Рөстәм Миңнеханов Казанда яңартылган Мәскәү базарында булды

Бүген Татарстан Республикасы Рәисе Рөстәм Миңнеханов Казанның яңартылган Мәскәү базарында булды.

Мәскәү базарында реконструкция үткәрелгән, ул барлык системаларны яңартуга кагыла: коммуникацияләр алыштырылган, антресольләр ныгытылган һәм киңәйтелгән, витраж пыяла һәм гөмбәз өслеге алыштырылган. Бинада заманча вентиляция һәм кондиционер системасы урнаштырылган. Шулай ук сәүдә витриналары урнаштырылган, склад бүлмәләре модернизацияләнгән һәм яңа ветеринария лабораториясе җиһазландырылган.

Базар 2025 елның 20 маенда тест режимында ачылган. Биредә амфитеатр һәм җәмәгать теплицасы, урам ярминкәсе һәм беренче яңартылган павильоннар барлыкка килгән, үз парковкасы ачылган. Җәй буена базарда балалар һәм өлкәннәр өчен йөздән артык вакыйга уздырылган, ә Мәскәү базарына йөзләрчә мең кеше килгән.

Бүген Рөстәм Миңнеханов һәм аны озата йөрүче затлар яңа павильоннарны, базар бинасын карады.

Рөстәм Миңнеханов белән бергә базарның яңартылган территориясен һәм сәүдә павильоннарын Казан мэры Илсур Метшин, Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Җәббаров, Татарстан Республикасы төзелеш, архитектура һәм ТКХ министры Марат Айзатуллин, «Татарстан Республикасы шәһәрләрен үстерү институты» фонды директоры Наилә Зиннәтуллина һәм башкалар бәяләде.

Рөстәм Миңнеханов сатучылар белән аралашты – аяк киеме олтаннары өчен киселгән киезнең сыйфатын бәяләде, мунчалар өчен күрше төбәктән китерелгән имән һәм каен себеркеләренең ассортиментын өйрәнде, шулай ук атланмай, сыр продукциясе, бал һәм җиләк-җимеш прилавкаларын карады. Аннары экскурсия ит рәтләре буйлап дәвам итте, анда хәләл продукция тәкъдим ителгән иде.

Татарстан Рәисе һәм Казан мэры шулай ук мичтән пешерлегән кабартмадан авыз иттеләр һәм шәһәр бистроларының гастрокластеры (2 кат) белән таныштылар, «Истәлекләр лабораториясе» интерактив зонасында булдылар.