Рөстәм Миңнеханов Россия гадәттән тыш хәлләр министрлыгының ТР буенча Баш идарәсе һәм Татарстан Гадәттән тыш хәлләр министрлыгы тулы вәкиллекле уртак утырышында катнашты

Татарстан Рәисе Рөстәм Миңнеханов Россия гадәттән тыш хәлләр министрлыгының ТР буенча Баш идарәсе һәм Татарстан Гадәттән тыш хәлләр министрлыгының тулы вәкиллекле уртак утырышында катнашты. Чарада шулай ук Татарстан Республикасы Премьер-министрының беренче урынбасары - Татарстан Республикасы КЧСПБ рәисе урынбасары Рөстәм Нигъмәтуллин, Татарстан Республикасы буенча Баш федераль инспектор Виктор Демидов һәм башкалар катнашты.

Утырыш башланыр алдыннан Татарстан Рәисе Россия гадәттән тыш хәлләр министрлыгының Татарстан Республикасы буенча Баш идарәсе бүлекчәләренә яңа хезмәт техникасы ачкычларын тапшырды. Татарстан янгын сүндерүчеләре һәм коткаручылары федераль һәм республика бюджетлары хисабына сатып алынган 20 яңа техника алдылар. Хезмәткә янгын сүндерү автоцистерналары, авария-коткару автомобильләре, югары йөрешле җиңел автомобильләр, кар машиналары һәм кече судно кереште.

Шулай ук Рөстәм Миңнеханов Татарстан Республикасы җитештерүчеләреннән һәм тәэмин итүчеләреннән халыкка хәбәр итү чараларының перспектив үрнәкләре күргәзмәсен карады.

Узган елның төп нәтиҗәләре турында Россия Гадәттән тыш хәлләр министрлыгының ТР буенча Баш идарәсе башлыгы Ирек Кадамов сөйләде. Ул билгеләп үткәнчә, 2024 елда республика территориясендә 4217 янгын теркәлгән, аларда 115 кеше һәлак булган, 202 кеше төрле дәрәҗәдәге тән җәрәхәтләре алган. Узган ел белән чагыштырганда янгыннар саны 15%ка кимегән, һәлак булучылар саны - 19% ка, җәрәхәтләнүчеләр саны 1,5%ка кимегән. Янгыннарның төп сәбәпләре элеккечә: ут белән саксыз эш итү (48%), шулай ук электр җайланмаларын (30%) һәм мичләрне (14%) урнаштыру һәм эксплуатацияләү кагыйдәләрен бозу.

Федераль янгынга каршы хезмәтнең күзәтчелек эшчәнлеге органнары республика объектларында янгын куркынычсызлыгы таләпләренең үтәлешен күзәтү буенча 1009 чара, шулай ук 8818 профилактик визит үткәргән. Үткәрелгән тикшерүләр нәтиҗәләре буенча күрсәтмәләр белән 4662 чара үтәлергә тәкъдим ителгән, шуларның 2563е үтәлгән, бу 55% тәшкил итә.

Янгыннарда кешеләрнең һәлак булуын кисәтүдә күп балалы гаиләләрнең, кыен тормыш хәлендә һәм социаль куркыныч хәлдә булган кешеләрнең яшәү урыннарын автоном төтенле янгын хәбәрчеләре белән җиһазлау эше аеруча зур роль уйный. 2016 елдан башлап күрсәтелгән категория затларга 93 мең (93298) йорт биләмәсендә 262 мең (262819) хәбәрче куелган, бу 298 кешенең, шул исәптән 91 баланың гомерен саклап калырга, шулай ук янгыннардан зыянны киметергә мөмкинлек биргән.

Татарстан Республикасының су объектларында 2024 елда 100 (АППГ - 106) вакыйга булган, нәтиҗәдә 82 (АППГ - 82) кеше һәлак булган, 37 (АППГ - 68) кеше коткарылган.

2024 елда кече суднолар катнашында 10 авария (АППГ - 9) теркәлгән. Нәтиҗәдә 5 кеше (АППГ - 8) һәлак булган. Кече үлчәмле судноларга дәүләт күзәтчелеген гамәлгә ашыру кысаларында 1000нән артык (1047) кече үлчәмле судно хуҗасы административ җаваплылыкка тартылган. Махсуслаштырылган стоянкаларга 58 кече судно урнаштырылган.

2024 елның 6 марты һәм 2 октябре көннәрендә халыкка хәбәр итү системаларының әзерлеген тикшергәннәр, соңгы хәбәр итү чараларын эшләтеп җибәргәннәр һәм Гомумроссия мәҗбүри телерадиоканаллар эфирын алыштырганнар. Республика Рәисе кушуы буенча Татарстан халкына хәбәр итүнең төбәк системасын булдыру буенча чаралар планы эшләнгән һәм расланган, проект-смета документациясенә төзәтмәләр кертү өчен техник таләпләр расланган. Татарстан Республикасы халкына хәбәр итүнең яңа төбәк системасын төзүгә проект документациясен эшләү төгәлләнеп килә.

Ирек Кадамов нотыгы тексты белән җентекләбрәк Россия гадәттән тыш хәлләр министрлыгының ТР буенча Баш Идарәсенең рәсми сайтында танышырга мөмкин.

Рөстәм Миңнеханов ассызыклаганча, 2024 ел Татарстанда колачлы халыкара сәяси вакыйгаларга бай булды. Аларның кульминациясе XVI БРИКС саммиты булды. Барлык чараларны үткәрү чорында Гадәттән тыш хәлләр министрлыгы хезмәткәрләре тарафыннан даими нигездә файдаланылган объектларда янгын куркынычсызлыгын тәэмин итү буенча оештыру һәм гамәли чаралар комплексы башкарылды. Идарә органнары һәм көчләр мөмкин булган хәлләргә җавап бирергә даими әзер иде. «Башкарган сыйфатлы эшләре, тырышлыклары һәм югары профессионализмнары өчен Гадәттән тыш хәлләр министрлыгының шәхси составына рәхмәт белдерәм», - дип мөрәҗәгать итте республика Рәисе утырышта катнашучыларга.

Ул ассызыклаганча, бүгенге көнгә төп чакыру - махсус хәрби операцияне уңышлы тәмамлау. Татарстан дәүләтнең оборона сәләтен һәм иминлеген тәэмин итүгә җитди өлеш кертә. "Киев режимы тарафыннан сугыш алып баруның террорчылык алымнары кулланыла, гражданлык объектларына һөҗүм ясала, тыныч халыкка куркыныч яный. Безне куркытырга һәм эчтән хәлсезләндерергә тырышуларга без җәмгыятьнең бердәмлеге белән җавап бирәбез. БПЛА һөҗүмнәре нәтиҗәләрен бетергәндә күрсәткән батырлыклары өчен Гадәттән тыш хәлләр министрлыгы хезмәткәрләренә рәхмәт белдерәсем килә», - диде Рөстәм Миңнеханов.

Ул республикага пилотсыз очкычлар һөҗүме гражданнарның иминлеген тәэмин итү өлкәсендә әле күп эшләр башкарасы барлыгын күрсәтте, дип билгеләп үтте. Әлеге мәсьәләләрнең мөһимлегенә бәйле рәвештә, быелның 25 февраленә «Татарстан Республикасында гражданнар оборонасының әзерлеге торышы һәм аны камилләштерү чаралары турында» республика Иминлек советы утырышын үткәрү планлаштырыла.

"Узган ел янгыннар саны һәм аларда кешеләрнең үлеме кимеде. Күзәтчелек-профилактика чаралары комплексы, шулай ук янгын сүндерү хезмәте бүлекчәләренең оператив эш күрсәткечләрен яхшырту вәзгыятьне сизелерлек яхшыртырга мөмкинлек бирде. Бу - гражданнарыбызның коткарылган гомерләре һәм сакланган мөлкәте!" - дип билгеләп үтте Рөстәм Миңнеханов.

Татарстан Рәисе «хәбәрче куйдыр - якыннарыңны якла!" акциясен гамәлгә ашыру темпларын уңай бәяләде. Урнаштырылган автоном янгын хәбәрчеләре үзләренең нәтиҗәлелеген күрсәтте инде. Узган ел гына да янгын чыгу турында вакытында хәбәр ителгән 10 очрак теркәлгән, бу 21 кешенең, шул исәптән 6 баланың гомерен саклап калынган. Рөстәм Миңнеханов бу мөһим эшне дәвам итәргә өндәде.

Судагы бәхетсезлек очракларына килгәндә, аларның саны артмаса да, халык белән профилактик эшне көчәйтергә кирәк. Республика Рәисе ассызыклаганча, су объектларында кешеләрнең иминлеген тәэмин итү өчен яңа пляжлар булдыру буенча эшне дәвам итәргә кирәк.

"Шулай ук кече суднолар белән вәзгыятьне игътибардан ычкындырырга ярамый. Йөзү чаралары саны даими үсә, ә аларның хуҗаларының үз-үзләрен тоту культурасы кими - суда массакүләм ял итү урыннарында халык өчен куркыныч тудырыла. Кече суднолар буенча дәүләт инспекциясенә мондый очракларны ачыклау һәм хокук бозучыларны җаваплылыкка тарту өчен даими рәвештә рейдлар оештырырга кирәк", - диде Рөстәм Миңнеханов.

Кадрлар белән тәэмин ителешкә бәйле катлаулы вәзгыять шартларында Татарстан Рәисе Гадәттән тыш хәлләр министрлыгы коллективының һәм аның ведомство буйсынуындагы оешмаларның эшчәнлеген саклап калуга аерым игътибар бирергә чакырды: «Башкарма хакимият һәм җирле үзидарә органнары белән берлектә янгыннарны сүндерүдә турыдан-туры катнашучы бүлекчәләрнең шәхси составын матди кызыксындыру өчен заманча алымнар эшләргә кирәк».

Татарстанда бүлекчәләрне янгын сүндерү һәм авария-коткару техникасы белән тәэмин итү мәсьәләләренә аерым игътибар бирелә. Узган ел дәвамында республика акчалары хисабына 17 берәмлек техника, шул исәптән 5 йөзү чарасы сатып алынган. Шулай ук янгыннан саклауның яңа биналарын төзү һәм янгын деполарын һәм гражданнар оборонасы складларын капиталь ремонтлау буенча да эш алып барыла. Соңгы 3 елда янгын депосының 4 бинасы капиталь ремонтланган, быел Актанышта һәм Биектауда ике яңа бина төзү каралган.

2025 ел - берьюлы берничә әһәмиятле юбилей датасы елы. Алда торган төп бәйрәм - совет халкының Бөек Ватан сугышында Җиңүенең 80 еллыгы. Агымдагы ел шулай ук илдә һәм республикада Ватанны саклаучылар елы дип игълан ителде. «Без юбилей даталары һәм сезнең структура турында хәтерлибез - бу Россия Гадәттән тыш хәлләр министрлыгының 35 еллыгы һәм Татарстан Республикасы Гадәттән тыш хәлләр министрлыгының 30 еллыгы. Бу мөһим вакыйгаларны, хөрмәтле ветераннарыбыз турында онытмыйча, яңа уңышлар белән лаеклы билгеләп үтү мөһим", - дип өстәде Рөстәм Миңнеханов.

Аннары республика Рәисе ведомствоның аеруча зур уңышларга ирешкән хезмәткәрләренә Татарстанның дәүләт бүләкләрен тапшырды.