Рөстәм Миңнеханов тар составта «Идел-Янцзы" Советы делегацияләре башлыклары очрашуында катнашты

Бүген Татарстан Рәисе Рөстәм Миңнеханов «Идел-Янцзы» форматында Төбәкара хезмәттәшлек советының V утырышы кысаларындагы чаралар делегацияләре башлыклары очрашуында катнашты.

Очрашу, утырыш башланганчы, тар составта, Казан Ратушасының алсу залында узды.

Очрашуны ачып, Россия Президентының Идел буе федераль округындагы Тулы вәкаләтле вәкиле Игорь Комаров чын күңелдән КХР Дәүләт Советы Премьеры урынбасары, Советның Кытай өлеше рәистәше Чжан Гоцинны һәм делегацияләрнең башка әгъзаларын сәламләде.

"Безнең яңа очрашуыбызга шатмын. Сезнең визит уңышлы һәм эчтәлекле уза дип ышанам, - диде Игорь Комаров, Чжан Гоцин әфәндегә мөрәҗәгать итеп. - Татарстан республикага хас кунакчыллык һәм эре халыкара чаралар уздыру тәҗрибәсе белән Кытай делегациясенең Казанга килүе уңайлы булсын өчен барысын да эшләде».

"Беләм, сезнең эшлекле программа кичә Мәскәүдә башланды, - дип билгеләде Игорь Комаров. - Сез һәм Россия Федерациясе Хөкүмәте Рәисе урынбасары – Россия Федерациясе Президентының Ерак Көнчыгыш федераль округындагы Тулы вәкаләтле вәкиле Юрий Трутнев Россия Федерациясенең Ерак Көнчыгышы һәм Кытай Халык Республикасының төньяк-көнчыгышы хезмәттәшлеге һәм үсеше буенча Россия-Кытай хөкүмәтара комиссиясе утырышын уздырдыгыз».

"Бүген без бергәләп «Идел-Янцзы» форматында төбәкара хезмәттәшлек советының 5 нче утырышын уздырачакбыз. Анда милли территорияләрдә урнашкан һәм уртак чикләре булмаган төбәкләр катнаша. Һәм бу безнең хезмәттәшлек механизмын уникаль итә", - дип ассызыклады Игорь Комаров.

Ул шулай ук төбәкләрнең икътисадый багланышларны ныгыту белән кызыксынуларын билгеләп үтте. Бу коммерциячел оешмаларының кызыксынуын һәм Россиядә һәм Кытайда уздырыла торган форумнарда, күргәзмә-ярминкә чараларында һәм бизнес-миссияләрдә катнашуын раслый.

"Кытай Халык Республикасы Идел буе федераль округы төбәкләре өчен тышкы сәүдә әйләнешендә алдынгы урынны алып торучы төп сәүдә партнеры булып тора, ул 2024 елда узган ел белән чагыштырганда 6,9%ка артты», - дип хәбәр итте очрашу барышында РФ Президентының Идел буе федераль округындагы Тулы вәкаләтле вәкиле.

Чжан Гоцин әфәнде Казанда «Идел - Янцзы" Советы утырышында катнашуына шат булуын белдерде. "Бу минем рәистәш вазыйфасына керешкәннән соң Идел буе федераль округына беренче визитым, - диде ул. - Кичә кич без хезмәттәшләребез белән Казанга килеп төштек. Һәм шунда ук мең еллык тарихы булган бу шәһәрнең җанлылыгын һәм яшәү сәләтен тойдык. Россия коллегаларына җентекле оештырганнары өчен рәхмәт белдерәсем килә».

Чжан Гоцин әфәнде ассызыклаганча: "Соңгы елларда дәүләт башлыкларының стратегик җитәкчелегендә яңа чорда Россия-Кытай мөнәсәбәтләре тотрыклы рәвештә үсә һәм алга бара. Бу ай башында КХР Рәисе Си Цзиньпин Россиягә дәүләт визитын уңышлы башкарды һәм Бөек Ватан сугышында Җиңүнең 80 еллыгын бәйрәм итүгә багышланган тантаналы чараларда катнашты. Алар Президент Путин белән ике яклы мөнәсәбәтләрне тирәнтен үстерү, Икенче бөтендөнья сугышы нәтиҗәләрен яклау һәм халыкара гаделлек, глобаль идарәнең дөрес юнәлешен билгеләү буенча җентекле фикер алыштылар. Яңа киң килешүләргә ирештек. Һәм безнең бурыч «Янцзы - Идел» төбәкләре хезмәттәшлеген югары дәрәҗәдәге килешүләр нигезендә югары сыйфатлы үстерүгә ярдәм итүдән гыйбарәт. Безнең өчен - бик зур потенциал".