Рөстәм Миңнеханов Оманда эш сәфәрендә

30.12.2024

Татарстан Рәисе Рөстәм Миңнеханов Оманга эш сәфәре кысаларында Солтан Кабусның Югары мәдәният һәм фән үзәгендә булды һәм аның Рәисе, «Россия-Ислам дөньясы» стратегик караш төркеме әгъзасы Хәбиб Әл Риями белән очрашты.

Республика Рәисе комплекс эше белән танышты. Ул 2012 елда мәдәни, фәнни һәм академик учреждениеләр, шулай ук чит илләрдәге шундый ук махсуслаштырылган үзәкләр белән элемтәләрне һәм хезмәттәшлекне ныгыту өчен оештырылган иде.

Моннан тыш, үзәк Оман мәдәни һәм фәнни мирасын төбәк һәм халыкара дәрәҗәдә алга җибәрү һәм популярлаштыру белән шөгыльләнә.

Рөстәм Миңнеханов Солтан Кабус исемендәге Югары мәдәният һәм фән үзәге Рәисе Хәбиб Әл Риями белән очрашуда аңа «Россия-Ислам дөньясы» стратегик караш төркеме эшендә актив позициясе өчен рәхмәт белдерде.

"Күптән түгел без Малайзиядә төркемнең чираттагы күчмә утырышын уздырдык, анда Сез дә катнаштыгыз. Чара Россиянең һәм Ислам дөньясының глобаль янауларга һәм чакыруларга каршы көрәштә, төбәк конфликтларын җайга салуда, гуманитар проблемаларны хәл итүдә, милләтара һәм конфессияара татулыкка ирешүдә бердәм булуларын раслады», - дип билгеләп үтте Рөстәм Миңнеханов.

Республика Рәисе Хәбиб Әл Риямины Казанга килергә һәм киләсе елның маенда төркемнең чираттагы утырышында катнашырга чакырды. Икътисадый хезмәттәшлеккә килгәндә, узган ел нәтиҗәләре буенча Татарстан һәм Оманның товар әйләнеше 20 млн долларга җиткән, сизелерлек үсеш күрсәтә. Әмма быелгы мәгълүматлар кимүне күрсәтә.

"Безнең хезмәттәшлек өчен мөмкинлекләр, беренче чиратта, икътисадта күп. Энергетика һәм сәнәгать, автомобиль, вертолетлар һәм суднолар төзү, нефть химиясе, газ - мотор ягулыгы, медицина, авыл хуҗалыгы өлкәсендә хезмәттәшлегебезне көчәйтергә кирәк», - дип ассызыклады Рөстәм Миңнеханов.

Хәбиб Әл Риями үз чиратында товарларның күләмен һәм номенклатурасын арттыру инициативасын хуплады.

Шулай ук Рөстәм Миңнеханов музыка һәм мәдәни вакыйгалар уздыру өчен төп мәйданчык - Маскат Әмирлек опера театры эше тәҗрибәсе белән танышты. Объект 1100 кешене сыйдыра. Ул концерт һәм тамаша залларыннан, ландшафт бакчаларыннан, рестораннардан һәм арт-үзәктән тора.


ТР Рәисе Матбугат хезмәте.