Рөстәм Миңнеханов «Шәһәрне төзекләндерү» МУП яңа базасында һәм «Горводзеленхоз» теплицасында булды

Татарстан Рәисе Рөстәм Миңнеханов «Шәһәрне төзекләндерү» МУПның яңартылган җитештерү базасы һәм Казанда «Горводзеленхоз» МУПның яңа теплица комплексы эше белән танышты. Аны Казан мэры Илсур Метшин озата йөрде.

«Шәһәр төзекләндерүе» яңа базасы Воровский урамында урнашкан. Территорияне киңәйтү барлык төп куәтләрне, ремонт хезмәтләрен һәм персонал өчен көнкүреш бүлмәләрен бердәм локациядә тупларга мөмкинлек бирде. Бүген предприятие Авиатөзелеш һәм Яңа Савин районнарының урам-юл челтәренә, Киров һәм Мәскәү районнары территориясенең бер өлешенә хезмәт күрсәтә. Хәзерге вакытта оешма балансында 132 берәмлек махсуслаштырылган техника исәпләнә, шуларның 78е кышкы юлларны карап тотуда катнаша.

Территорияне карау барышында Рөстәм Миңнеханов ремонт блогында, бозлавыкка каршы материалларны саклау өчен склад биналарында, шулай ук административ-көнкүреш корпусында булды. Республика Рәисе хезмәткәрләрнең хезмәт шартларына аерым игътибар бирде. Алар өчен уңайлы чишенү бүлмәләре, душ кабиналары, ял итү һәм ашау бүлмәләре булдырылган. Предприятиеләрдә барлыгы 250ләп кеше эшли.

Аннары визит программасы «Горводзеленхоз» МУП мәйданчыгында дәвам итте, анда Рөстәм Миңнеханов Даурия урамындагы яңа теплицаларны карады. Заманча комплекс ел әйләнәсендә үсемлекләр үстерү өчен тулысынча җайлаштырылган. Объектның проект куәте, шәһәр киңлекләрен яшелләндерү өчен, төрле сорттагы, шул исәптән 1 млн лалә чәчәген дә кертеп, 2 млн га кадәр чәчәк үстерергә мөмкинлек бирә.

Предприятие вәкилләре республика Рәисенә чәчәк атып утырган лаләләе теплицаларны күрсәттеләр һәм җитештерү процессына кертелгән технологик хәл ителешләр турында сөйләделәр. Алар арасында - климатка идарә итүнең автоматлаштырылган системасы, яктырту, тамчылап су сибү һәм үсемлекләрне үстерү шартларын яхшырта торган башка технологияләр. Җитештерүдә шулай ук персонал өчен уңайлы һәм имин шартлар тудырылган. Моннан тыш, Рөстәм Миңнехановка муниципаль предприятиенең киләчәктә механизация базасын яңартуга кагылышлы планнары тәкъдим ителде.