Kazan Digital Week 2025 форумы Казанда 17-19 сентябрьдә узачак

Kazan Digital Week 2025 Халыкара форумында 74 килешүне имзалау көтелә. Узган ел ике көн эчендә 43 килешү имзаланды. Бу хакта бүген форумга әзерлек һәм аны уздыру буенча оештыру комитеты утырышында ТР Фәннәр академиясе президенты Рифкать Миңнеханов хәбәр итте.

Утырыш видеоконференцэлемтә режимында узды. Аны Россия Федерациясе цифрлы үсеш, элемтә һәм массакүләм коммуникацияләр министры, форумның оештыру комитеты рәисе Максут Шадаев үткәрде.

Утырышта әйтелгәнчә, форумда 211 компания, 60 стартап, Cryptoforumның 20 вәкиле катнашуы расланган. Моннан тыш, 33 компания форумны хуплады, 40 уртак чараны башлап җибәрде.

Рифкать Миңнеханов искәрткәнчә, быел пленар утырыш яңа форматта узачак - пленар утырыш кысаларында турыдан-туры видео тоташтыру планлаштырылган.

"Программада - ун тематик юнәлеш. Халыкара һәм төбәк экспертларының катнашуы көтелә. Мэрларның түгәрәк өстәле шәһәрләрне цифрлаштыруга багышлана – Аргентина, Иран, Казахстан, Кытай, Төркия, Россия лидерлары белән дискуссия", – дип билгеләде ул.

Моннан тыш, Татарстан Республикасы Фәннәр академиясе президенты сүзләренчә, Cryptoforum, Up!.Date мәгариф конференциясе, "Цифрлы технологияләр һәм хокук" халыкара конференциясе, GO CTF турниры, киберсугышлар узачак. «Мини-роботлар сугышы» турниры төп инженерлык вакыйгасы булачак, анда 16 профессиональ команда һәм 16 яңа команда көч сынашачак.

"Турнир Россиянең һәм Татарстанның әйдәп баручы инженерларын, программистларын һәм яшь белгечләрен берләштерә. Приз фонды - миллион сумга кадәр. Бу ярыш кына түгел, алдынгы карарларны гамәлгә кертү мәйданчыгы, тармак лидерлары белән тәҗрибә уртаклашу, киләчәктә алга киткән проектларга старт", – дип ассызыклады Рифкать Миңнеханов.

Kazan Digital Week 2025тә шулай ук «ІТ-лидер» конкурсы узачак, дип өстәде ул. Быел конкурста катнашу өчен 40 алдынгы компаниядән 73 заявка бирелгән. Конкурс номинацияләре киңәйтелде.

Форум көннәрендә (2025 елның 17-19 сентябре) шулай ук IT-белгечлек студентлары өчен вакансияләр ярминкәсе узачак, анда 18 компания катнашуын раслады.

Kazan Digital Fashion Week халыкара мода күрсәтүе БДБ илләре һәм Россиянең әйдәп баручы дизайнерлары катнашында 18 сентябрьгә планлаштырылган, шулай ук цифрлы мода коллекцияләрен тәкъдир итү булачак.

"Узган ел форум секцияләренә уртача 54-109 кеше йөрде. Алдынгы юнәлешләр киберкуркынычсызлык, сәламәтлек саклау һәм дәүләт идарәсендә цифрлы технологияләр булды", - диде Рифкать Миңнеханов.

Хәзерге вакытта 600дән артык спикерның гаризалары хупланган. Kazan Digital Week 2025 теркәлү 5 сентябрьдә тәмамланачак.

Чараның оештыру комитетын җитәкләүче РФ цифрлы үсеш, элемтә һәм массакүләм коммуникацияләр министры Максут Шадаев форумны киңәйтүнең әһәмиятен билгеләп үтте. "Безнең төп бурыч - елдан-ел форумны масштаблырак һәм әһәмиятлерәк итү, илнең цифрлы трансформация өлкәсендәге өстенлекләрен чагылдыру", - диде ул.

Исегезгә төшерәбез, Kazan Digital Week беренче тапкыр 2020 елда узды, ә 2023 елда бу чара федераль статус алды. 2024 елда чарада 19 меңнән артык кеше катнашты, шуларның 12,5 меңе - көндезге һәм 5 меңнән артыгы - онлайн.