Рөстәм Миңнеханов һәм Марат Хөснуллин KazanForum 2025 ачылышында һәм Russia Halal Expo күргәзмәсендә катнаштылар

Бүген «Казан Экспо» мәйданчыгында «Россия – Ислам дөньясы: KazanForum» XVI халыкара икътисадый форумын һәм «Russia Halal Expo 2025» күргәзмәсен ачу тантанасы узды. Ачылу тантанасында Россия Федерациясе Хөкүмәте Рәисе урынбасары Марат Хөснуллин, Татарстан Рәисе Рөстәм Миңнеханов, ИХО Генераль секретаре урынбасары Әхмәд Кавеса Сенгендо катнашты. Чара башланганда ТР Мөселманнары диния нәзарәте рәисе, мөфти Камил Сәмигуллин Коръән сүрәләрен укыды.

Марат Хөснуллин форумда катнашучыларны РФ Хөкүмәте исеменнән сәламләде һәм KazanForum ның төп шигаре «Ышаныч һәм хезмәттәшлек» булуын билгеләп үтте. "Нәкъ менә үзара ышанычны ныгыту бүген Россия һәм мөселман илләре арасында мөнәсәбәтләр төзелүче нигез булды. Ышаныч безнең партнерлык үсешенең төп факторы булып тора, ул күпкырлы хезмәттәшлекнең барлык аспектларын колачлый һәм ныклы стратегик партнерлыкка әверелә», - диде вице-премьер.

Ул Россия һәм Ислам хезмәттәшлеге оешмасы дәүләтләре арасында товар әйләнешенең динамик үсешен билгеләп үтте. Соңгы 4 елда ул 44%ка үскән. Шулай ук икътисадый үсешне стимуллаштыра һәм партнерлык өчен яңа перспективалар тудыра туризм өлкәсе. Соңгы 5 елда Россия һәм Ислам хезмәттәшлеге оешмасы дәүләтләре арасында туриүм сәфәрләре саны 26%ка арткан, шул ук вакытта туристлар саны 2,5 тапкырга арткан. «Ышанам ки, уртак тырышлык белән киләчәктә дә хезмәттәшлек үсешенең югары темпларын саклап кала алачакбыз», - дип белдерде Марат Хөснуллин.

Ул Рөстәм Миңнехановка һәм Казан форумын оештыручыларга рәхмәт белдерде. "KazanForum ел саен үзенең югары нәтиҗәлелеген күрсәтә, дуслыкны ныгытуга һәм хезмәттәшлекне үстерүгә ярдәм итә. Чараларның колачы, катнашучыларның саны һәм вәкиллеге, илләрнең киң географиясе - бу Россияне һәм ислам дәүләтләрен уртак мәнфәгатьләр генә түгел, ә бер-берсенә тирән хөрмәт берләштерүе турында сөйли», - дип өстәде РФ Хөкүмәте Рәисе урынбасары.

Рөстәм Миңнеханов билгеләп үткәнчә, KazanForum инде өченче ел федераль форматта уза. Ул Россия Президентына, форумның оештыру комитеты рәисе Марат Хөснуллинга, барлык федераль хакимият органнарына, Ислам хезмәттәшлеге оешмасына һәм форумның күп санлы делегатларына зур ярдәмнәре өчен рәхмәт белдерде.

"KazanForum үз эшчәнлеге елларында халыкара оешмалар, дәүләт хакимияте органнары, финанс институтлары, дипломатик миссияләр вәкилләрен, әйдәп баручы инвесторларны һәм бизнесменнарны, шулай ук Россия һәм чит ил компанияләре топ-менеджерларын берләштерү өчен уникаль мәйданчыкка әверелде», - диде республика Рәисе.

Гадәттәгечә KazanForum кысаларында ел саен хәләл индустрия Russia Halal Expo халыкара күргәзмәсе уза. Ул икътисадның барлык өлкәләрен диярлек колачлый, азык-төлек һәм туклану, медицина һәм сәламәтлек саклау, косметика һәм химия сәнәгате, мода һәм гүзәллек, туризм һәм кунакчыллык, күпләп һәм ваклап сату, мәгълүмат технологияләре, финанс һәм инвестицияләр, шулай ук халык куллану товарлары кебек секторлардан компанияләрне берләштерә.

"Форум һәм күргәзмә хәләл индустриядә тәҗрибә һәм иң яхшы практикалар алмашуга, мәдәни алмашуны үстерүгә, яңа технологияләр һәм тотрыклы үсеш турында фикер алышу өчен мөмкинлекләр тудыруга, халыклар арасында үзара аңлашуны, дәүләтләр арасында сәяси элемтәләрне ныгытуга ярдәм итә», - дип ассызыклады Рөстәм Миңнеханов.

Ул форумның эшлекле программасының төп темалары арасында ислам финанслары, медицина, спорт, креатив индустрияләр, экспортны үстерү һ.б. булуын билгеләп үтте.

Мәйданчыкта гадәттәгечә һәм яңа панель дискуссияләр, «Россия - Ислам дөньясы» стратегик караш төркеме утырышы узачак. Форум кырларында шулай ук «Kazan Halal Market» халыкара сәүдә ярминкәсе, «Modest Fashion Day» әдәпле мода фестивале, AAOIFI конференциясе, Ислам хезмәттәшлеге оешмасы илләренең мәдәният министрлары съезды, «Көнчыгыш кубогы» халыкара балалар турниры, Ислам хезмәттәшлеге оешмасы илләренең яшь дипломатлары һәм «Рубин» футбол клубы йолдызлары катнашында футбол гала-матчы, Көнчыгыш мәдәнияте фестивале, Дин әһелләренең бөтенроссия форумы, «Halal business woman» һәм «HALAL Charity woman» премияләренә йомгак ясау, «international Property Market» күчемсез милек буенча халыкара күргәзмә һәм конференция һәм башкалар оештырылган.

"Барыгызны да KazanForum һәм Russia Halal Expo күргәзмәсендә актив катнашырга чакырам. Барлык катнашучыларга да бай һәм уңышлы эшләр телим", - дип ассызыклады Татарстан Рәисе.

Әхмәд Кавеса Сенгендо билгеләп үткәнчә, глобаль хәхәл индустрия соңгы ун елда динамик рәвештә үсә. Әгәр 2021 елда хәләл продукция базары күләме 5,7 трлн доллар тәшкил иткән булса, быел ул 7,7 трлн долларга җитәчәк, ә 2034 елга хәләл дөнья базары 9,4 трлн долларга кадәр үсәчәк.

Россиядә хәләл индустрия шулай ук актив үсә. Булган мәгълүматларга караганда, хәләл продукция Россия азык-төлек базарының 10%ын алып тора. Ислам хезмәттәшлеге оешмасы әгъзалары Россия хәләл экспорты өчен төп базар булып кала, дип ассызыклады доктор Сенгендо.

"Мин Казанда оештырылган KazanForum һәм Russia Halal Expo күргәзмәсендә катнашуыма бик шатмын. Мин әлеге чараларны югары дәрәҗәдә әзерләгәннәре өчен оештыручыларга чын күңелдән рәхмәтлемен», - дип өстәде ИХО Генераль секретаре урынбасары.

Аннары кунаклар Russia Halal Expo 2025 күргәзмә экспозициясе белән таныштылар. Бу Россиядә инвестиция һәм инфраструктура проектларының иң эре халыкара күргәзмәсе. Катнашучылар, үз продукцияләрен һәм технологияләрен тәкъдим итеп кенә калмыйча, бизнесменнар, инвесторлар һәм төрле илләр вәкилләре белән эшлекле багланышлар урнаштыра алалар. Экспозициядә төп юнәлешләр: инвестиция һәм инфраструктура проектлары, ислам икътисады өлкәсендә үзара файдалы проектлар, эре бизнес һәм КУЭ продуктларын тәкъдир итү, халыкара стендлар, төбәк җитештерүчеләренең потенциалын күрсәтү, хәләл индустрия, ислам финанслары, машина төзелеше.

Күргәзмәдә Үзбәкстан, Төрекмәнстан, Төркия, Берләшкән Гарәп Әмирлекләре, Әзәрбәйҗан, Иран, Кыргызстан, Казахстан, Сенегал, Бәхрәйн, Марокко һәм башка илләр катнаша. Шулай ук Россиянең төрле төбәкләре, эре компанияләр һәм федераль министрлыклар үз стендларын тәкъдим иттеләр.

"Россия – Ислам дөньясы: KazanForum" халыкара икътисадый форумы - Россия Федерациясе һәм Ислам дөньясы илләренең икътисадый хезмәттәшлегенең төп федераль мәйданчыгы. Төп максат - Россия төбәкләренең һәм Ислам хезмәттәшлеге оешмасы илләренең сәүдә-икътисадый, фәнни-техник, социаль һәм мәдәни элемтәләрен ныгыту, шулай ук ислам финанс системасы институтларын үстерүгә ярдәм итү. Быел форум эшендә Россиянең 103 иленнән һәм 82 төбәгеннән делегатлар катнаша. Эшлекле программа 200гә якын чараны үз эченә ала.