Рөстәм Миңнеханов капремонттан соң Алабуга үзәк район хастаханәсе стационарында булды

Алабуга үзәк район хастаханәсендә Татарстан Рәисе Рөстәм Миңнеханов булды.

Үзәк район хастаханәсе 78,5 мең кешегә хезмәт күрсәтә, стационар һәм амбулатор-поликлиник ярдәм күрсәтә. Хастаханәдә барлыгы 1316 хезмәткәр эшли. Ел ахырына кадәр тагын 7 табиб көтә, шул исәптән 5 - максатчан юнәлеш буенча. 

Былтыр стационарда капиталь ремонт башланды. Рөстәм Миңнеханов стационарның яңартылган бинасын карады, реанимация, операция бүлмәсендә, интенсив терапия палатасында булды. Ремонт барышында электр, су, җылылык һәм су чыгару системалары тулысынча алыштырылган. Эчке һәм тышкы төзекләндерү (тәрәзә, ишекләр, сантехник җиһазлар, вентиляция, янгын сигнализациясе) эшләре башкарылган. Бүген стационарда тәүлек буе эшли торган 285 койка һәм көндезге 143 койка урнаштырылган. 

Татарстан Рәисе шулай ук медицина хезмәткәрләре белән очрашты. Үзәк район хастаханәсе баш табибы медицина учреждениесен модернизацияләүдә ярдәм күрсәткәннәре өчен республика җитәкчелегенә рәхмәт белдерде. Рөстәм Миңнеханов билгеләп үткәнчә, төп бурыч - кадрларны активрак җәлеп итү. "Алабуга - уңайлы шәһәр, елдан-ел яхшыра бара. Табибларны җәлеп итәргә, аларга тиешле шартлар тудырырга кирәк. Бу беренче чираттагы бурыч", - дип ассызыклады ТР Рәисе.