Рөстәм Миңнеханов Түбән Камада «Ай флекс" мәйданчыгында сыгылмалы төргәкләр җитештерүне карады

Бүген Татарстан Рәисе Рөстәм Миңнеханов Түбән Камада «Ай флекс» ҖЧҖ сәнәгать мәйданчыгында булды.

Искәртәбез, Рөстәм Миңнеханов Химиклар көнен бәйрәм итүгә багышланган чараларда катнашу өчен Түбән Камада эш сәфәрендә.

Бу сәнәгать мәйданчыгында сыгылмалы төргәкләр, курьер пакетлары, азык-төлек пленкалары җитештерү заводы эшли. Сыгылмалы индивидуаль төргәк азык-төлек өчен дә, шулай ук азык-төлек булмаган продуктлар өчен дә, шул исәптән көнкүреш химиясе, косметик чаралар, төзелеш материаллары, балалар һәм иҗат өчен товарлар өчен дә билгеләнгән. Моннан тыш, төргәккә шунда ук тулы төсле мөһер сугыла.

Рөстәм Миңнехановка сыгылмалы пленка җитештерү буенча заманча җайланмаларны күрсәттеләр, продукция линейкасы һәм предприятиеләр белән хезмәттәшлек, шулай ук маркетплейслар турында сөйләделәр.

Кунаклар шулай ук җитештерелә торган продукциянең билгеләнгән таләпләргә туры килү-килмәвен тикшерү бүлегендә булдылар. Татарстан Рәисе продукциянең гомуми күләмендә брак проценты нинди булуы белән кызыксынды.  

Рөстәм Миңнехановны Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Олег Коробченко, Түбән Кама муниципаль районы башлыгы Радмир Беляев, «Татнефтехиминвест-холдинг» АҖ генераль директоры Рафинат Яруллин, Россия Федерациясе Дәүләт Думасы депутаты Айдар Метшин озата йөрде.