Рөстәм Миңнеханов 2025 елда һөнәри осталык буенча чемпионатларда җиңүчеләр һәм призерлар белән очрашты

Татарстан Рәисе Рөстәм Миңнеханов һөнәри осталык буенча «Профессионаллар» һәм «Абилимпикс» чемпионат хәрәкәтләре, «Архипелаг» пилотсыз авиация системалары буенча илкүләм ярышлар җиңүчеләре һәм призерлары белән очрашты. Очрашу Б.Рәмиев ис. ИТ-паркта узды.

Республика Рәисе чемпионнарны һәм призерларны югары нәтиҗәләре белән котлады, остазларга һәм шәхси үрнәге белән яңа белгечләр аякка басуга ярдәм итүчеләргә аерым рәхмәт белдерде.

Ул билгеләп үткәнчә, ел саен республиканың иң яхшы белгечләре белән очрашулар күркәм традициягә әверелде. "Сезнең һәрберегез үз хезмәте һәм тырышлыгы белән чын профессионализм, сайлаган юлына тугрылык һәм югары нәтиҗәләргә ирешү сәләте үрнәге күрсәтә. Сезнең тырышлыгыгыз, тәҗрибәгез һәм үҗәтлегегез нәтиҗәсендә Татарстан, дөньякүләм дәрәҗәдәге кадрлар әзерләргә сәләтле көчле һәм конкуренциягә сәләтле төбәк репутациясен раслап, теләсә кайсы дәрәҗәдәге ярышларда үз позицияләрен уңышлы яклауны дәвам итә», - диде Рөстәм Миңнеханов.

2025 елда татарстанлылар «Абилимпикс» чемпионатында 69 медаль яуладылар, гомумкоманда зачетында 2 нче урынны алдылар, шулай ук «Профессионаллар» хәрәкәтендә 243 медаль һәм 72 медальон алдылар. Моннан тыш, республика вәкилләре, «Архипелаг» ярышларында беренче команда урынын яулап, Россиядә иң яхшы дрон операторлары булдылар.

"Сезнең һәр бүләгегез - бөтен республиканың уңышы. Сезнең казанышлар яшьләр өчен якты ориентир булып хезмәт итә, аларны һөнәри күнекмәләрен үстерергә һәм яңа үрләргә омтылырга рухландыра. Мондый мөһим вакыйгаларда катнашу белгечләрнең яңа буынын формалаштыра, алар сәнәгать, фән һәм җәмгыять алдында торган амбициоз бурычларны хәл итәргә әзер. Татарстан киләчәктә дә чемпионат хәрәкәтләренә ярдәм итүен һәм аларның югары стандартларын мәгариф һәм җитештерү практикасына кертүен дәвам итәчәк", - дип мөрәҗәгать итте Рөстәм Миңнеханов тантанада катнашучыларга.

Ул билгеләп үткәнчә, республикадан чемпионатта катнашучы талантлы кешеләр саны даими рәвештә арта бара. Россия Президенты кушуы буенча узган елның июлендә Казанда «Абилимпикс» махсус хәрби операциясендә катнашучылар арасында беренче чемпионат узды. Шулай ук Татарстан ветераннары Мәскәүдә узган илкүләм чемпионатта республиканы лаеклы тәкъдим иттеләр, 11 медаль яуладылар. "Хөрмәтле ветераннар! Без сезнең уңышларыгыз белән горурланабыз һәм яшьләргә күрсәткән үрнәгегез өчен рәхмәт белдерәбез. Ышанам ки, сезнең казанышлар республика һәм ил файдасына булачак җиңүләр өчен ныклы нигез булыр», - дип ассызыклады республика Рәисе.

Аннары Рөстәм Миңнеханов дәүләт бүләкләре тапшырды. Татарстан Республикасының «Фидакарь хезмәт өчен» медале белән Казан педагогика көллияте директоры урынбасары, «Мәктәпкәчә тәрбия» компетенциясе буенча эксперт Эльмира Ульянова, шулай ук «Россия кооперация университеты» РФ Үзәк бергәлегенең Казан кооператив институты (филиалы) әйдәп баручы белгече, «Визуаль мерчендайзинг» компетенциясе буенча эксперт Вероника Сафина бүләкләнде. Моннан тыш, ТР Рәисе рәхмәтенә мәгариф оешмалары җитәкчеләре, экспертлар һәм остазлар лаек булды.

Ярышларда катнашудан алган тәэсирләре турында «Башкару осталыгы (Вокал)» компетенциясендә «Абилимпикс» илкүләм чемпионаты җиңүчесе Азалия Яфясова һәм «Фотограф» компетенциясендә МХОдә катнашучылар арасында «Абилимпикс» илкүләм чемпионаты җиңүчесе Руслан Харрасов сөйләде.

Татарстанда «Абилимпикс» хәрәкәте 2016 елдан бирле актив үсеш кичерә. Төп максат - сәламәтлек мөмкинлекләре чикләнгән кешеләрнең социаль инклюзиясен үстерү, аларның һөнәри ориентациясе, үзбилгеләнүе, үз-үзләрен үстерү, шулай ук аларның хезмәт мәшгульлегенә ярдәм итү. 2025 елның июлендә Казанда МХОдә катнашучылар арасында һөнәри осталык буенча беренче «Абилимпикс» чемпионаты узды.

Һөнәри осталык буенча «Профессионаллар» бөтенроссия чемпионаты хәрәкәте, Россиянең WorldSkills әгъзалыгы вакытында тупланган тәҗрибәне исәпкә алып, 2023 елда булдырылган. Бу икътисад тармакларын кадрлар белән тәэмин итүгә ярдәм итүне максат итеп куйган ярыш чаралары.

"Архипелаг" проект-белем бирү интенсивы пилотсыз системалар технологияләрен үстерүгә һәм бу өлкәдә белгечләргә ярдәм итүгә юнәлә.