Рөстәм Миңнеханов Лениногорск районында язгы кыр эшләренең барышын бәяләде, кошчылык фабрикасында булды, механизаторлар, хуҗалыклар җитәкчеләре, авыл җирлекләре башлыклары белән очрашты

Бүген Татарстан Рәисе Рөстәм Миңнеханов Лениногорск муниципаль районында эш сәфәрендә булды.

Сәфәренең төп максаты - авыл хуҗалыгы предприятиеләрендә булу, район басуларында язгы кыр эшләренең барышы белән танышу. Лениногорск муниципаль районы башлыгы Марат Гыйрфанов хәбәр иткәнчә, бүгенгә барлык мәйданның 37%ы чәчелгән. Моннан тыш, минераль ашламалар кертү процессы бара.

Район башлыгы Рөстәм Миңнехановка авыл халкының тормыш сыйфатын яхшыртуга ярдәм итүче республика программаларын гамәлгә ашырганы, шулай ук кайбер проектларга ярдәм иткәне өчен рәхмәт белдерде. Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Җәббаров хәбәр иткәнчә, Лениногорск районы язгы кыр эшләрен актив алып бара.

Ул билгеләп үткәнчә, бүген шәхси ярдәмче хуҗалыкларга ярдәм итү һәм аларны үстерү өлкәсендә эшне көчәйтергә, бу мәсьәләгә күбрәк игътибар бирергә кирәк.

Рөстәм Миңнеханов Лениногорск кошчылык фабрикасында булды, анда агымдагы эшләрнең торышы, шулай ук җитештерүне алга таба үстерү этаплары белән танышты. Әлеге инвестиция проекты «Лениногорск кошчылык фабрикасы» ҖЧҖ базасында индустриаль күркә үстерү һәм сую буенча җитештерү комплексы төзүне күздә тота.

Искәртәбез, Лениногорск кошчылык фабрикасы «Чистай» ХК тарафыннан сатып алынган иде. 2024 елда предприятиене тулысынча модернизацияләү һәм үзгәртеп кору турында карар кабул ителде - бөтен кош фабрикасын күркә үстерү, сую һәм эшкәртү өчен яңадан юнәлешен үзгәртү.

Проект үз куәтенә чыккач, кошчылык фабрикасы 6,5 мең тоннага кадәр күркә ите җитештерәчәк, шулай ук биредә бөртекле культуралар үстерергә телиләр, шул исәптән фабриканы үз азык базасы белән тәэмин итү өчен.

Бүгенгә барлык 36 кош абзары да файдалануга әзер. Кытайда җитештерелгән заманча җайланмалар һәм һава-тамчылы суыту системасы булган терлек сую-эшкәртү цехы эшли башлаган. Барлык сую процесслары «хәләл» стандартларга туры килә. Кошчылык фабрикасы каршында яңа ит продукциясе белән кибет ачылган.

Рөстәм Миңнеханов һәм аны озата йөрүче затлар Тимәш авылында булдылар, анда 1941-1945 елларда Бөек Ватан сугышында һәлак булган сугышчылар һәйкәленә чәчәкләр салдылар. Һәйкәл Тимәш авылында 1975 елда куелган. 2020 елда ул реконструкцияләнгән.

Аннары Рөстәм Миңнеханов механизаторлар, хуҗалыклар җитәкчеләре, авыл җирлекләре башлыклары, Лениногорск районы активы белән очрашты. Язгы кыр эшләренең барышы, кулланыла торган чәчү технологияләре, шулай ук минераль ашламалар булу турында фикер алыштылар.

Рөстәм Миңнеханов Лениногорск районы активы вәкилләрен һәм барлык халыкны якынлашып килүче бәйрәм – Җиңү көне белән котлады. Ул билгеләп үткәнчә, бүген барлык сугыш ветераннарын һәм тыл хезмәтчәннәрен, махсус хәрби операциядә катнашучыларны һәм ветераннарны, бигрәк тә МХОдә һәлак булганнарның гаиләләрен кайгырту мөһим. Татарстан Рәисе авыл җирлекләре башлыкларын бу темага зур игътибар бирергә, шәхси контрольгә алырга өндәде.

Белешмә өчен:

Лениногорск кошчылык фабрикасы турында https://chistai.ru/press/chto-delaet-chistopole-unikalnym/