Рөстәм Миңнеханов ХХ Россия венчур форумы кысаларында инновацион проектларның махсуслаштырылган күргәзмәсендә булды

Бүген Татарстан Рәисе Рөстәм Миңнеханов, Россия Фән һәм югары белем министры Валерий Фальков, РФ Президенты ярдәмчесе Андрей Фурсенко һәм башка рәсми затлар ХХ Россия венчур форумы кысаларында инновацион проектларның махсуслаштырылган күргәзмәсендә булдылар.

Искәртәбез, РВФ-2026 ачылу тантанасы бүген «Казан Экспо»МВЦ мәйданчыгында узды.

Күргәзмә башланганчы кунаклар «Яшьләр дизайны» проекты экспозициясе белән таныштылар. Бу яшьләр дизайны һәм сәнгатенең федераль конкурсы, ул яңа гына эшли башлаган белгечләргә идеядән алып үз продуктларын сатуга кадәр юл үтәргә һәм партнерлар белән коллаборациядә аның кече сериясен чыгарырга, шулай ук үзләрен профессиональ базарда танытырга мөмкинлек бирә. Аерым алганда, Татарстанда проектта катнашучылар үз идеяләрен «КАМАЗ» компанияләре һәм нефть чыгару предприятиеләре белән партнерлыкта тормышка ашырдылар.

Проектларга аңлатма биреп, Россия Федерациясе Фән һәм югары белем министры Валерий Фальков хәбәр иткәнчә, бүген бу юнәлешкә зур игътибар бирелә.

«Безнең берничә юнәлеш бар, шул исәптән сәнәгать дизайны, без аларны ничек яхшыртырга икәнен карыйбыз, һәм без инженерлык белемен трансформацияләүгә зур игътибар бирәбез, - диде Валерий Фальков. - Һәм, Рөстәм Нургалиевич әйтүенчә, сәнәгать дизайнын игътибарсыз калдырып, инженерлыкта әһәмиятле адым ясап булмый. Без бу мәсьәлә турында монда, форумда фикер алышуыбыз очраклы түгел - монда шулай ук сүз идеяне конкрет продуктка әверелдерү турында бара. Технологик эшкуарларлагы кебек үк".

Валерий Фальков шулай ук хәбәр иткәнчә, «Яшьләр дизайны» проекты Санкт-Петербургтан чыккан, һәм бүген аңа федераль масштаб бирергә телиләр.

Татарстан Республикасы Фәннәр академиясе стендында берьюлы берничә проект тәкъдир ителде, шул исәптән TatCoin – блокчейн нигезендә Татарстан Республикасына чит ил инвестицияләрен җәлеп итү моделе. Шулай ук электр самокатлары буенча проектлар, нефть химиясе тармаклары өчен эшләнмәләр тәкъдим ителде.

Тагын бер проект "Геном. Эксперт. Клиника" табиб-генетиклар өчен билгеләнгән. Генетик карталар һәм шәҗәрәләр формалаштырырга, дифференциацияле диагностика үткәрергә мөмкинлек бирә.

«Генриск» сервисын ТР Фәннәр академиясе белән берлектә Республика клиник хастаханәсе базасында гамәлгә кертергә тәкъдим иттеләр. Проект ЯА кулланып эшли, шул исәптән ул башлангыч стадияләрдә генетик авыруларны һәм нәселдән килгән патологияләрне ачыкларга ярдәм итә.

Алга таба үз проектларын Пермь краеның Технологик эшкуарлыкка ярдәм үзәге тәкъдим итте, экспозициядә җиде инновацион компания катнаша.

Россия Инновацион төбәкләре ассоциациясе стендында кунакларга РВФ-2026 кысаларында шулай ук РИТАның беренче инвестицион комитеты узачагы турында сөйләделәр, анда Татарстан, Саха Республикасы, Ульяновск, Түбән Новгород өлкәләреннән, Мәскәүдән һ.б. перспектив проектлар катнашачак. Форум кысаларында шулай ук РИТАның инфраструктура комитеты утырышы узачак – ул финанслауның яңа форматларына багышланачак, шул исәптән IPOга стартаплар чыгару саны.

2025 елда оештырылган «АлгаРитм" компаниясе акыллы дроннар, БПЛА җитештерүдә махсуслаша. Компаниядә «Ворлд Скиллс» дөнья һәм Европа чемпионатлары чемпионнары һәм призерлары эшли. Тулаем күргәзмәдә проектларның зур блогы пилотсыз очу аппаратларын булдыруга багышланган: өйрәтү модульләреннән алып очучы курьерларга кадәр.

Шулай ук гусеницалы гибрид вездеход күрсәтелде. Авторлар сөйләвенчә, вездеход сазлыкларда һәм теләсә нинди юлсыз җирләрдә сәгатенә 50 км тизлек белән йөри ала.

GITEX (Gulf Information Technology Exhibition) стенды алда торган чаралар анонсларына багышланган: 2026 елның 7-10 декабрендә Дубайда, 2027 елның 25-27 маенда Белградта узачак.

GITEX-технологияләргә, инновацияләргә һәм цифрлы хәл ителешләргә багышланган дөньядагы иң эре күргәзмә. Ел саен Дубайда уза һәм IT-өлкә лидерларын, корпорацияләр вәкилләрен, венчур инвесторларын һәм бөтен дөньядан стартапларны җыя.