ТР Хөкүмәте Йортында бәйрәмнәр вакытында юл хезмәтләренең һәм торак-коммуналь өлкәнең өзлексез эшләвен тәэмин итү мәсьәләләре буенча брифинг узды

ТР Хөкүмәте Йортында Яңа ел каникуллары вакытында юл хезмәтләренең һәм торак-коммуналь өлкәнең өзлексез эшләвен тәэмин итү мәсьәләләре буенча брифинг узды.

Бәйрәмнәр вакытында күп фатирлы йортларны җылылык белән тәэмин итүгә аерым игътибар биреләчәк, дип сөйләде ТР төзелеш, архитектура һәм торак-коммуналь хуҗалык министрының беренче урынбасары Дамир Шәйдуллин. "Барлык җылылык белән тәэмин итүче һәм җылылык челтәре оешмалары җылылык чорына әзерлек актлары алды. Хәзер җылы бирү сезоны штат режимында уза. Киләчәктә дә кулланучыларны җылылык белән тәэмин итү проблемасына тап булмабыз дип өметләнәбез", - дип белдерде ул.

Торак-коммуналь хуҗалык оешмаларыннан тыш, «Татлизинг» предприятиесе дә әзерлек режимында. Аның базасында авария-техник материаллар һәм җайланмалар запасы бар, дип өстәде министрның беренче урынбасары. Аның сүзләренә караганда, предприятиедә гомуми егәрлеге 645 кВт булган 10 берәмлек дизель-генератор, кран-манипуляторлы КАМАЗ шассисында өч берәмлек автотехника, биш яктырту мачтасы һәм 2,5 МВт һәм 3,5 МВт егәрлекле ике мобиль котельный җайланмасы бар.

"Барлык котельныйларның да резерв туклану чыганаклары бар. Кайбер котельныйлар мазут ягулыгында эшли. Ягъни һәр котельныйда туклануның резерв чыганагы бар", - диде спикер.

Татарстанда барлыгы 1,2 меңнән артык оешма торак-коммуналь хезмәтләр күрсәтә. «Алар барысы да ял һәм бәйрәм көннәрендә өзлексез һәм сыйфатлы хезмәт күрсәтү өчен тиешле эш башкардылар", - дип ассызыклады Дамир Шәйдуллин.

Татарстан Төзелеш, архитектура һәм торак-коммуналь хуҗалык министрлыгында тәүлек буе эшләүче диспетчерлык хезмәте оештырылган, аңа 8 (843) 231-14-10 номеры буенча шалтыратырга мөмкин. Хезмәт гражданнарның мөрәҗәгатьләренә оператив җавап бирә, авария хәлләренә мониторинг үткәрә һәм аларны бетерә.

Бәйрәм көннәрендә ишегалларын кардан чистартуга һәм чүп-чарны вакытында чыгаруга аерым игътибар биреләчәк. "Яңа ел бәйрәмнәре чорында көнкүреш калдыклары барлыкка килү арта. Республикада авыл җирлекләре территорияләреннән чүп-чар чыгаручы ике төбәк операторы эшли", - дип сөйләде Дамир Шәйдуллин.

Төбәк операторлары җирле үзидарә органнары белән бергә хәлне контрольдә тотучы нәүбәт тотучы хезмәтләр оештырды, дип ассызыклады төзелеш, архитектура һәм торак-коммуналь хуҗалык министрының беренче урынбасары. Аның сүзләренчә, шәхси автотранспорт ишегалларыннан чүп-чарны вакытында чыгаруга һәм махсус техника белән ишегалды территорияләрен кардан чистартуга комачауламаска тиеш.

"Идарәче компанияләр кар күп яуган чорда ишегалларын чистарту буенча күп кыенлыклар кичерә, әгәр ишегалларына машиналар күп куелган булса. Мондый очрактакардан чистарту сыйфатлы булмый. Чүп чыгару буенча да шундый ук хәл. Диспетчерлык хезмәтләре реаль вакыт режимында чаралар күрү өчен мәгълүмат җыя. Идарәче компанияләр, торак милекчеләре ширкәтләре белән хезмәттәшлек итәләр, шул исәптән йорт чатлары ярдәмендә, яшәүчеләр автомобильләрне вакытлыча алып куя алсыннар өчен», – диде Дамир Шәйдуллин.

Юл хезмәтләре дә кышкы чорда эшләргә әзер. Төбәк юлларында кар чистарту һәм бозлавыкка каршы материалларны чәчү өчен 1,1 мең берәмлектән артык махсус транспорт әзерләнгән, дип хәбәр итте ТР транспорт һәм юл хуҗалыгы министры урынбасары Ранис Фәйзуллин. "Подряд оешмалары техниканың торышын күзәтә, шуңа күрә ул вакытында яңартыла. Подряд оешмаларының җитештерү базаларында ягулык запасы бар. Ягулык-майлау материалларын тәэмин итү проблемалары булмаячак", - дип белдерде ул.

Бозлавыкка каршы материал тулы күләмдә әзерләнгән, дип өстәде транспорт һәм юл хуҗалыгы министры урынбасары. «Кышкы чорда төбәк автомобиль юлларын карап тоту өчен 727 мең тонна ком-тоз катнашмасы һәм техник тоз әзерләнде, федераль юллар өчен – 200 мең тоннага якын, җирле автомобиль юллары өчен – 190 мең тоннага якын», – дип төгәлләштерде ул.

Юл вәзгыяте метеостанцияләр ярдәмендә контрольдә тотыла. Аерым алганда, 44 комплекс федераль трассаларда һәм 39 комплекс төбәк автомобиль юлларының терәк челтәрендә эшли. Шулай ук «Диспетчерлык, мониторинг һәм идарә үзәге» эшли, аның хезмәткәрләре юллардагы хәлне онлайн-режимда бәяли, дип сөйләде Р. Фәйзуллин.

«Кышкы чорда куркыныч метеорологик күренешләр аркасында Татарстанда автомобиль юлларын бозуга китерергә мөмкин булган гадәттән тыш хәлләр килеп чыкканда оператив җавап бирү өчен министрлыклар, ведомстволар һәм оешмаларның үзара хезмәттәшлек планы – "Буран" расланды, – диде ул.

Министр урынбасары сүзләренчә, подряд оешмаларының машина йөртүчеләр өчен сигез җылыту пункты бар. Моннан тыш, 59 җылыту пункты автомобиль юлларына иң якын торак пунктлар белән янәшә урнашкан. «Тоткарлыклар очрагында машина йөртүчеләр һәм пассажирлар бу пунктларга подряд оешмаларының бөтен җирдә йөри алучы транспортында китереләчәк", - дип ассызыклады ул. ТР

Транспорт министрлыгында тәүлек буе оператив хезмәт эшли. Юлларда штаттан тыш хәлләр килеп чыкса, машина йөртүчеләр 8 (843) 291-91-91 телефоны буенча шалтырата алалар.

1 ноябрьдән үк инде юлчылар, һава шартларының үзгәрүенә оператив җавап бирү өчен, көндезге һәм төнге кизү торуны оештырдылар, дип өстәде «Главтатдортранс» директоры урынбасары Зөлфәт Ханмурзин. Идарәдә шулай ук тәүлек буе эшли торган диспетчерлык хезмәте эшли, ул татарстанлылардан юллардагы хәлләр турында 8 (843) 291-91-91 телефоны буенча мөрәҗәгатьләр кабул итә.

"Нигездә кышкы чорда була торган юл-транспорт һәлакәтләре транспортның каршы як полосага чыгуы яки машина юлыннан кюветка төшүе белән бәйле», - диде З. Ханмурзин.

Аварияләрне булдырмас өчен, ул машина йөртүчеләрне юл хәрәкәте кагыйдәләрен төгәл үтәргә өндәде. «Тизлекне һәм дистанцияне исәпләргә кирәк, хәрәкәт иткәндә күрү зонасы тәэмин ителергә тиеш», – дип ассызыклады ул.

Татарстанда федераль автомобиль юлларына хезмәт күрсәтү өчен бозлавыкка каршы материал алдан ук 165 мең тонна күләмендә әзерләнгән. Бүгенгә инде 52 мең тонна, ягъни гомуми күләмнең 32% ы тотылган, дип сөйләде «Идел-Вятскуправтодор» башлыгы урынбасары Азат Гатауллин. "Федераль юлларда нигездә бозлавыкка каршы материалның ике төре – ком-тоз катнашмасы һәм чиста тоз кулланыла. Федераль юлларда барлыгы 336 берәмлек юл-эксплуатация техникасы эшли", - дип хәбәр итте ул.

А. Гатауллин сүзләренчә, трассаларны чистартуга чыга торган техника саны һава торышына һәм юл шартларына бәйле. "Автомобиль юллары челтәренең, шул исәптән юл метеостанцияләренең һәм трассаларда урнаштырылган видеокомплексларның торышына оператив контроль алып барыла. Автоюл участокларын патруль йөреп чыгуы оештырыла. Кирәк булганда кар ява башлаганчы ук юл өслеге бозлавыкка каршы материаллар белән эшкәртелә", - диде ул.

Республикада федераль автомобиль юлларында шулай ук кар күп төшә торган кишәрлекләр ачыкланды. Шундый 22 участокта җиде километрга якын кар тоткарлаучы койма урнаштырылган. «56 чакрым маен кар тоткарлаучы траншеялар формалаштырачакбыз", - дип ассызыклады А. Гатауллин.

Ул машина йөртүчеләрне начар һава шартларында юлларда аеруча игътибарлы булуларын һәм юл хәрәкәте кагыйдәләрен төгәл үтәүләрен сорады.

Яңа ел бәйрәмнәрендә юл төзүчеләр тәүлек буе эшләячәк. Моннан тыш, диспетчерлык хезмәтенең тәүлек буе кизү торуы оештырылган. Федераль юлларда катлаулы хәлләр килеп чыкса, машина йөртүчеләр 8 (843) 273-54-08 телефоны буенча шалтырата алалар.