Рөстәм Миңнеханов Лениногорск районының Тимәш авылында Бөек Ватан сугышы елларында һәлак булган сугышчылар һәйкәленә чәчәкләр салды

Бүген Лениногорск муниципаль районына эш сәфәре кысаларында Татарстан Рәисе Рөстәм Миңнеханов һәм аны озата йөрүче затлар Тимәш авылында булдылар, анда 1941-1945 елларда Бөек Ватан сугышында һәлак булган сугышчылар һәйкәленә чәчәкләр салдылар.

Сугыш елларында Тимәш авыл җирлеге территориясеннән 227 кеше фронтка китә, шуларның 108е һәлак була яки хәбәрсез югала.

Рөстәм Миңнеханов һәйкәл итәгенә чәчәкләр салды һәм бер минут тынлык белән һәлак булганнарны искә алды. Татарстан Рәисенә хәбәр итүләренчә, бүгенге көндә Тимәш авылында ике тыл хезмәтчәне яши.

Искәртәбез, 1941-1945 еллардагы Бөек Ватан сугышы елларында Лениногорск районы территориясеннән фронтка 12751 кеше киткән. Сугыштан 6518 кеше әйләнеп кайтмаган. Унике кеше Советлар Союзы Герое исеменә лаек булган.