ПМЭФ-2026 кырларында Рөстәм Миңнеханов Казахстан Республикасы Президенты Администрациясе җитәкчесе Роман Скляр белән очрашты

Бүген Татарстан Рәисе Рөстәм Миңнеханов Казахстан Республикасы Президенты Администрациясе җитәкчесе Роман Скляр белән очрашты.

Очрашу Петербург халыкара икътисадый форумы-2026 кырларында узды.

Рөстәм Миңнеханов Роман Склярны әлеге вазыйфага билгеләнүе белән котлады. «Бу билгеләнү - Сезнең югары профессионализмыгызны һәм бай тәҗрибәгезне тану", - дип ассызыклады Татарстан Рәисе һәм Казахстан Президенты Касым-Жомарт Токаевка җылы сәламләү сүзләрен һәм изге теләкләрен җиткерүен сорады.

 "Татарстан илләребезнең элемтәләрен ныгытуга сизелерлек өлеш кертә, - дип билгеләп үтте Рөстәм Миңнеханов. - 2025 ел йомгаклары буенча Татарстан-Казахстан товар әйләнеше күләме чиреккә артты һәм 946 миллион доллар тәшкил итте».  

Әңгәмә барышында яклар конкрет уртак проектларны гамәлгә ашыру турында фикер алыштылар.

Татарстан Рәисе Россия-Казахстан мөнәсәбәтләре кысаларында Казахстан белән хезмәттәшлекне алга таба актив үстерергә әзер булуын раслады.