Рөстәм Миңнеханов Благовещенскта «ЗимФестАмур» кышкы уеннарын ачуда катнашты, шулай ук «КАМАЗ» автомобилен йөртеп карады

Бүген Татарстан Республикасы Рәисе Рөстәм Миңнеханов һәм Амур өлкәсе Губернаторы Василий Орлов Благовещенда «ЗимФестАмур» кышкы спорт төрләренең халыкара Россия-Кытай фестивален ачу тантанасында катнаштылар.

Фестиваль 28 февральдән 1 мартка кадәр узачак.

Татарстан Республикасы быел беренче тапкыр кышкы уеннарда кунак төбәк сыйфатында катнаша. Кытай Халык Республикасы ягыннан фестивальне ачу тантанасында Хэйлунцзян провинциясе Халык Хөкүмәте Рәисе урынбасары Хань Шэнцзянь, Хэйхэ шәһәре Халык хөкүмәте рәисе Цинь Бо һәм Аньхой провинциясе вәкилләре катнашты.

КХРның Аньхой провинциясе - шулай ук Кытай ягыннан кунак төбәк.

"Россия-Кытай кышкы спорт төрләре фестивалендә катнашучыларны һәм кунакларны сәламләвемә шатмын. Бу мөһим чара Россия Федерациясе белән Кытай Халык Республикасы арасында стратегик партнерлыкны һәм дустанә мөнәсәбәтләрне ныгытуның ачык мисалы булып тора. Уеннар спорт өлкәсендә хезмәттәшлекне үстерүнең мөһимлеген күрсәтә – халыкларны һәм мәдәниятләрне берләштерү өчен иң куәтле мәйданчыкларның берсе. Россия һәм Кытай спорт казанышларының һәм традицияләренең бай тарихына, сәламәт яшәү рәвешен һәм массакүләм спортны үстерүгә зур планнарга ия. Бу фестиваль тәҗрибә уртаклашырга, һөнәри осталыкны арттырырга һәм спортчыларның яңа буынын рухландырырга мөмкинлек бирә. Һәр катнашучы иң яхшы спорт осталыгын һәм югары әхлакый сыйфатларын күрсәтер дип ышанам, бу безнең илләр арасында дуслык һәм үзара аңлашу көчен тагын бер кат ассызыклаячак. Әлеге мөһим вакыйганы оештыруга өлеш керткән һәркемгә рәхмәт белдерәсем килә һәм барысына да уңышлы һәм мавыктыргыч ярышлар һәм киләчәктә ике яклы спорт һәм мәдәни элемтәләрнең үсешен телим», - диде Рөстәм Миңнеханов ачылу тантанасында.

Амур өлкәсе Губернаторы Василий Орлов фестивальдә катнашучыларны рус һәм кытай телләрендә сәламләде. "Кадерле дуслар! Бүген без бергәләп кышкы спорт төрләренең Россия-Кытай фестивален ачабыз. Бу уникаль вакыйга спортның төрле төрләре вәкилләрен берләштерде, ә быелдан башлап – ике илнең төрле төбәкләре вәкилләрен дә. Хэйлунцзян провинциясеннән күптәнге партнерларыбызга, шулай ук Татарстан Республикасы һәм Аньхой провинциясеннән килгән кунакларга, ике илнең танылган спортчыларына ярдәмнәре һәм катнашулары өчен рәхмәт белдерәм. Фестиваль безнең халыклар арасындагы дуслыкны һәм хезмәттәшлекне тагын да ныгытыр дип ышанам! Барыгызны да ачылу белән котлыйм! Спортчыларга шома Амур бозы һәм җиңел су, ә кунакларга якты тәэсирләр телим!", - диде Амур өлкәсе башлыгы Василий Орлов.

Аннары Рөстәм Миңнеханов, Василий Орлов һәм Хэйлунцзян провинциясе Халык Хөкүмәте Рәисе урынбасары Хань Шэнцзянь, шулай ук Аньхой провинциясе вәкилләре, символик алка ыргытып, «Ак Бүре» (Россия) командасының яшь хоккейчылары һәм Хэйлунцзян һәм Аньхой (Кытай) провинцияләре җыелма командасыннан яшьтәшләре арасында хоккей матчын ачтылар. Хоккей - «ЗимФестАмур» кышкы уеннарының иң мавыктыргыч ярышларының берсе. Кытай хоккейчылары тарафыннан буй һәм авырлыкта өстенлек булуга карамастан, Казан спортчылары осталыкта алардан калышмады, һәм уен 4:4 исәбе белән тәмамланды – дуслык җиңде.

Хоккей матчын караганнан соң, фестивальнең мәртәбәле кунаклары ярышларның башка мәйданчыкларын да йөреп чыктылар. Алар Амур елгасы бозында атаклы «КАМАЗ-мастер» командасының йөк автомобильләрендә күрсәтмә узышларын карадылар.

Халыкара класслы спорт мастеры, автомотоспорт буенча Россиянең Атказанган спорт мастеры Рөстәм Миңнеханов үзе К5 буынының «КАМАЗ» спорт автомобилен йөртеп карады. Рөстәм Миңнеханов үзенең коллегасын - Амур өлкәсе Губернаторын Амур елгасы боз өстендә йөртте. «Минем әле беркайчан да "КамАЗ"да болай тиз йөргәнем юк иде, - дип уртаклашты аннары тәэсирләре белән Василий Орлов.

Автомобиль ярышларыннан соң Василий Орлов һәм Рөстәм Миңнеханов Амур елгасының төзекләндерелгән яр буе буйлап йөрделәр, аннан Хэйлунцзян провинциясенең Хэйхэ шәһәре күренеп тора. Яр буенда шәһәр халкы һәм кунаклары өчен мәдәни һәм спорт программалары оештырылган, сәхнәдә Амур һәм татар мәдәни коллективлары чыгыш ясады, шулай ук бәйрәм кунакларын рус һәм татар ашлары белән сыйладылар.

Сәфәр азагында төбәкләрр башлыклары Россия-Кытай дуслыгы йортында булдылар, анда Татарстан Республикасы Рәисе Рөстәм Миңнеханов һәм Амур өлкәсе Губернаторы Василий Орловның эшлекле очрашуы узды. Очрашу барышында Амур өлкәсе Губернаторы шулай ук Амур елгасы аша трансчик аркан юлы һәм Благовещенскта халыкара күргәзмә үзәге төзелеше проектлары турында сөйләде.

Искәртәбез, Благовещенскта «ЗимФестАмур» Россия-Кытай кышкы спорт төрләре фестивале - Россия һәм Кытай арасында кышкы спорт төрләре өлкәсендә халыкара хезмәттәшлекне үстерү максатында ел саен үткәрелә торган чара. Благовещенск, Россиянең төп чик буе шәһәрләренең берсе буларак, ике ил арасында дустанә элемтәләрне һәм спорт алмашуларын ныгытуга ярдәм итеп, мондый чаралар уздыру өчен уңайлы мәйданчык булып тора.

Фестиваль ярышларны, мастер-классларны, мәдәни чараларны һәм күргәзмәләрне үз эченә ала. Чик буе Кытай шәһәрләреннән һәм төбәкләреннән катнашучыларны күпләп җәлеп итүгә аерым игътибар бирелә, бу туризм һәм спорт алмашуын үстерүгә ярдәм итә. Чаралар Благовещенскның заманча кышкы инфраструктура белән җиһазландырылган спорт ареналарында һәм базаларында уза. Фестивальдә Россия һәм Кытайдан спортчылар, тренерлар, оештыручылар һәм җанатарлар, шул исәптән профессионаллар да, һәвәскәрләр дә катнаша. Уеннарда яшьләргә һәм балалар-яшүсмерләр спортын үстерүгә аерым игътибар бирелә.