Рус теле көнендә Рөстәм Миңнеханов Татарстан республикасы Рус милли-мәдәни берләшмәсе вәкилләре белән очрашты

Бүген Татарстан Рәисе Рөстәм Миңнеханов җәмәгатьчелек вәкилләре, Татарстан Республикасы Рус милли-мәдәни берләшмәсе әгъзалары белән очрашты.

Очрашу Рус теле көнен һәм рус шагыйре Александр Пушкинның тууына 226 ел тулуны бәйрәм итүгә багышланган.

Чара Казанда Лев Толстой музеенда (ТР Милли музее филиалы) узды.

Очрашуда катнашучыларны сәламләп, Рөстәм Миңнеханов барысын да Рус теле көне һәм шагыйрь Александр Пушкинның тууына 226 ел тулу белән котлады. Ул шулай ук бүгенге көндә республикада мөселманнар өчен иң әһәмиятле һәм шатлыклы бәйрәмнәрнең берсе – Корбан бәйрәме билгеләп үтелүен әйтте.

Рөстәм Миңнеханов билгеләп үткәнчә, бүгенге очрашу уза торган бөек рус язучысы Лев Николаевич Толстой музеенда яхшы экспозиция булдырылган. Бу музейга соңгы килүләрнең берсе 2015 елга туры килә – ул вакытта музей ачылган иде, дип искәртте ул.

Татарстан Республикасының Рус милли-мәдәни берләшмәсе рәисе, Казанның 93нче гимназиясе директоры, ТР Иҗтимагый палатасы әгъзасы Ирина Александровская кыскача Татарстан Рәисе белән соңгы очрашудан соң узган милли-мәдәни берләшмә өчен әһәмиятле вакыйгалар турында сөйләде. Аерым алганда, ул Татарстанның Россия Федерациясенең телләр күптөрлелеген саклап калу өчен «Ключевое слово» бөтенроссия иҗтимагый премиясенә дәгъва кылуда катнашуы турында сөйләде.

Тагын бер мөһим чара - Россия халыкларының этномәдәни үсешенә һәм бердәмлеген ныгытуга шәхси өлеш керткән өчен ел саен үткәрелә торган «Милләт горурлыгы» бөтенроссия иҗтимагый премиясе. Шулай ук Татарстаннан ике активист премия лауреатлары булган.

«Гражданнар бердәмлеген һәм милләтара татулыкны тәэмин итүгә керткән өлеше өчен» номинациясендә Татарстан Республикасы Рус милли-мәдәни берләшмәсе рәисе Ирина Александровская һәм «Россия халыклары мәдәниятен саклауга һәм үстерүгә керткән өлеше өчен» номинациясендә «Казан Идел буе халыкларының традицион костюмы» тарихи-этнографик проектының фәнни җитәкчесе Елена Гущина 2024 елда «Милләт горурлыгы» абруйлы премиясенә ия булдылар.

Ирина Александровская билгеләп үткәнчә, бу – милли-мәдәни берләшмәнең барлык активы казанышы. Ул шулай ук Рөстәм Миңнехановка «Каравон» рус бәйрәмендә ел саен актив катнашканы өчен рәхмәт белдерде. Бүген рус милли-мәдәни берләшмәсе алдында торган бурычлар арасында ул Лев Толстойның тууына 200 ел тулуны бәйрәм итүгә әзерлекне атады, ул 2028 елда билгеләп үтеләчәк. Ул әзерлек өчен федераль оештыру комитеты төзелүен һәм Рөстәм Миңнехановның да оештыру комитеты составына керүен искәртте.

Ирина Александровская Татарстан Республикасы Рәисенең Л.Н. Толстойның тууына 200 ел тулуны бәйрәм итү турындагы Указын, А.С. Пушкинның 225 еллыгын бәйрәм итүгә әзерлек барганга охшаш итеп, тиешле республика чаралары планын кабул итеп, раслауны сорады. Моннан тыш, республикада "Толстой и Казан. Гасырлар аша" басмасын чыгарырга телиләр.

Ирина Александровская хәбәр иткәнчә, Казан язучының тормышы белән тыгыз бәйләнгән. Болар - Лев Толстойның яшь чагы, университет һәм әдәби хроникасы, Лаеш өязендә каникуллар, әдипнең Казан төбәге белән бәйле әдәби әсәрләре, танылган язучы сыйфатында Казанга килүләре һ. б. Рөстәм Миңнеханов Мәдәният министрлыгына бу мәсьәләләрдәге эшчәнлекне координацияләргә кушты.

Л.Н. Толстой музее директоры Лия Бушканец Толстойның 200 еллыгына берничә уй булуы турында сөйләде. Лев Толстой музее территориясендә 19 гасыр дворян утары стилендә Бакча-парк киңлекләрен төзекләндерергә, биредә тематик кичәләр, концертлар һәм башка мәдәни чаралар уздырырга мөмкин. Богородицкий монастыреннан, Казан иконасы музееннан, Игенчеләр сараеннан Лев Толстой музеена кадәр Җәяүле туристик маршрут формалаштыру идеясе дә бар.

Лия Бушканец хәбәр иткәнчә, бүген Толстой иҗатына туристлык кызыксынуы бар, шул исәптән БРИКС илләре туристлары тарафыннан да. Республикадагы мәктәпләрнең берсенә (вариант буларак – Лаеш районындагы мәктәпләрнең берсенә) Лев Толстой исемен бирү тәкъдиме дә яңгырады. Язучының 200 еллыгына Казанда Лев Толстой исеме белән бәйле даталар һәм вакыйгалар күрсәтелгән барлык такталарга ревизия үткәрү дә мөһим.

Рөстәм Миңнеханов бу мәсьәләне Казан мэриясенә җитәкләргә кушты. Лев Толстой музееның матди-техник торышын ныгыту һәм аны яшьләрне җәлеп итү өчен заманча җиһазлар (интерактив экраннар, планшетлар һ.б.) белән тәэмин итү турындагы тәкъдимгә җавап биреп, Рөстәм Миңнеханов бу мәсьәләне акыллы алымнарны исәпкә алып карарга вәгъдә итте. Ул искәрткәнчә, бүген музей урнашкан бинаны ремонтлауга шактый акча тотылган.

Татарстан Рәисе ТР Мәдәният министрлыгына мәсьәләне өйрәнергә, кайбер федераль программаларда катнашу мөмкинлекләрен карарга кушты.

Россия әдәбият белгече, әдәби тәнкыйтьче, КФУның рус әдәбияты һәм аны укыту методикасы кафедрасы профессоры Әлфия Галимуллина шулай ук Лев Толстойның тормышы һәм иҗаты турында урам форматында күргәзмә экспозициясе булдыру, «Казанның Толстов урыннары», «Татарстанда Толстов урыннары», «Л. Толстой әсәрләрендә Казан» экскурсия программалары һәм маршрутларын эшләү һәм гамәлгә кертү тәкъдимнәрен җиткерде. Бүген җирле театр куелышларында Лев Толстой әсәрләре аз гына чагылыш таба дигән фикер яңгырады.

Бүгенге очрашуда Рөстәм Миңнехановка шулай ук Татарстанда «Тоталь диктант» халыкара акциясенең ничек узуы турында сөйләде. Шунысы кызык, акциядә Казаноргсинтез» сәнәгать предприятиеләре һәм «КАМАЗ»ГАҖ актив катнашты.

Татарстандагы акция координаторы Сергей Чуманов Рөстәм Миңнехановка һәм муниципалитетларга «Тоталь диктант» акциясенә актив ярдәм иткәннәре өчен рәхмәт белдерде. Ирина Александровская ачыклык керткәнчә, акциядә катнашучыларның өчтән бере - Татарстан халкы.

Рөстәм Миңнеханов «Тоталь диктант»ны файдалы акция дип атады һәм үз чиратында оештыручыларга эшләре өчен рәхмәт белдерде.