Рөстәм Миңнеханов: Фәрит Мөхәммәтшин эшләгән еллары дәверендә зур абруй казанды

Татарстан Рәисе Рөстәм Миңнеханов һәм республика Дәүләт Киңәшчесе Минтимер Шәймиев җиденче чакырылыш Дәүләт Советының унтугызынчы утырышында катнаштылар. 

Утырыш барышында Фәрит Мөхәммәтшин депутат һәм Татарстан Республикасы парламенты Рәисе вәкаләтләрен туктату турында белдерде. "Бу карар уйланылган һәм исәпләнгән. Сәясәттә, эшчәнлекнең теләсә кайсы өлкәсендәге кебек үк, дәвамчанлык булырга тиеш. Узган 30 ел дәвамында мин парламентны җитәкләдем, бу минем өчен зур җаваплылык, киеренке эш чоры булды һәм, шул ук вакытта парламентыбыз, республикабыз һәм туган республикабыз - Россия Федерациясенең таяныч төбәге үсешенә үзләренең тырыш хезмәтләре белән зур өлеш кертүчеләр өчен горурлык чоры булды», – диде Фәрит Мөхәммәтшин. 

"Безгә зур үзгәрешләр чорында эшләргә туры килде, - дип ассызыклады парламент җитәкчесе. - Республика Хөкүмәте, җирле үзидарә органнары һәм барлык дәрәҗәдәге хакимият органнары, гражданнар җәмгыяте институтлары белән берлектә - бердәм командада - без хәзерге Татарстанның хокукый нигезен формалаштырдык, тотрыклы социаль-икътисадый үсеш өчен шартлар тудырып, кануннар кабул иттек. Без икътисадыбызны ныгытуга, туган телебезне һәм мәдәниятебезне саклап калуга һәм үстерүгә, милләтара татулыкны ныгытуга юнәлдерелгән инициативаларны хупладык, һәр татарстанлының тормыш сыйфатын күтәрү өчен эшләдек. Без башка төбәкләрдәге коллегаларыбыз, федераль хакимият органнары белән конструктив диалог булдыра алдык, шул ук вакытта без республикабыз мәнфәгатьләрен уңышлы яклый алдык».

Фәрит Мөхәммәтшин Рөстәм Миңнехановка ышанычы, даими ярдәме һәм игътибары өчен рәхмәт белдерде. Минтимер Шәймиевкә, депутатларга, Дәүләт Советы аппаратына, шулай ук республика сайлаучыларына парламент җитәкчесе аерым рәхмәт һәм хөрмәт сүзләрен әйтте. 

Рөстәм Миңнеханов ассызыклаганча, Фәрит Мөхәммәтшин эшләгән еллары дәверендә зур абруй казанды. "Фәрит Хәйрулла улы безнең белән кала, һәм минем уйлавымча, аның киңәшләре, абруе бик кирәкле, чөнки бу бик зур тәҗрибә - парламенттан тыш, Татарстан Халыклары ассамблеясе, партия линиясе буенча, муниципаль районнар белән эшләү", - диде республика Рәисе. 

Ул билгеләп үткәнчә, Фәрит Мөхәммәтшин белән озак еллар бергә эшләү дәверендә үзара аңлашуга һәм ярдәм итүгә нигезләнгән ышанычлы һәм нәтиҗәле мөнәсәбәтләр сакланып калды. "Бу елларда, төрле вазыйфаларда, мин аның ярдәмгә килергә әзер торуын тойдым", - диде Татарстан Рәисе.

Фәрит Мөхәммәтшинга Рөстәм Миңнеханов ярдәме өчен, депутатлар корпусы белән күп еллар дәвамында уңышлы хезмәттәшлек иткән өчен рәхмәт белдерде.

Аннары Татарстан Рәисе Фәрит Мөхәммәтшинга Россия дәүләтчелеген ныгытуга, парламентаризмны үстерүгә керткән зур өлеше һәм актив закон чыгару эшчәнлеге өчен II дәрәҗә "Ватан алдындагы казанышлары өчен" орденын тапшырды.

Минтимер Шәймиев Фәрит Мөхәммәтшинның республика үсешенә зур өлеш кертүен билгеләп үтте. "Безнең эш катлаулы моментлар белән тулы. Әмма бу коллективта уникаль эш атмосферасы барлыкка килде. Үзара хөрмәт һәм бер-беребезне аңлау халкыбызның югары ышанычын сакларга ярдәм итә", - диде ТР Дәүләт Киңәшчесе.

Ул дәүләт эшлеклеләренең республика халкы алдында аеруча җаваплы булуын ассызыклады. "Без үз эшебезне, үз җаваплылыгыбызны беләбез һәм туган республикабызга хезмәт итәбез", - дип өстәде Минтимер Шәймиев.

Депутатлар карары белән Фәрит Мөхәммәтшин Татарстан Республикасы Дәүләт Советының Мактаулы Рәисе итеп сайланды. Бу исем бүген утырыш барышында гамәлгә куелды. 

Татарстан Республикасы Дәүләт Советы Рәисе вазыйфаларын башкару Татарстан Республикасы Дәүләт Советы Рәисе урынбасары Марат Әхмәтовка тапшырылды.