Рөстәм Миңнеханов Таҗикстан Президенты Эмомали Рахмон белән очрашты

Бүген Дүшәнбедә Татарстан Республикасы Рәисе Рөстәм Миңнеханов Таҗикстан Республикасы Президенты Эмомали Рахмон һәм Таҗикстан Республикасы Премьер-министры Кохир Рәсүлзодә белән очрашты.

Татарстан Республикасының гадәттәгечә дустанә Россия-Таҗикстан мөнәсәбәтләре кысаларында Таҗикстан Республикасы белән хезмәттәшлекне үстерүгә зур әһәмият бирүе билгеләп үтелде. Татарстан Рәисе Таҗикстан Президентына Казандагы БРИКС саммиты кырларында узган очрашу өчен рәхмәт белдерде. 2024 ел нәтиҗәләре буенча Татарстан-Таҗикстан товар әйләнеше 77,3 млн. АКШ доллары тәшкил итә, үсеш 2 тапкырдан артык. Әмма яклар бу күләмнәрнең үзара хезмәттәшлек потенциалына туры килмәве белән килешә.

Рөстәм Миңнехановның Татарстан эшлекле даирәләре белән бергә бу эш визиты товар әйләнешен үстерүгә чираттагы этәргеч булырга тиеш. Бүгенге көндә Татарстанның кайбер предприятиеләре Таҗикстанга үз продукциясен җибәрә, бу, беренче чиратта, йөк автомобильләре, автомобиль ягулыгы, шулай ук нефть һәм нефть химиясе продукциясе.

"Без сезнең ил базарында Татарстанның әйдәп баручы компанияләрен киңәйтү белән кызыксынабыз. Сүз вертолетлар, нефть-газ, компрессорлар һәм суыткыч җайланмалары, авыл хуҗалыгы техникасы һәм автомобиль шиннары, көнкүреш химиясе товарларының киң ассортименты, медицина товарлары һәм фармпродукция китерү турында барырга мөмкин. Үз чиратында, Таҗикстан компанияләре Татарстанга җиңел сәнәгать һәм авыл хуҗалыгы продукциясен китерүне арттыра алыр иде", - дип билгеләп үтте Татарстан Рәисе очрашу барышында.

Моннан тыш, Татарстан дәүләт хезмәтләрен цифрлаштыру, махсус икътисадый зоналар һәм сәнәгать технопарклары булдыру өлкәсендәге эшләнмәләре һәм тәҗрибәсе белән уртаклашырга әзер. Татарстан шулай ук мәдәният, мәгариф, спорт өлкәләрендәге хезмәттәшлеккә зур әһәмият бирә. Бүген республика югары уку йортларында Таҗикстаннан 900дән артык студент белем ала. Гадәттәгечә, таҗик фильмнары Казан халыкара «Алтын мөнбәр» кинофестивалендә күрсәтелә, Дүшәнбедә ел саен татар бәйрәме Сабантуй уздырыла, ә Татарстан таҗикларының «Сомониён» милли-мәдәни автономиясе республиканың иҗтимагый тормышында актив катнаша.

Таҗикстан Президенты Эмомали Рахмон, Таҗикстан һәм Россия төбәкләре дәрәҗәсендә хезмәттәшлек өстенлекләрен билгеләп, Татарстан Республикасы белән мөнәсәбәтләрнең актив фазага керүен канәгатьлек белән ассызыклады. Сәнәгать, энергетика, машина төзелеше, транспорт, төзелеш һәм авыл хуҗалыгы өлкәләрендә хезмәттәшлек перспективалы дип аталды.

Чималны әзер продукциягә эшкәртү буенча уртак предприятиеләр булдыру мөмкинлеге турында фикер алышынды. Моңа бәйле рәвештә текстиль предприятиеләре төзү буенча хезмәттәшлекне ныгытуда, фармацевтика секторында перспективалар һәм медицина продукциясен бергәләп җитештерүне җайга салуда үзара кызыксыну бар. Таҗикстан гражданнарын укытуга квоталар санын арттыру кирәк дип табылды. Шулай ук ике якны да кызыксындырган башка мәсьәләләр буенча да фикер алыштылар.