Рөстәм Миңнеханов һәм Ирек Фәйзуллин Казан дәүләт архитектура-төзелеш университетында булдылар

Бүген Татарстан Рәисе Рөстәм Миңнеханов һәм Россия Төзелеш һәм ТКХ министры Ирек Фәйзуллин Казан дәүләт архитектура-төзелеш университетында булдылар. Алар монда Татарстан Республикасы төзелеш, архитектура һәм ТКХ министрлыгының йомгаклау коллегиясе алдыннан килделәр.

Рөстәм Миңнеханов һәм Ирек Фәйзуллин «Геодезия», «Цифрлы юллар», «Юллар» һәм «Ныклык» фәнни-мәгариф үзәкләре эшчәнлеге белән таныштылар. Алар барысы да ремонтланган биналарда урнаштырылган.

«Геодезия» фәнни-мәгариф үзәгендә төрле этапларда төзелеш процессларын геодезия белән тәэмин итү буенча курс студентларының һәм тыңлаучыларының компетенцияләре формалаштырыла. Кунакларга геодезия үлчәмнәрен эшкәртү, мәгълүматларны камераль эшкәртү, топографик материаллар һәм урын модельләрен булдыру мөмкинлеге бирә торган махсус программа продуктлары белән җиһазландырылган уку сыйныфын күрсәттеләр.

Шулай ук «Геодезия» үзәгендә студентлар эш күнекмәләрен үзләштерә алсын өчен заманча геодезия приборлары бар. Бинада идән шәһәр планы рәвешендә бирелгән, аны уку материалы сыйфатында кулланырга мөмкин. Өйрәтү макеты геодезия үлчәүләре ярдәмендә топографик карталар һәм планнар кору һәм төзү принципларын өйрәнергә мөмкинлек бирә.

«Юллар» үзәгенең төп бурычлары - юл-транспорт тармагы өчен югары квалификацияле кадрлар әзерләү һәм яңадан әзерләү, модификацияләнгән юл-төзелеш материалларын эшләү һәм аларның сыйфатын һәм хезмәт итү вакытын күтәрү. Үзәк берничә эш мәйданчыгыннан тора - "Юл материалларын өйрәнү», "Диагностика һәм фаразлау", күпер корылмаларын сынау лабораториясе.

"Цифрлы юллар" яңа фәнни-белем бирү үзәге юл һәм транспорт тармагында цифрлы хәл ителешләрен үстерү өчен пространстводан гыйбарәт. Махсуслаштырылган лабораторияләрдә интеллектуаль транспорт системалары, юл төзелешендә ясалма интеллект куллану, пилотсыз транспортны үстерү һ. б. буенча эшләр алып барыла.

«Ныклык» фәнни-белем бирү үзәге университетның уку процессына төзелеш конструкцияләрен проектлауның фәнни-инновацион методларын кертү, төзелеш индустриясе предприятиеләре заказлары буенча эксперименталь-тикшеренү эшләре уздыру һәм уку процессын реаль җитештерүгә интеграцияләү максатында төзелгән. Булган җайланмалар эре габаритлы конструкцияләрнең ныклыгын сынарга, материалларның механик характеристикаларын билгеләргә, шулай ук төрле температураларда сынаулар үткәрергә мөмкинлек бирә.

КДАТУ 1930 елда нигезләнгән. Югары уку йорты архитектура-төзелеш, юл-транспорт тармаклары һәм торак-коммуналь хуҗалыгы өчен югары квалификацияле кадрлар әзерли, шулай ук аларны фәнни яктан тәэмин итә һәм конкурентлыкка сәләтле үстерә. Хәзерге вакытта университетта 5 меңнән артык студент һәм аспирант белем ала.