Татарстан Рәисе һәм Беларусь Республикасы Премьер-министры "КАМАЗ"да булдылар

Татарстан Рәисе Рөстәм Миңнеханов һәм Беларусь Республикасы Премьер-министры Александр Турчин Чаллыга эш сәфәре кысаларында «КАМАЗ» предприятиесендә булдылар.

«КАМАЗ» ГАҖ генераль директоры Сергей Когогин озатуында Беларусь Хөкүмәт делегациясе автомобиль заводында булды, анда төп җыю конвейеры һәм кабиналар җыю конвейеры эше белән танышты. Көн саен биредә 210 автомобиль чыгарыла. Зур модельләр рәтенә якынча 300 модификация керә. Узган елда 53 мең берәмлек коммерциячел техника җитештерелгән. «КАМАЗ»га автокомпонентларны Беларусь Республикасыннан 40 предприятие китереп тора.

Аннары Александр Турчин Чаллы автогигантының инновацион үзәген карады. Монда перспектив технологияләр эшләнә, алар җитештерүгә кертелә: яңа материаллар, агрегатлар, комплектлаучылар.

Программаның соңгы пункты «КАМАЗ» фәнни-техник үзәгендә булды. Фәнни-тикшеренү үзәгенең фәнни-тикшеренү мәйданчыгында Беларусь кунакларына КАМАЗның иң яңа ике дистә югары технологияле автомобилен тәкъдим иттеләр, шул исәптән карьер үзбушаткычларын һәм водород техникасын. Шулай ук Рөстәм Миңнеханов һәм Александр Турчин К-5 буын йөк машиналарын сынап карадылар. Татарстан Рәисе - КАМАЗ-54902дә, ә Беларусь Премьер-министры КАМАЗ - 54901 машинасында йөрде.