Татарстан Хөкүмәте Йортында Гадәттән тыш хәлләрне кисәтү һәм бетерү, янгын куркынычсызлыгын тәэмин итү комиссиясе утырышы узды

Бүген ТР Хөкүмәте Йортында Татарстан Республикасы Гадәттән тыш хәлләрне кисәтү һәм бетерү, янгын куркынычсызлыгын тәэмин итү комиссиясе узды. Утырышны комиссия рәисе урынбасары – Татарстан Республикасы Премьер-министрының беренче урынбасары Рөстәм Нигъмәтуллин үткәрде.

Видеоконференцэлемтә режимында узган утырышта шәһәр округлары һәм муниципаль районнар комиссияләре рәисләре һәм әгъзалары, оешмалар җитәкчеләре катнашты.

Төп тема - халыкның иминлеген тәэмин итүгә, Яңа ел һәм Раштуа бәйрәмнәрен, мәктәпләрдә кышкы каникулларны уздыру чорында тормыш тәэмин итү системаларының тотрыклы эшләвенә юнәлдерелгән өстәмә чаралар.

Утырыш барышында билгеләп үтелгәнчә, ТР Министрлар Кабинеты карары (22.12.2025 № 1121) белән 2025 елның 25 декабреннән 2026 елның 11 гыйнварына кадәр республика территориясендә янгынга каршы махсус режим кертелгән. Бу документта кешеләр күпләп була торган урыннарда, шулай ук пиротехник әйберләр җитештерү, саклау һәм сату урыннарында Яңа ел бәйрәм чараларына әзерлек һәм аларны уздыру чорында янгын куркынычсызлыгын тәэмин итү буенча чаралар комплексы билгеләнгән.

Рөстәм Нигъмәтуллин ассызыклаганча, Яңа ел бәйрәмнәре - зур куркыныч чоры. Статистика күрсәткәнчә, бу вакытта көнкүреш һәлакәтләре һәм аварияләр саны кискен арта, еш кына куркынычсызлык кагыйдәләрен санга сукмау - пиротехниканы контрольсез куллану һәм электр приборларын караусыз калдыру аркасында.

Утырыш барышында социаль өлкә, мәдәният һәм мәгариф объектларының янгын куркынычсызлыгын тәэмин итү мәсьәләләрен карарга тәкъдим ителә, диде Рөстәм Нигъмәтуллин һәм барлык җитәкчеләрдән үз чыгышларында идарә органнарының, көчләрнең һәм чараларның, шулай ук ведомство буйсынуындагы объектларның бәйрәмнәргә әзерлегенә бәя бирүләрен сорады.

«Татарстан Республикасы Гидрометеорология һәм әйләнә-тирә мохитне мониторинглау идарәсе» ФДБУнең Гидрометеорология үзәге башлыгы Феликс Гоголь Яңа ел бәйрәмнәрендә һәм мәктәпләрдә каникулларында метеорологик хәл үсеше фаразын тәкъдим итте. Ул, аерым алганда, хәбәр иткәнчә, каникулларда уртача температура климат нормасы чикләрендә көтелә. Якындагы көннәрдә, шул исәптән 31 декабрьдә кар явуы көтелә, кайбер районнарда - йомшак буран, минималь температура – минус 8 - минус 12 градус Цельсий буенча.

Яңа ел бәйрәм чараларын уздыру объектларының янгын куркынычсызлыгы торышы һәм пиротехник чаралардан файдалану турында Баш идарә башлыгы урынбасары - Россия Гадәттән тыш хәлләр министрлыгының ТР буенча Баш идарәсенең күзәтчелек эшчәнлеге һәм профилактика эше идарәсе башлыгы Максим Трущин сөйләде.

Ул хәбәр иткәнчә, 2025 елның 30 декабренә булган мәгълүматларга караганда, республика территориясендә 3735 янгын теркәлгән, аларда 128 кеше һәлак булган, 172 кеше төрле дәрәҗәдәге тән җәрәхәтләре алган. Янгыннар кимүгә карамастан, кешеләр үлеме 13 очракка арткан.

Максим Трущин хәбәр иткәнчә, бәйрәм алды һәм Яңа ел бәйрәме көннәрендә янгыннарга бәйле вәзгыять ел саен катлаулана. Бүген иртә таңнан Зеленодольск районы Васильево бистәсендә шәхси торак йортта янгын чыккан, аның нәтиҗәсендә өч кеше, шул исәптән 2011 елгы бала һәлак булган. Янгын чыккан вакытта яшәүчеләрнең барысы да уяу хәлдә булган, янгында кешеләр янгынны мөстәкыйль сүндерү аркасында һәлак булганнар.

Уртача алганда, ел саен Яңа ел һәм бәйрәм көннәрендә 100дән артык янгын була, аларда өч һәм аннан да күбрәк кеше һәлак була, 10 һәм аннан да күбрәк кеше җәрәһәтләнә, шул ук вакытта янгыннар саны гадәти көннәр белән чагыштырганда 20%ка арта, диде Максим Трущин.

2024-2025 елның Яңа ел бәйрәм көннәрендә Татарстанда янгыннарның төп сәбәпләре арасында электр җайланмаларын техник файдалану кагыйдәләрен бозу - 39,3%, ут белән саксыз эш итү - 30,3%, җылыту мичләренең һәм төтен чыгару юлларының дөрес төзелмәве - 23,4%. Кешеләр күп була торган объектларда һәм торак секторда янгын чыгу куркынычына бәйле рәвештә оештыру һәм гамәли чаралар комплексы планлаштырылган һәм гамәлгә ашырыла, дип ассызыклады Максим Трущин.

Россия Гадәттән тыш хәлләр министрлыгының ТР буенча Баш идарәсе һәм Татарстан Республикасы Гадәттән тыш хәлләр министрлыгы көчләре һәм чаралары 2025 елның 30 декабреннән 2026 елның 12 гыйнварына кадәр хезмәт итүнең көчәйтелгән вариантына күчерелә, хәрби расчетлар көчәйтелә. Тәүлек буе эшләүче режимда 1000 берәмлектән артык техника җәлеп итеп, 2000 хезмәткәр эшли.

Мәгариф объектларының бәйрәм чараларын уздыруга әзерлеге турындагы мәгълүмат белән ТР мәгариф һәм фән министры урынбасары Андрей Рюхов чыгыш ясады.

Социаль объектларның бәйрәм чараларына әзерлеге турында Татарстан Республикасы хезмәт, халыкны эш белән тәэмин итү һәм социаль яклау министрының беренче урынбасары Рөстәм Вәлиуллов сөйләде.

Мәдәният объектларының бәйрәм чараларына әзерлеге турында ТР мәдәният министры урынбасары Ленар Хәкимҗанов сөйләде.