Рөстәм Миңнеханов һәм Оксана Лут Казан дәүләт аграр университетының яңа тулай торагын ачуда катнаштылар

Татарстан Рәисе Рөстәм Миңнеханов һәм Россия Федерациясе Авыл хуҗалыгы министры Оксана Лут Казан дәүләт аграр университетының яңа тулай торагын ачуда катнаштылар.

Аларны Татарстан Республикасы вице-премьеры - авыл хуҗалыгы һәм азык-төлек министры Марат Җәббаров һәм югары уку йорты ректоры вазыйфаларын вакытлыча башкаручы Илшат Нуриев озата йөрде.

Объект «Россия Федерациясенең фәнни-технологик үсеше» программасын гамәлгә ашыру кысаларында төзелгән. Тулай торак 634 урынга исәпләнә. Һәр торак блокта 2-3 бүлмә, санузел һәм кухня зонасы. Янәшәдәге территориядә спорт мәйданчыгы һәм парковка төзелгән.

Оксана Лут студентлар өчен заманча инфраструктура булдыруның мөһимлеген билгеләп үтте. "Безнең роботлаштыру, автоматлаштыру һәм ясалма интеллект гасырына карамастан, агросәнәгать комплексы кешеләрдән башка булдыра алмый. Безгә авыл хуҗалыгына ышанган, бу тармакның мөһимлеген аңлаган кадрлар, яшь белгечләр кирәк. Һәм әлбәттә, студентларны укыту һәм яшәү өчен уңайлы шартлар тудырырга кирәк. Бүген без бу искиткеч тулай торакны шатланып ачабыз. Барыгызны да шушы вакыйга белән котлыйм", - дип мөрәҗәгать итте министр тантанада катнашучыларга.

Рөстәм Миңнеханов ассызыклаганча, Казан дәүләт аграр университеты актив үсә, студентлар санын арттыру буенча планнар бар, шул исәптән чит ил студентлары да.

"Безнең аграр университетның инфраструктурасы, фәнни базасы, укытучылар составы бик яхшы. Әмма яшәү урыннары булмаса - агросәнәгать комплексы алдында торган бурычларны хәл итү кыен булачак. Мин үзем, бу югары уку йорты студенты буларак, биш ел тулай торакта яшәдем. Бүген без иң уңайлы шартлар тудырылган яңа студентлар йортын ачабыз", - дип ассызыклады Татарстан Рәисе.

Аннары Рөстәм Миңнеханов һәм Оксана Лут яңа тулай торакның бүлмәләрен һәм көнкүреш бүлмәләрен, медицина блогын һәм спорт залын карадылар.

Казан дәүләт аграр университеты 1922 елда ачылган. Россия Федерациясе Авыл хуҗалыгы министрлыгының 2024 елның 20 декабрендәге боерыгы белән югары уку йорты аңа Н.Э. Бауман исемендәге Казан дәүләт ветеринария медицинасы академиясен һәм Татарстанның агробизнес кадрларын яңадан әзерләү институтын кушу юлы белән үзгәртеп оештырылган.

2025 елның 1 сентябренә кабул итү планын үтәү фаразын исәпкә алып, университетта югары һәм урта һөнәри белем бирү программалары буенча 8,5 меңнән артык студент, шул исәптән 600дән артык чит ил гражданы белем алачак. Белгечләр әзерләү 11 эре белгечлек төркеме буенча алып барыла. Агрономия, агроинженерия, ветеринария, зоотехния, икътисад, урман хуҗалыгы һ.б. өлкәләрдә уңышлы фәнни-тикшеренү эшләре җайга салынган. 8 фәнни мәктәп эшли, тикшеренүчеләр эшләнмәләре фәннең 12 тармагын үз эченә ала.