Рөстәм Миңнеханов 2026 елда «Россия – Ислам дөньясы: KazanForum» халыкара форумына әзерлек буенча оештыру комитеты утырышында катнашты

Без үзебезнең һәм чит ил коллегаларыбызның «Россия – Ислам дөньясы: KazanForum» халыкара икътисадый форумы белән кызыксынуын күрәбез, ул илебез белән ислам дөньясының очрашу, диалог һәм хезмәттәшлек итү урыны булырга тиеш.

Бу хакта бүген Татарстан Республикасы Рәисе Рөстәм Миңнеханов «Россия – Ислам дөньясы: KazanForum» халыкара икътисадый форумына әзерлек һәм аны уздыру буенча оештыру комитеты утырышында белдерде.

Чара Мәскәүдә узды, аны Россия Федерациясе Хөкүмәте Рәисе урынбасары, оештыру комитеты рәисе Марат Хөснуллин алып барды. Видеоконференцэлемтә режимында уздыру урынына җаваплы ведомстволар, министрлыклар, Россиянең кайбер төбәкләре тоташтырылды.

Оештыру комитетында катнашучыларга кереш сүз белән Марат Хөснуллин мөрәҗәгать итте.

Форумның оештыру комитеты рәисе урынбасары Рөстәм Миңнеханов 2025 елда «Россия – Ислам дөньясы: KazanForum» XVI халыкара икътисадый форумын уздыру нәтиҗәләре, шулай ук Татарстан Республикасының 2026 елда форумны уздыруга әзерлеге турында хәбәр итте.

Рөстәм Миңнеханов, аерым алганда, форумга үзгәрешсез ярдәм иткәннәре өчен Россия Федерациясе Президенты В.В. Путинга, ил Хөкүмәтенә, Росконгресс фондына, федераль башкарма хакимият органнарына, оештыру комитеты әгъзаларына 2025 елда форумны уңышлы оештырганнары өчен рәхмәт белдерде.

«Без үзебезнең һәм чит ил коллегаларыбызның Казан мәйданчыгы белән кызыксынуын күрәбез, ул илебез белән ислам дөньясының очрашу, диалог һәм хезмәттәшлек итү урыны булырга тиеш, - диде Рөстәм Миңнеханов. - Быел KazanForum да дөньяның 96 иленнән, Россиянең 82 субъектыннан, халыкара институтлардан вәкилләр катнашты – шул исәптән Ислам хезмәттәшлеге оешмасы, Гарәп дәүләтләре лигасы, Бөтендөнья ислам лигасы».

Форум кысаларында ике йөздән артык чара узды; меңгә якын спикер катнашында 148 сессия, 130дан артык килешү имзаланды, шул исәптән - 75 халыкара һәм 56 Татарстан Республикасыннан.

Чараларны 20 илдән 500дән артык массакүләм мәгълүмат чарасы яктыртты. Форум кысаларында сигезенче тапкыр «Russia Halal Expo» халыкара күргәзмәсе узды.

Ислам хезмәттәшлеге оешмасы илләре мәдәният министрларының «Мәдәниятләр диалогы – күп поляр дөньяда тәңгәллекне һәм төрлелекне саклау нигезе" пленар утырышы әһәмиятле чараларның берсе булды. 17 әгъза дәүләт вәкилләре глобальләшү шартларында мәдәни тәңгәллек һәм үзара хезмәттәшлекнең актуаль мәсьәләләре буенча фикер алыштылар.

Рөстәм Миңнеханов искәткәнчә, 2026 елда булачак KazanForum Казанның ислам дөньясының мәдәни башкаласы статусын алуы кысаларында узачак. Бу хакта карарны Ислам хезмәттәшлеге оешмасы илләре министрлары Согуд Гарәбстанында Ислам хезмәттәшлеге оешмасы мәдәният министрларының 13 нче конференциясендә кабул итте.

Татарстан Республикасы Рәисе әлеге вакыйга KazanForum көн тәртибендә һәм «Россия – Ислам дөньясы» стратегик караш төркеме утырышында чагылыш табарга тиеш, дигән фикер белдерде.

Аннары оештыру комитеты әгъзалары киләсе елда форумны үткәрү даталары, форумның эшлекле программасын эшләү һ. б. мәсьәләләр буенча фикер алыштылар.

Уртак тырышлык белән булачак KazanForum гадәттәгечә югары һәм лаеклы дәрәҗәдә оештырылачак, дип билгеләп үтелде.