Рөстәм Миңнеханов Оман Солтанлыгының Дин эшләре һәм вакыфлар министры шәех Мөхәммәд бән Сәид Әл Мәмәри белән очрашты

Бүген Татарстан Республикасы Рәисе Рөстәм Миңнеханов Оман Солтанлыгының Дин эшләре һәм вакыфлар министры шәех Мөхәммәд бән Сәид Әл Мәмәри белән очрашты.

Очрашу ТР Хөкүмәте Йортында узды.

Оман Солтанлыгының Дин эшләре һәм вакыфлар министры доктор Мөхәммәд бин Сәид Әл Мәмәри Татарстанга Россия Федерациясенә визиты кысаларында килде.

Кунакны сәламләп, Рөстәм Миңнеханов Оман Солтаны Галиҗәнап Хәйсам Бен Тарик Әл Сәиднең Россиягә дәүләт визиты кысаларында (агымдагы елның апрелендә) югары дәрәҗәдәге сөйләшүләрдә катнашуына чын күңелдән шат булуын белдерде.

Моннан тыш, быел май аенда мин Оманга сәфәр кылдым, диде Рөстәм Миңнеханов.

Татарстан белән Оман арасында товар әйләнеше турында сөйләгәндә, Рөстәм Миңнеханов билгеләп үткәнчә, саннар аз, әмма хезмәттәшлек өчен потенциал бик зур.

Очрашу барышында ул ассызыклаганча, Татарстан бүгенге көндә Россия Федерациясенең ислам дөньясы белән багланышлар үзәге булып тора.

Рөстәм Миңнеханов фикеренчә, элемтәләрне ныгыту өчен үзара визитлар, эшлекле даирәләр очрашуларын оештыру мөһим.

Казанда ел саен уздырыла торган «Россия – Ислам дөньясы: Kazanforum» халыкара икътисадый форумы танышу өчен нәтиҗәле мәйданчык булып тора, диде ул.

Оман Солтанлыгының Дин эшләре һәм вакыфлар министры доктор Мөхәммәд бин Сәид Әл Мәмәри ведомствосы алып барган эш турында сөйләде, шул исәптән халыкара дәрәҗәдә дә.

Белешмә өчен:

2025 елның 29 ноябрендә Казанда Оман Солтанлыгының бай рухи һәм мәдәни мирасына багышланган «Гомумкешелек кыйммәтләре хакына: Оманда үзара аңлашу, күршелек һәм тынычлык традицияләре» халыкара күргәзмәсен ачу тантанасы узачак. Чараны Россия Федерациясе мөселманнары Диния нәзарәте һәм Оман Солтанлыгының Дин эшләре һәм вакыфлар министрлыгы оештыра.