Татарстан Республикасы Авыл хуҗалыгы һәм азык-төлек министрлыгы башлыгы язгы кыр эшләренә әзерлек турында сөйләде

Татарстан Республикасы Хөкүмәте Йортында узган киңәшмәдә Татарстан Республикасы Премьер-министры урынбасары-Татарстан Республикасы авыл хуҗалыгы һәм азык - төлек министры Марат Җәббаров көзге культураларның торышы һәм язгы кыр эшләренә әзерлек турында сөйләде. Киңәшмәне Татарстан рәисе Рөстәм Миңнеханов үткәрде.

Бүгенге көндә уҗымнарның торышы яхшы һәм канәгатьләнерлек дип бәяләнә, шыттыру өчен сайлап алынган үсентеләрнең 1%тан 4%ка кадәре чыкмый. Бөртекле культуралар орлыклары белән тәэмин ителеш 123% тәшкил итә: 283 мең тонна кирәк булганда 348 мең тонна орлык бар.

Быелгы уңыш өчен минераль ашламалар туплау буенча 367 мең тонна сатып алынган, бу гектарга уртача 61 кг тәэсир итүче матдә. Бу күләмнән ашламаларның сыек формалары 6,8% яки 25 мең тонна тәшкил итә.

Тиздән кырлар кар капламыннан ачыла башлаячак һәм бу техника белән эшне башларга мөмкинлек бирәчәк. Хуҗалыкларда түбән басымлы шиналарда 237 үзйөрешле сиптергеч, шулай ук 678 тагылма һәм асылмалы минераль ашламалар сиптергеч бар. 1 мартка тракторларның - 93%ы, чәчкечләрнең - 97%ы, чәчү комплексларының - 90%ы һәм туфрак эшкәртү агрегатларының 96%ы ремонтланган. Соңгы ункөнлектә динамика тракторлар буенча - 5%, авыл хуҗалыгы машиналары буенча - 4%.

Техниканы ремонтлау өчен язгы кыр эшләренә 2 млрд 591 млн сумлык запас частьләр сатып алынган, бу тиешле күләмнең 81%ын тәшкил итә.

17 марттан 21 мартка кадәр техниканың язгы кыр эшләренә әзерлеген кабул итү комиссиясе планлаштырылган. Агымдагы ремонт сезонында техниканы торгызуга ихтыяҗ 6 млрд сум тәшкил итә. Чыгымнар 400 млн сумга арткан. Чыгымнарны арттыруына паркның тузуы һәм запас частьләр өчен бәяләрнең артуы китерә.

Министр билгеләп үткәнчә, 15 марттан башлап ел саен язгы авыл хуҗалыгы ярминкәләре яңартыла, алар 27 апрельгә кадәр дәвам итәчәк.