Рөстәм Миңнеханов: Бүген Алабуга актив рәвештә уңай якка үзгәрә

Татарстан Рәисе Рөстәм Миңнеханов Алабугага эш сәфәре кысаларында предприятие һәм учреждениеләр җитәкчеләре, авыл җирлекләре башлыклары, район активы белән очрашты.

Алабуга районы башлыгы Рөстәм Нуриев хәбәр иткәнчә, урып-җыю эшләре 74% ка үтәлгән. Уңдырышлылык гектардан 40 центнерга җитә. Шул ук вакытта көзге культуралар чәчү дәвам итә - бүгенгә планның 40% ы төгәлләнгән. 2025 елның гыйнвар-июнь айларында район предприятиеләре тарафыннан 407,7 млрд сумлык сәнәгать продукциясе озатылган. Бу республикада дүртенче урын. 

Татарстан Республикасы вице-премьеры - авыл хуҗалыгы һәм азык-төлек министры Марат Җәббаров районның агросәнәгать комплексы үсешендә җитди үсеш алуын билгеләп үтте. 6 ел эчендә авыл хуҗалыгының нәтиҗәлелеге рейтингында Алабуга 40нчы урыннан 10нчы урынга күтәрелде. Күп кенә терлекчелек объектлары төзелде. Киләсе елга 1200 баш терлеккә исәпләнгән комплекс төзү планлаштырыла. Аграрийлар грантларда актив катнашалар. 

Бүген районда 5018 шәхси хуҗалык исәпләнә, аларда 585 баш эре мөгезле терлек исәпләнә. 4 авыл хуҗалыгы кулланучылар кооперативы эшли. 

Рөстәм Миңнеханов Алабуга халкына махсус хәрби операциядә катнашучыларга гуманитар ярдәм күрсәтүдә актив булулары өчен рәхмәт белдерде. Ул һәлак булган сугышчыларның гаиләләренә аерым игътибар бирергә өндәде. "Илебез тарихындагы бу чорны лаеклы кичерергә кирәк", - дип ассызыклады ул. 

Татарстан Рәисе билгеләп үткәнчә, барлык республика программалары дәвам итәчәк. Бүген коммуналь челтәрләрне модернизацияләү программасы аеруча актуаль.

"Бүген Алабуга актив рәвештә уңай якка үзгәрә. Яңа объектлар, уңайлы шәһәр киңлекләре барлыкка килә. Безнең горурлыгыбыз "Алабуга" МИЗ бүген илдә беренче урында тора", - диде Рөстәм Миңнеханов.