Рөстәм Миңнеханов Татарстанда МХОдә катнашучылар һәм аларның гаиләләре өчен торак программасын гамәлгә кертү турында игълан итте

Татарстанда МХОдә катнашучыларның гаиләләренә социаль ипотека буенча фатир алырга мөмкинлек бирә торган яңа торак программасы башлана. Бу хакта Татарстан Рәисе Рөстәм Миңнеханов Дәүләт торак фондының 30 еллыгына багышланган чарада белдерде. Аны Казан мэры Илсур Метшин һәм ТР Рәисе каршындагы Дәүләт торак фондының башкарма директоры Марат Зарипов озата йөрде.

Чара «Салават Күпере» ТК паркында узды. Күпфункцияле иҗтимагый киңлек 3 төп өлешкә бүленгән: күл тыныч ял зонасы, мәйдан, парад зонасы һәм уен һәм спорт - актив ял зонасы. Рөстәм Миңнеханов паркны карап чыкты һәм халык белән аралашты.

Республика Рәисе үз чыгышында искәрткәнчә, Дәүләт торак фондын булдыру турындагы карарны Татарстанның беренче Президенты Минтимер Шәймиев илебез тарихының иң катлаулы чорларының берсендә кабул иткән. "Вакыт күрсәткәнчә, бу бик вакытлы һәм кирәкле карар иде. Ул төзелеш темпларын саклап калырга һәм гражданнарны торак белән тәэмин итүнең инновацион механизмнарын эшләргә мөмкинлек бирде, соңыннан алар башка төбәкләр өчен үрнәк булды һәм әлегә кадәр аналоглары юк. Дәүләт торак фонды гаҗәеп үсеш юлын узды, гражданнарның торак мәсьәләләрен хәл итү буенча уникаль институт булды", - диде Рөстәм Миңнеханов.

Ул билгеләп үткәнчә, Дәүләт торак фондына йөкләнгән беренче республика программасы үзенең масштаблары буенча моңарчы күрелмәгән тузган торакны бетерү программасы булды. 9 ел эчендә 2,7 млн кв. м торак файдалануга тапшырылган. 50 меңгә якын гаилә авария хәлендәге, төзекләндерелмәгән йортлардан барлык уңайлыклары булган заманча, уңайлы фатирларга күченгән. Бу аларның тормыш сыйфатын сизелерлек яхшыртты. Башкарылган эшне Россия Федерациясе Президенты Владимир Путин югары бәяләде. Моннан тыш, 2005 елдан башлап Татарстанда уникаль социаль ипотека программасы гамәлгә ашырыла. Бу вакыт эчендә 8 млн кв. метрдан артык торак файдалануга тапшырылган, мәгариф, медицина, мәдәният системасында эшләүче 135 меңнән артык гаилә өй туе үткәргән.

"Фонд сәнәгать үсешенә дә зур өлеш кертә. Безнең предприятиеләр җитештерүне актив үстерәләр, югары квалификацияле белгечләрне җәлеп итәләр һәм бөтен республика буенча яңа эш урыннары булдыралар. Фонд уникаль арендалы торак программасын тормышка ашыра, ул предприятиеләрнең хезмәткәрләрне уңайлы фатирлар белән тәэмин итү бурычларын оператив хәл итәргә мөмкинлек бирә", - диде Рөстәм Миңнеханов.

Республика Рәисе ассызыклаганча, бүген Татарстанда уңайлы тормыш өчен кирәкле барлык инфраструктура белән тулы микрорайоннар булдырыла. Ачык мисал - Дәүләт торак фондының иң масштаблы проектларының берсе - ун ел элек нигез салынган һәм республиканың заманча төзек почмагына әверелгән «Салават Күпере» микрорайоны. Шушы вакыт эчендә биредә 17 меңнән артык фатирлы 78 торак йорт, 9 балалар бакчасы, 4 заманча мәктәп, республикада иң зур күп профильле поликлиника файдалануга тапшырылган, ул сменагсына750 кешене кабул итәргә сәләтле. Шулай ук биредә яңа парк төзекләндерелгән, аның урынында берничә ел элек бушлык булган.

"Агымдагы ел илебездә һәм республикада Ватанны саклаучылар елы дип игълан ителде. Аның кысаларында махсус хәрби операциядә катнашучыларга торак бирү буенча яңа мөһим программаны эшләтеп җибәрү турында хәбәр итәргә шатмын. Шуның нәтиҗәсендә Ватанны саклаучылар, шулай ук аларның гаилә әгъзалары социаль ипотека программасы кысаларында беренче чиратта торак сайлау хокукына ия була. Бу карар - безнең Ватан алдындагы бурычларын намус белән үтәүчеләргә ярдәм итүгә керткән өлешебез", - дип ассызыклады Рөстәм Миңнеханов.