Рөстәм Миңнеханов: Уяв күптән инде күп милләтле Татарстанның мәдәни символларының берсенә әверелде

Бүген Нурлат шәһәрендә чуаш мәдәниятенең Уяв республика бәйрәме узды. Чарада Татарстан Рәисе Рөстәм Миңнеханов, Чуаш Республикасы Башлыгы Олег Николаев, Россия Герое, «Россия чуашларының федераль милли-мәдәни автономиясе» иҗтимагый оешмасы рәисе Николай Гаврилов катнашты.

Уяв-язгы-җәйге циклдагы чәчү эшләре тәмамланганнан соң үткәрелә торган бәйрәм. Аның нигезендә табигать көчләренә мул уңыш, мул яңгыр сорап мөрәҗәгать итү ята. Бәйрәм йолалар, әйлән-бәйлән һәм күңел ачулар белән үрелеп бара.

Нурлатта Уявта катнашу өчен Татарстаннан һәм Россиянең төрле төбәкләреннән 100гә якын чуаш халык башкаручысы һәм этнографик ансамбльләр җыелды. Халык һөнәрләре ярминкәләре оештырылды: бизәнү әйберләре, милли костюмнар, уенчыклар, декоратив-гамәли сәнгать әйберләре һәм башкалар. һәр мәйданчыкта кунаклар өчен тематик мастер-класслар үткәрелде.

Рөстәм Миңнеханов һәм Олег Николаев милли хуҗалыкларны карадылар, традицион һөнәр осталарының эшен күзәттеләр, шулай ук чуаш туй йоласында кунак булдылар. Аерым зур экспозиция Бөек Ватан сугышында Җиңүнең 80 еллыгына һәм Ватанны саклаучылар елына багышланган иде.

Рөстәм Миңнеханов махсус хәрби операция ветераннары һәм волонтерлар белән аралашты, МХО ихтыяҗлары өчен татарстанлылар җитештерә торган продукция күргәзмәсен карады.

Үз чыгышында Рөстәм Миңнеханов ассызыклаганча, Уяв елдан-ел Татарстанның төрле районнарыннан һәм Россия төбәкләреннән дуслар даирәсен киңәйтә. "Республикада яшәүче халыкларның телләрен, мәдәниятләрен һәм гореф-гадәтләрен саклау безнең өчен һәрвакыт өстенлекле юнәлеш булды һәм булачак та. Традицион милли бәйрәмнәргә ярдәм итүгә зур игътибар бирелә.

Быел рус Каравоны, татар Сабантуе, марый Семыгы, мордва Валда Шинясы, удмурт Гырон Быдтон уңышлы узды. Бүген кунакчыл Нурлат җирендә Уяв уза", - диде ТР Рәисе. Ул билгеләп үткәнчә, Уяв күптәннән күп милләтле Татарстанның мәдәни символларының берсенә әверелгән.

"Үзенчәлегебезне саклап, без ата-бабаларыбыз биргән көчебезне саклыйбыз. Гаиләгә, дуслыкка, Ватанга тугрылык - ул безнең дөньяга карашыбызның нигезе, Ватаныбызның тотрыклылыгы, чәчәк атуы һәм куәте нигезе. Бу кыйммәтләрне саклаганыгыз һәм аларны үсеп килүче буынга тапшырганыгыз өчен рәхмәт. Ватанны саклаучылар елында һәм Бөек Җиңүнең 80 еллыгында бу аеруча зур әһәмияткә ия", - дип өстәде Рөстәм Миңнеханов.

Олег Николаев Татарстан җитәкчелегенә республика территориясендә яшәүче халыкларга ярдәм иткәннәре, аларга үз мәдәниятләрен саклап калу һәм үстерү өчен барлык шартлар тудырганнары өчен рәхмәт белдерде.

"Без дә шулай эшләргә тырышабыз. Һәр халык вәкилләре үзләренең матурлыгын, үзенчәлекләрен, ә иң мөһиме - безнең рус дөньясының тирән бердәмлеген күрсәтә алуына бик шатланабыз. Ышанам, без киләчәктә дә бу бердәмлекне, шулай ук үзебезнең уникаль тәңгәллегебезне саклап калачакбыз. Безнең көчебез шунда", - диде Чуаш Республикасы Башлыгы.

Нурлат районы башлыгы Дамир Ишкиниев билгеләп үткәнчә, җирле чуашлар элек-электән хезмәт сөючәнлекләре, кунакчыллыклары һәм яхшылыкка омтылулары белән дан тотканнар.

"Чуаш халкы вәкилләре бизнесны үстерүдә зур роль уйныйлар, дәүләт хакимияте һәм җирле үзидарә органнарында, шулай ук башка өлкәләрдә актив эшлиләр. Безнең районда республиканың Чуаш милли-мәдәни автономиясе вәкиллеге эшли. Туган телне һәм әдәбиятны өйрәнү өчен барлык шартлар да тудырылган. Чуаш телендә район газетасы чыга, ә аның каршында әдәби берләшмә эшли", - дип сөйләде Дамир Ишкиниев.

Аннары Рөстәм Миңнеханов һәм Олег Николаев чуаш халкының милли-мәдәни традицияләрен үстерүгә керткән өлешләре өчен бүләкләр тапшырдылар.

Шуннан соң Татарстан Рәисе һәм Чуаш Республикасы Башлыгы бәйрәмнең һәр катнашучысы җәлеп ителә торган «Уяв карти» зур әйлән-бәйләнгә кушылдылар. Шуңа күрә ул бик колачлы килеп чыга, халык традицияләре нигезендә кешеләрне берләштерү символы булып тора.