Рөстәм Миңнеханов Халыкара укытучылар көне уңаеннан үткәрелгән тантанада: Сезнең һөнәрегез - игелек, фидакарьлек һәм күңел юмартлыгын таләп итүче чын һөнәр

Бүген Татарстан Республикасы Рәисе Рөстәм Миңнеханов Халыкара укытучылар көненә багышланган тантаналы чарада катнашучыларга сәламләү сүзе белән мөрәҗәгать итте.

Тантана Казанда, «Корстон» КСКК мәйданчыгында узды һәм театральләштерелгән пролог белән ачылды.

Россия Мәгариф министры Сергей Кравцовның Укытучылар көне белән видеокотлавы күрсәтелде. "Мәктәп - ул гомер нигезе. Нәкъ менә монда характер салына, талантлар ачыла һәм хыяллар туа. Һәм мәктәпнең үзәгендә һәрвакыт сез – безнең укытучыларыбыз торасыз. Сезнең миссиягез гаять мөһим һәм затлы. Сез белем генә бирмисез, сез фикер йөртергә, хис итәргә, кайгыртырга, җаваплы һәм намуслы булырга өйрәтәсез. Сез - һәр балага тормышта үзенең уникаль юлын табарга ярдәм итүчеләр. Без укытучы һөнәренә карата ихтирамның артуын, мәктәпләргә үзебезнең илдә белем бирүнең иң яхшы традицияләрен дәвам итәргә әзер булган якты, талантлы белгечләрнең килүен күрәбез. Быел педагогика югары уку йортларына рекордлы конкурс – бер урынга 12 кеше. Бу сезнең уртак казанышыгыз, чөнки нәкъ менә сезнең зирәклегегез һәм сабырлыгыгыз яңа буын педагоглар өчен иң яхшы үрнәк булып тора", - диелә котлау текстында.

Педагогларны һөнәри бәйрәмнәре белән котлап, Рөстәм Миңнеханов укытучының хезмәтенә тирән рәхмәтен белдерде. «Сезнең һөнәрегез - игелек, фидакарьлек һәм гаять зур рухи юмартлык таләп итә торган чын вазыйфа, - диде ул. - Нәкъ менә сез балаларга үз-үзләренә ышанырга һәм тормышта үз юлын табарга ярдәм итәсез, һәр кешенең киләчәге төзелә торган белем һәм әхлакый кыйммәтләрнең ныклы нигезен саласыз». Рөстәм Миңнеханов билгеләп үткәнчә, мәгариф системасын үстерү республикада абсолют өстенлекле юнәлеш булды һәм шулай булып кала да.

«Без белем бирү һәм укыту өчен заманча һәм уңайлы шартлар тудыру буенча эзлекле эшне дәвам итәбез: яңа мәктәпләр һәм бакчалар төзибез, матди-техник базаны яңартабыз, педагогларга социаль ярдәм күрсәтүгә юнәлдерелгән инициативаларны кертәбез», - диде ул.

Татарстан чираттагы мәртәбә Бөтенроссия укучылар олимпиадасында җиңүчеләр һәм призерлар саны буенча Россия мәгарифе лидерларының берсе статусын раслады.

"Олимпиадага әзерлек педагоглары командасы безнең егетләргә республиканы Россия дәрәҗәсендә һәм халыкара мәйданда лаеклы тәкъдим итәргә мөмкинлек бирә, - дип билгеләп үтте ТР Рәисе. - Укучыларның һәр зур казанышында остазларының ифрат зур хезмәте тора. Сезгә чын күңелдән рәхмәт белдерәм. Без сезгә бик рәхмәтлебез".

Быел Россиядә һөнәри белем бирү системасы төзелүнең 85 еллыгы билгеләп үтелә. Республикада дөнья дәрәҗәсендәге 49 ресурс үзәгеннән торган челтәр булдырылды, алар хезмәт базарында аеруча кирәкле һөнәрләр буенча белгечләр әзерлиләр.

"Республика техникумнары һәм көллиятләре педагогларын һәм осталарын котлыйм! Татарстан предприятиеләрендә эшләүче һәм аның иминлеген һәм чәчәк атуын билгеләүче профессиональ кадрларның сыйфаты нәкъ менә сездән тора. Мәгариф системасының чын байлыгына әверелгән педагогик хезмәт ветераннарына, укытучылар династияләренә аерым рәхмәт сүзләремне җиткерәсем килә. Сезнең зирәклегегез, тәҗрибәгез һәм һөнәргә бирелгәнлегегез сезне чын остаз итә», – диде Рөстәм Миңнеханов, педагогларга мөрәҗәгать итеп.

"Сезнең мөһим һәм бик кирәкле хезмәтегез өчен иң ихлас рәхмәт сүзләрен кабул итегез. Сезгә һәм якыннарыгызга нык сәламәтлек, күңел җылысы, бәхет һәм иминлек телим. Кадерле дуслар! Бәйрәм белән котлап, сезгә сәламәтлек; имин тормыш; зур казанышлар телим. Бәйрәм котлы булсын! Укытучылар көне белән!",- дип теләде Татарстан Рәисе республика укытучыларына, остазларына, педагогларына.

Татарстан Республикасы дәүләт бүләкләре тапшырылды.

Укытучыларны һөнәри бәйрәмнәре белән ТР мәгариф һәм фән министры Илсур Һадиуллин котлады.

Чара Татарстан Республикасы сәнгать осталары концерты белән дәвам итте.

«Татарстан Республикасының халык укытучысы» мактаулы исеме: Фазылова Резеда Фәтхерахман кызы – Татарстан Республикасы Мамадыш муниципаль районының Өчәли урта гомуми белем бирү мәктәбе рус теле һәм әдәбияты укытучысы; Красноперова Татьяна Алексеевна – «Муса Җәлил исемендәге Минзәлә педагогика көллияте» ДАҺБУ педагогика һәм психология укытучысы.

Татарстан Республикасының «Ана даны – Материнская слава» медале: Нуриманова Илүзә Флүс кызы – Татарстан Республикасы Актаныш муниципаль районының Яңа Әлем балалар бакчасы тәрбиячесе, Яңа Әлем авылында биш бала анасы.

«Татарстан Республикасы алдындагы казанышлары өчен» Татарстан Республикасы ордены медале: Вәлиуллина Рузалия Хәбибулла кызы – «Лаеш балалар йорты» ятим балалар һәм ата-ана тәрбиясеннән мәхрүм калган балалар өчен дәүләт учреждениесе директоры;

Скиргайло Тамара Осиповна – педагогика фәннәре докторы, «Татарстан Республикасы Мәгарифне үстерү институты» өстәмә һөнәри белем бирү дәүләт мәгариф учреждениесенең педагогика һәм мәгариф идарәсе кафедрасы профессоры.

Шуны да искәртик: тантаналы чаралар башланганчы Татарстан Рәисе Рөстәм Миңнеханов Казанның Подлужная урамындагы 49 нчы йортта Укытучы йортын карап чыкты. Бина мәдәни мирас объекты булып тора (1900 елда төзелгән), оригиналь кирпечтән өлешчә файдаланып реконструкцияләнгән. Объектны Казан мэры Илсур Метшин һәм ТР мәгариф һәм фән министры Илсур Һадиуллин тәкъдим итте.