлары турында сөйләделәр.

Аннары Татарстан Рәисе мәгариф сменасында катнашучыларны сәламләде. "Лига форум - республикабызның гына түгел, бөтен илебезнең талантлы яшьләрен җәлеп итү ноктасы. Эшләү елларында форум сәләтле яшьләрнең якты идеяләрен тормышка ашыру һәм әһәмиятле социаль инициативаларны гамәлгә ашыру мәйданчыгына әверелде. Форум гадәттәгечә студентларның иң яхшы вәкилләрен җыйды. Сезне максатчанлык, файда китерү теләге һәм иҗтимагый әһәмиятле эшчәнлектә актив катнашу аерып тора", - дип ассызыклады ул.

Рөстәм Миңнеханов сөйләгәнчә, Татарстан - Россиядә яшьләр сәясәте алдынгыларының берсе. Республикада гадәттәгечә балалар һәм яшьләрнең җәйге ялы инфраструктурасын үстерүгә зур игътибар бирелә. 2019 елдан 2026 елга кадәр 62 балаларны савыктыру лагере төзекләндерелде һәм төзелде. Агымдагы елның төзекләндерү программасына 19 лагерь кертелгән. Эш дәвам итәчәк, дип тәмамлады ул һәм балаларга яхшы ял теләде.

Ахырда Рөстәм Миңнеханов «ТР Студентлар лигасы» төбәк яшьләр иҗтимагый оешмасы коллективына Рәиснең Рәхмәтен тапшырды.

Аннары ТР Рәисе Чаллыдагы «Хыялланырга батырчылык итәбез!» шәхси гаилә мәктәбендә булды. Ул сыйныфларны, лабораторияләрне карап чыкты һәм балаларны укыту программасы белән кызыксынды. Шулай ук интерактив актлар залын, китапханәне, скалодромны һәм ашханәне карады.