Рөстәм Миңнеханов Республика көненә багышланган кабул итү кичәсендә: Ышанам, без барлык сынауларны да җиңеп чыгачакбыз, чөнки без бердәм

Бүген «Казан Экспо» ХКҮдә Татарстан Республикасы Рәисе Р.Н.Миңнеханов исеменнән Татарстан Республикасы көнен бәйрәм итү уңаеннан тантаналы кабул итү мәҗлесе узды.

Чарада Татарстан Республикасы Дәүләт Киңәшчесе Минтимер Шәймиев, Россия Федерациясе фән һәм мәгариф министры Валерий Фальков, башка рәсми затлар катнашты.

Тантана театральләштерелгән күренештән башланды - Татарстан Республикасы Дәүләт камера хоры чыгыш ясады.

Кунакларны Республика Көне белән Татарстан Республикасы Рәисе Рөстәм Миңнеханов, РФ фән һәм мәгариф министры Валерий Фальков котлады.

«Сезне чын күңелдән зур бәйрәм – Татарстан Республикасы Көне белән котлыйм, - диде Валерий Фальков. - Күпмилләтле Татарстан хаклы рәвештә лидер регионнарның берсе дип санала - биредә илебез икътисадын һәм социаль өлкәсен үстерү өчен барлык кирәкле шартлар тудырылган. Фән һәм югары белем бирүне үстерүгә зур игътибар бирелә. Татарстан университетлары флагман проектларда актив катнашалар – алдынгы инженерлык мәктәпләре, «Приоритет-2030», университет технологик эшкуарлыгы платформасы һәм башкалар. Барыгызга да иминлек, чәчәк ату һәм яңа казанышлар телим – Россия һәм Татарстан файдасына!»

«Чын күңелдән сезне Республика көне – татарстанлыларның барлык буыннарын берләштерүче, күпмилләтле халкыбызның бердәмлеген гәүдәләндерүче бәйрәм белән котлыйм», - дип мөрәҗәгать итте Рөстәм Миңнеханов тантаналы кабул итүдә катнашучыларга.

Ул билгеләп үткәнчә, бүген Татарстан Республиканың беренче Президенты Минтимер Шәрип улы Шәймиев нигез салган курс белән бара. «Без ата-бабаларыбызның ышанычлы үсешенә нигез салган уңышлары белән горурланабыз, аларның казанышларын үстерәбез һәм арттырабыз. Шул нигездә бүген Татарстан - илнең терәк төбәге һәм күп кенә икътисади күрсәткечләр буенча лидер. Бүгенге үсеш темплары Россия Хөкүмәте һәм шәхсән Президент Владимир Владимирович Путин ярдәменнән башка мөмкин булмас иде», - диде Рөстәм Миңнеханов.

«Бу көнне без бигрәк тә Татарстанның, илебезнең бүгенгесе һәм киләчәге өчен җаваплы булуыбызны аңлыйбыз. Илебезнең суверенитеты һәм иминлеге өчен фидакарь рәвештә көрәшүче Ватанны саклаучылар барысына да үрнәк булып тора. Бүген бу залда безнең белән хөрмәтле ветераннарыбыз, махсус хәрби операциядә катнашучылар.  Аларны алкышлап хөрмәт итәргә белән тәкъдим итәм!»,- диде Рөстәм Миңнеханов.

«Без катлаулы заманнарда җәмгыятебезнең берләшкәнен күрәбез. Татарстанлылар сугышчыларга актив ярдәм күрсәтәләр, гуманитар ярдәм җыялар. Бу эшкә безнең барлык предприятиеләр, аграрийлар, муниципалитетлар, бизнес, волонтерлык оешмалары кушылды», - диде ул.

Рөстәм Миңнеханов ассызыклаганча, Республика Көнен без көчле һәм бердәм җәмгыять буларак каршылыйбыз. «Ышанам ки, без барлык сынауларны бергә җиңәчәкбез, чөнки без бердәм», - диде ул азакта.

Тантаналы кабул итү Татарстан Республикасы сәнгать эшлеклеләре концерты белән дәвам итте.