Рөстәм Миңнеханов: Бөтен ил "КАМАЗ" казанышлары белән горурлана

Бүген Чаллыда «КАМАЗ» ГАҖ акционерларының еллык гомуми җыелышы узды. Җыелышта компаниянең 2024 елдагы эшчәнлеге нәтиҗәләре каралды. Раслауга «КАМАЗ» ГАҖнең 2024 елга еллык хисабы һәм еллык бухгалтерлык (финанс) хисабы, җәмгыятьнең эчке документларының яңа редакцияләре тәкъдим ителде. Анда Татарстан Рәисе Рөстәм Миңнеханов, Ростех дәүләт корпорациясе генераль директоры Сергей Чемезов, «КАМАЗ» генераль директоры Сергей Когогин һәм башкалар катнашты.

Хисап чорында «КАМАЗ» оешмалары төркеменең 2024 елдагы берләштерелгән кереме финанс хисабының халыкара стандартлары нигезендә 393 654 млн. сум тәшкил иткән (2023 ел: 370 312 млн. сум, үсеш 6%ка), ел йомгаклары буенча чиста табыш 731 млн. сум тәшкил иткән, 2024 елда EBITDA күрсәткече 33 610 млн. сум тәшкил иткән.

Гомумән алганда, 2024 елда 54,6 мең берәмлектән артык коммерциячел автотехника җитештерелгән, бу 2023 елга караганда 3%ка күбрәк (АППГ – 53 мең берәмлек). Аерым алганда, 1 596 автобус һәм 688 электробус, 4 368 тагылма һәм ярымтагылма, 554 автобетон катнаштыргыч, 5 742 берәмлек урта һәм аз тоннажлы компас автомобильләре чыгарылган. Авыр йөк автотехникасы 41 677 берәмлек чыгарылган.

Рөстәм Миңнеханов билгеләп үткәнчә, илебезнең автомобиль төзелеше флагманы «КАМАЗ», санкцияләр нәтиҗәләрен җиңеп, тотрыклы эшләвен дәвам итә, оборона сәләтен ныгыту һәм илнең технологик лидерлыгына ирешү проектларын гамәлгә ашыра. "Бу "КАМАЗ" шәһәр төзүче предприятие булган Чаллыдагы тотрыклы вәзгыятьне тәэмин итүдә зур әһәмияткә ия. Бүген заводта 31,6 меңнән артык кеше эшли һәм шәһәрдә төяп җибәрелгән продукция күләменең 40%тан артыгы җитештерелә", - диде Татарстан Рәисе.

Ул Россия Президентына, федераль Хөкүмәткә һәм «Ростех» дәүләт корпорациясенә заводка даими игътибарлары һәм ярдәм күрсәтүләре өчен рәхмәт белдерде, шуның нәтиҗәсендә «КАМАЗ» куелган бурычларны уңышлы хәл итә һәм киләчәккә ышанычлы карый.

Рөстәм Миңнеханов «КАМАЗ»ның махсус хәрби операция кысаларындагы зур эшен, шул исәптән гуманитар ярдәмне һәм хәрбиләргә һәм аларның гаиләләренә ярдәм итүне билгеләп үтте.

Татарстан Рәисе ассызыклаганча, заманча автосәнәгатьне үстерү өр-яңа хәл ителешләр кертмичә мөмкин түгел. Узган ел «КАМАЗ" импортны алмаштыру һәм санкцион-тотрыклы компонентлар базасында автотехника җитештерү эшен дәвам итте. "К5 буыны автомобильләренең модель линейкасы үсеш ала, базарга яңа тягачлар чыгарыла, „Компас“ урта һәм аз тоннажлы автомобильләр чыгару арта.

"КАМАЗ" пилотсыз автомобильләр, электробуслар, водородта эшләүче машиналар кебек перспектив юнәлешләрдә компетенцияләрне көчәйтә. Бу эшләнмәләрдә төп рольне фәнни-техник үзәк уйный", - диде Рөстәм Миңнеханов.

Ул билгеләп үткәнчә, ил җитәкчелеге 2026 елда Чаллы шәһәренең 400 еллыгын һәм беренче «КАМАЗ» автомобилен чыгаруга 50 ел тулуны федераль дәрәҗәдә бәйрәм итү турындагы карарны хуплады. Әлеге чараларга әзерлек кысаларында шәһәр халкы һәм завод хезмәткәрләре өчен уңайлы шартлар тудыруга юнәлдерелгән План эшләнде.

Рөстәм Миңнеханов билгеләп үткәнчә, югары технологияле продукция булдыру яңа компетенцияләр һәм квалификацияле белгечләр таләп итә. «Чаллыда яшьләр туган шәһәрләрендә калсын, һөнәри һәм шәхси үсеш өчен мөмкинлекләр тапсын өчен барлык шартлар да тудырыла», - диде ТР Рәисе.

Ул искәрткәнчә, 2023 елда «КАМАЗ» өчен алты арендалы йорт төзү турында карар кабул ителгән. Бүгенге көнгә 3 йорт тапшырылган инде. Бу завод кешеләрен һәм аларның гаиләләрен уңайлы заманча торак белән тәэмин итәргә мөмкинлек бирәчәк.

"Узган ел „КамАЗ“ өчен үзенчәлекле булды. Завод төзелешенә 55 ел тулды, ә сентябрьдә төп җыю конвейерыннан 2,5 миллионлы автомобиль төште. Бөтен ил предприятие казанышлары белән горурлана. Ышанам ки, ил Хөкүмәте һәм „Ростех“ дәүләт корпорациясе ярдәмендә компания җитәкчелеге һәм коллективының җайга салынган эше яңа уңышларга ирешергә мөмкинлек бирәчәк», - дип өстәде Рөстәм Миңнеханов.

2024 ел нәтиҗәләре буенча «КАМАЗ» ГАҖнең Россия базарында тулы массасы 14 тоннадан артык булган йөк автомобильләре өлеше 18% тәшкил иткән. «КАМАЗ" 2024 елның октябреннән базардагы өлешен акрынлап торгызды, декабрьдә өлеше 26%ка кадәр артты (хәзерге вакытта ул 36% тәшкил итә).

«КАМАЗ» оешмалары төркеме, санкцияләр басымы астында калып, импортны алмаштыру программасын һәм җитештерүне яңарту һәм яңа модельләр рәтен үстерү проектларын дәвам итә. 2024 елда инвестицияләр керемнең 8%ын тәшкил иткән, бу узган ел дәрәҗәсенә туры килә һәм 32 474 млн. сум тәшкил итә (2023 ел: 31 831 млн. сум).

Акционерлар җыелышына «КАМАЗ» ГАҖ Директорлар советының һәм ревизия комиссиясенең яңа составларын сайлау турында карар һәм 2024 ел йомгаклары буенча «КАМАЗ» ГАҖ табышын бүлү турында карар тәкъдим ителде: 2024 елгы эшчәнлек нәтиҗәләре буенча «КАМАЗ» ГАҖ чиста табышы булмау сәбәпле табышны бүлмәскә, 2024 елгы «КАМАЗ» ГАҖ акцияләре буенча дивидендлар түләмәскә.

Акционерларның еллык гомуми җыелышының көн тәртибендәге барлык мәсьәләләр буенча тавыш бирүнең ахыргы нәтиҗәләре «Интерфакс» яңалыклары лентасында һәм «КАМАЗ» ГАҖ рәсми сайтында Россия Федерациясе законнарында каралган срокларда бастырылачак.