Рөстәм Миңнеханов Татарстан Республикасы Сәламәтлек саклау министрлыгының вәкиллекле йомгаклау утырышында катнаша

Бүген Татарстан Республикасы Рәисе Рөстәм Миңнеханов Татарстан Республикасы Сәламәтлек саклау министрлыгының вәкиллекле йомгаклау утырышында катнашты.

Чара Идел буе дәүләт физкультура, спорт һәм туризм университеты базасында (Казан) уза.

Йомгаклау утырышында шулай ук РФ Дәүләт Думасы депутаты Айрат Фәррахов, ТР Премьер-министры урынбасары Ләйлә Фазлыева һәм башкалар катнашты.

Коллегия башланганчы Рөстәм Миңнеханов һәм мәртәбәле кунаклар төбәкнең медицина учреждениеләренә яңа ашыгыч медицина ярдәме автомобильләре (Sollers Atlant маркалы машиналар базасында) тапшырдылар.

Идел буе физкультура университеты холлында Татарстанның сәламәтлек саклау учреждениеләре һәм оешмаларының махсуслаштырылган күргәзмәсе оештырылган иде. Биредә Рөстәм Миңнехановка медицинадагы кайбер инновацион проектларны тәкъдир иттеләр, Казанның 7 нче шәһәр хастаханәсе, башка медицина учреждениеләре базасында күрсәтелә торган медицина ярдәме күләмнәре турында сөйләделәр. Шулай итеп, «ДМЗ24/7» акыллы кардио-сәгатьләр» программа тәэминаты тәкъдир ителде. Шулай ук 2025 елның «Тернәкләндерү мобиль комплексы» сынау проекты тәкъдир ителде.

Татарстан Рәисенә шулай ук бер ел элек, 2024 елның февралендә, Татарстанда беренче тапкыр йөрәк күчереп утырту буенча операция үткәрелүен искә төшерделәр. Операция Чаллыдагы ашыгыч медицина ярдәме хастаханәсе базасында башкарылган. Чаллының ашыгыч медицина ярдәме хастаханәсе шәһәрнең 6 районын һәм 8 поликлиникасын үз эченә ала. Йомгаклау коллегиясендә төп нотык белән Татарстан Республикасы сәламәтлек саклау министры Марсель Миңнуллин чыгыш ясады.

Аерым алганда, 2019 елдан 2024 елга кадәр дәвам иткән «Сәламәтлек саклау» һәм «Демография» илкүләм проектларын гамәлгә ашыруга йомгак ясалды.

Татарстан Республикасы Сәламәтлек саклау министрлыгы башлыгы хәбәр иткәнчә, бүген республикада яшәүче һәр өченче кеше теге яки бу сәбәпләр буенча диспансер исәбендә тора.

Ул шулай ук республикада 4 трансплантация үзәге эшләвен искәртте - бу Республика клиник хастаханәсе, Төбәкара клиник-диагностика үзәге, Ашыгыч медицина ярдәме хастаханәсе, Республика балалар клиник хастаханәсе. 2025 елга планнарда - Казанның 7 нче шәһәр клиник хастаханәсе базасында тагын бер үзәк булдыру.

2025 елга төп бурычлар арасында министр «Озак һәм актив тормыш», «Гаилә» илкүләм проектларын гамәлгә ашыруны, бала табуга һәм балачакка ярдәм итү хезмәтен камилләштерүне, МХОдә катнашучыларга һәм аларның гаиләләренә медицина ярдәме күрсәтүне тәэмин итүне, һөнәри чаралар буенча план күрсәткечләрен үтәүне һ. б. атады.