Рөстәм Миңнеханов Һиндстан Республикасының Казандагы беренче Генераль консулы Джейсундхар әфәнде белән очрашты

Бүген Татарстан Республикасы Рәисе Рөстәм Миңнеханов Һиндстан Республикасының Казандагы Генераль консулы Джейсундхар әфәнде белән очрашты.

Кунакны сәламләп, Рөстәм Миңнеханов аңа яңа вазыйфасында уңышлы эшчәнлек теләде.

Искәртәбез, Джейсундхар әфәнде Һиндстан Республикасының Казандагы беренче Генераль консулы. Һиндстанның Генераль консуллыгын ачу икътисадый, сәяси һәм мәдәни элемтәләрне ныгытыр, шулай ук төбәкара хезмәттәшлекне үстерергә ярдәм итәр дип көтелә.

Рөстәм Миңнеханов ассызыклаганча, Татарстан традицион дустанә Россия-Һиндстан мөнәсәбәтләре кысаларында Һиндстан белән хезмәттәшлекне үстерүгә зур әһәмият бирә.

Генераль консулга мөрәҗәгать итеп, Рөстәм Миңнеханов хезмәттәшлекне, икътисадый һәм мәдәни элемтәләрне ныгыту буенча уртак эш уңышлы булачагына ышаныч белдерде. Татарстан-Һиндстан хезмәттәшлеген алга таба үстерү буенча бергәләп эшләячәкбез, диде ул.

Очрашу барышында билгеләп үтелгәнчә, Татарстанның Һиндстан белән хезмәттәшлектә шактый тәҗрибәсе бар. Шулай итеп, Һиндстан төбәкләре белән хезмәттәшлекнең билгеле бер шартнамә-хокукый базасы бар, Татарстан Сәүдә-сәнәгать палатасы белән Һиндстан Сәнәгатьчеләре конфедерациясе арасында килешү гамәлдә.

2025 елның октябрендә Казанда "TIME: Россия –Һиндстан. Үзара нәтиҗәлелек" беренче эшлекле форумы узган иде. Икенче форумга әзерлек һәм аны үткәрү буенча эш алып барыла.

Белешмә өчен:

2024 елның июлендә Мәскәүдә Һиндстан Премьер-министры Моди әфәнде Һиндстанның Казандагы Генераль консуллыгын ачу планнары турында игълан итте, ә 2024 елның октябрендә (БРИКС саммиты кырларында) бу планнар расланды.

2025 елның сентябрендә Джейсундхар әфәнде Һиндстан Республикасының Казандагы Генераль консулы итеп билгеләнде. 2026 елның гыйнварында ул үз вазыйфаларын үтәүгә кереште.