Рус теле көнендә Рөстәм Миңнеханов Татарстанның Рус милли-мәдәни берләшмәсе активы белән очрашты

Бүген Татарстан Рәисе Рөстәм Миңнеханов рус җәмәгатьчелеге вәкилләре белән очрашуны Татарстанның Рус милли-мәдәни берләшмәсе активистларына рәхмәт сүзләреннән башлады.

Очрашу гадәттәгечә Рус теле көнен бәйрәм итүгә һәм Александр Пушкинның тууына 227 ел тулуга багышлана.

Чара быел Татарстан Республикасы Дәүләт сынлы сәнгать музее мәйданчыгында узды (узган 2025 елда мондый очрашу Казандагы Лев Толстой музее базасында оештырылган иде).

"Сезнең активлыгыгыз нәтиҗәсендә без бу еллар эчендә күп кенә мәсьәләләрне хәл иттек, - диде Рөстәм Миңнеханов, очрашуда катнашучыларга мөрәҗәгать итеп. – Мондый очрашулар нәтиҗәсендә без мөһим темалар буенча фикер алышабыз». Рөстәм Миңнеханов шулай ук уникаль осталык үзәге турында сөйләде, анда балаларны һәм яшьләрне халык һөнәрләренә һәм традицион кәсепләргә өйрәтәчәкләр. Ул ассызыклаганча, әгәр мондый һөнәрләрне, мондый традицияләрне сакламасаң, вакыт узу белән боларның барысын да югалтырга мөмкин, ә шуның белән бергә үз үзенчәлегеңне дә югалтырга мөмкин. "Барысын да югалтырга мөмкин... Бер – ике буын - моның белән шөгыльләнмәсәң, барысы да югалачак, – диде Рөстәм Миңнеханов. - Әмма нәкъ менә сезнең активлыгыгыз һәм шундый уртак эшегез нәтиҗәсендә күп эшләр башкарыла».

Татарстан Республикасы Рус милли-мәдәни берләшмәсе рәисе, Татарстан Республикасы Иҗтимагый палатасы әгъзасы Ирина Александровская республика җитәкчелегенә һәм Рөстәм Миңнехановка рус җәмәгатьчелеге вәкилләре белән мондый очрашуларда җәмгыять өчен мөһим мәсьәләләр турында фикер алышулары өчен рәхмәт белдерде.

"Узган елгы очрашу нәтиҗәләре буенча Лев Толстойның тууына 200 ел тулуны бәйрәм итү турында Указ расланганы өчен без рәхмәтле. Бу 2028 елда билгеләп үтеләчәк – Россиядә дә, әлбәттә, Татарстанда да", - дип хәбәр итте ул.

Очрашу барышында Рөстәм Миңнехановка 2026 елда вице-адмирал һәм Ерак Көнчыгышны өйрәнүче Иван Федорович Лихачевның тууына 200 ел тулуы турында сөйләделәр. Ул Казанда туган, илне өйрәнү өчен күп эшләр башкарган.

"Бу Россиядә аныж исеме белән өч географик урын атала. Илдә шулкадәр географик урын исеме белән аталган бер генә хәрби диңгезче дә юк", - дип сөйләделәр җәмәгатьчелек вәкилләре. Мондый урыннар арасында Охота диңгезендәге Лихачев бугазы, Приморье краендагы Лихачев борыны һ. б.

Иван Лихачев үзенең васыятендә аны Свияжскта әнисе янында җирләүне сораган. Кызганычка каршы, Иван Лихачевның җирләнгән урыны югалган. Аның юбилеена Свияжсктагы музей-тыюлык югалган кабер ташын торгызырга әзерләнә - безнең көннәргә кадәр кабер ташының фотосурәтләре һәм аерым фрагментлары килеп җиткән.

Рөстәм Миңнеханов фикеренчә, без бүгенге көнгә белгәннәрдән чыгып, якынча күмү урынын билгеләргә һәм анда кабер ташы куярга мөмкин.

«Бу бик кызыклы тарих", - дип шәрехләде ул Иван Лихачев биографиясен.

Аннары Рөстәм Миңнехановка «Слободское кольцо» фестивале проекты турында сөйләделәр - проект Яңа Чишмә районында гамәлгә ашырыла. Аның төп идеясе - район тарихын, булган мәдәни мирасын җиткерү.

«Бүген безнең эре шәһәрләребез – Казан, Чаллы, Түбән Кама, Әлмәт кенә түгел, һәр муниципаль районның үз үзенчәлеген күрсәтү, халыкның үзләре өчен дә, туристлар өчен дә кызыклы тарту нокталарын табу мөмкинлеге булуы мөһим», - диде Рөстәм Миңнеханов.

Ул ассызыклаганча, активистлар, битараф булмаган кешеләр бүген бик мөһим – шул исәптән мондый идеяләрне һәм проектларны гамәлгә ашыру өчен дә.  

Бүгенге чара кысаларында 2022-2025 елларда Татарстанның Рус милли-мәдәни берләшмәсе активы белән узган очрашуларда күтәрелгән мәсьәләләр каралды.