«Батырлар. Татарстан Геройлары» МХО ветераннарын яңадан һөнәри әзерләү программасының беренче модуле старт алды

Махсус хәрби операция ветераннары өчен республикада «Батырлар. Татарстан Геройлары" дигән колачлы мәгариф проекты гамәлгә ашырыла.

502 академик сәгать күләмендә яңадан һөнәри әзерлек программасы буенча уку МХО ветераннарына яңа квалификация турында диплом, шулай ук дәүләт хакимияте органнарында, җирле үзидарә органнарында, дәүләт секторының башка оешмаларында эшләү өчен кирәкле белем, күнекмәләр алырга мөмкинлек бирәчәк. Укыту программасы Татарстан Республикасы Рәисе каршындагы Дәүләт хезмәте һәм кадрлар департаменты белән берлектә КФУның дәүләт һәм муниципаль идарә югары мәктәбе тарафыннан әзерләнгән.

Бүген "Батырлар. Татарстан геройлары» модуль программа старт алды, ул дәүләт һәм муниципаль идарә системасын өйрәнүгә багышланган. Көндезге укуга кадәр МХО ветераннары дистанцион блокны тәмамларга өлгергән, дәүләтчелек һәм идарә тарихы буенча экспертларны онлайн режимда тыңлаганнар, дәүләт һәм муниципаль хезмәт өлкәсендәге норматив хокукый актларны өйрәнгәннәр.

Белем бирү проектын ачу тантанасында Татарстан Республикасы Рәисе Администрациясе Җитәкчесе Әсгать Сәфәров, Татарстан Республикасы яшьләр эшләре министры Ринат Садыйков, Татарстан Республикасы Дәүләт Советының Законлылык һәм хокук тәртибе комитеты рәисе урынбасары, Россия Федерациясе Герое Рәсим Баксиков катнашты.

Әсгать Сәфәров үзенең сәламләү сүзендә катнашучыларның уку материалын өйрәнүдә активлык күрсәтүләрен, яңа белемнәр алуда көч куюларын билгеләп үтте һәм программаны үзләштерүдә уңышлар теләде.

"Белем бирү программасы дәүләт аппаратында эшләү өчен кирәкле белем, күнекмәләр алуга юнәлдерелгән. Әлбәттә, бу җиңел түгел, күп укырга, тыңларга, имтиханнар тапшырырга туры киләчәк. Ләкин ничек әйтәләр: өйрәнгәндә авыр булса, сугышта җиңел булыр. Ышанам ки, сезнең нәтиҗәгә һәм тәҗрибәгә омтылуыгыз укуда да, киләчәк эштә дә ярдәм итәр!"- дип ассызыклады ТР Рәисе Администрациясе Җитәкчесе.

КФУның дәүләт һәм муниципаль идарә югары мәктәбе директоры Игорь Привалов тыңлаучыларга программаның структурасы һәм эчтәлеге турында сөйләде. Көндезге уку модуле биш көн дәвам итәчәк. Катнашучылар хакимият органнары эшчәнлегенең конституциячел нигезләрен, гавами хакимият органнары системасын, дәүләт һәм муниципаль идарәне оештыру һәм вәкаләтләр чикләрен билгеләү принципларын өйрәнәчәкләр, Россия Федерациясенең илкүләм максатлары һәм проектлары, икътисадый нигезләре турында белем алачаклар.

Тыңлаучылар алдында Татарстан Республикасы Рәисе, Татарстан Республикасы Министрлар Кабинеты Администрацияләре вәкилләре, республиканың әйдәп баручы университетлары профессорлары чыгыш ясаячак. Лекцияләрдән тыш, катнашучыларны шулай ук командада туплану һәм нәтиҗәле эшләү, стратегик фикерләүне үстерү буенча тренинглар рәвешендә төрле белем бирү активлыклары көтә.

Программа ачылганнан соң укучылар алдында спикер сыйфатында беренче булып Россия Федерациясе Герое, Татарстан Республикасы Дәүләт Советының Законлылык һәм хокук тәртибе комитеты рәисе урынбасары Рәсим Баксиков чыгыш ясады, ул ТР Дәүләт Советы депутаты вазыйфасында эшләү тәҗрибәсе белән уртаклашты һәм белем бирү проектында катнашучыларга һөнәри эшчәнлектә кирәк булачак киңәшләр бирде.

Программаның беренче көндезге модуле кысаларында махсус хәрби операция ветераннарын укыту 12 сентябрьгә кадәр дәвам итәчәк.