Татарстан Рәисе «Иннопром» кырларында Свердловск өлкәсе Губернаторы Денис Паслер белән очрашты

Татарстан Рәисе Рөстәм Миңнеханов Екатеринбургта «Иннопром» халыкара сәнәгать күргәзмәсе кырларында Свердловск өлкәсе Губернаторы Денис Паслер белән очрашты. 

Рөстәм Миңнеханов ассызыклаганча, төбәк Татарстанның стратегик партнеры булып тора. «Бездә үзара продукция һәм хезмәт күрсәтүләр күләме югары, товар әйләнеше яхшы. Сезнең төбәкнең сәнәгате алга киткән һәм минерал-чимал базасы бик бай. Сәүдә-икътисадый элемтәләрне үстерү өчен барлык мөмкинлекләр дә бар", - дип саный ТР Рәисе. 

Татарстан Свердловск өлкәсенә «КАМАЗ» автотехникасы, шиннар, компьютер техникасы, химия һәм нефть химиясе продукциясе, дарулар, медицина техникасы җибәрә. Свердловск өлкәсеннән республикага торбалар, кара металл прокаты, төзелеш материаллары һәм станоклар китерелә.

Әңгәмә барышында Рөстәм Миңнеханов һәм Денис Паслер төбәктәге сәнәгать предприятиеләренә һәм эре төзелешләргә «КАМАЗ» йөк автомобильләрен китерүне арттыру мөмкинлеге турында фикер алыштылар. Чаллы автогиганты төбәк күргәзмәләрендә презентация чаралары уздырырга, сервис һәм техниканы ремонтлауны тәэмин итәргә әзер. 

Рөстәм Миңнеханов оештыру дәрәҗәсен «Иннопром» сәнәгать күргәзмәсе белән югары бәяләде һәм Губернаторны якындагы айларда Казанда узачак «РОСТКИ» һәм Kazan Digital Week форумнарына чакырды.

2014 елдан төбәкләр арасында хезмәттәшлек турында килешү гамәлдә. Бүген Рөстәм Миңнеханов һәм Денис Паслер заманча шартларда хезмәттәшлекне үстерү өчен 2026-2030 елларга Килешүне гамәлгә ашыру Чаралары планын имзаладылар.