Рөстәм Миңнеханов юл хәрәкәте иминлеге буенча Татарстан Республикасы Министрлар Кабинеты утырышында: Иң мөһим мәсьәлә - җәяүлеләр иминлеге

Татарстанда юл-транспорт һәлакәтләрен системалы якын килү киметергә мөмкинлек бирде. Бу хакта Татарстан Республикасы Рәисе Рөстәм Миңнеханов бүген «Татарстан Республикасында юл хәрәкәте иминлеген арттыру, юл-транспорт һәлакәтләрен кыскарту һәм аларның нәтиҗәләрен киметү буенча чараларны гамәлгә ашыру турында»Татарстан Республикасы Министрлар Кабинеты утырышында белдерде.

Утырыш ТР Хөкүмәте Йортында узды, аны Татарстан Премьер-министры Алексей Песошин алып барды.

Рөстәм Миңнеханов ассызыклаганча: юл-транспорт һәлакәтләре саны кимүдә уңай динамика булуга карамастан, быел аларда кешеләр үлемен киметеп булмады. Һәлак булучыларның шактый өлеше кара-каршы бәрелешләргә туры килә. Аның сүзләренчә, бу мәсьәләдә төп рольне профилактика уйный. «Узып китү тыелган урыннарны ДАИ көчләре контрольдә тотачак, шул исәптән квадрокоптердагы яңа комплекс ярдәмендә», - дип сөйләде Рөстәм Миңнеханов. Ул әлеге комплексның Иннополиста эшләнгәнлеген искәртте.

Татарстан Республикасы Финанс министрлыгына һәм Татарстан Республикасы Цифрлы үсеш министрлыгына әлеге системаны гамәлгә кертү мәсьәләләрен тиз арада хәл итәргә кирәк, диде Татарстан Рәисе. Аварияләрне киметүгә килгәндә, Рөстәм Миңнеханов сүзләренчә, монда агымнарны аеру да мөһим, бу каршы як полосага чыгуны тулысынча булдырмаска ярдәм итәчәк. Кайбер урыннарда трос киртәләре кулланырга мөмкин. "Машиналарның бер-берсен узып китү рөхсәт ителгән участокларда күп кеше һәлак булды, - диде Рөстәм Миңнеханов. - Транспорт министрлыгына ДАИ белән берлектә һәр участокны өйрәнергә, иң куркыныч урыннарда мәгълүмат щитлары урнаштырырга кирәк». Ул шулай ук ягулык салу станциясендә социаль реклама урнаштыру мәсьәләсен дә карарга кушты.

"Иң мөһим мәсьәлә - җәяүлеләр иминлеге, - диде аннары Татарстан Рәисе. - Торак пунктларда без бәрдерүләр санын киметүгә ирештек. Әмма трассаларда мәсьәлә кискен кала - анда караңгыда җәяүлеләр күренми диярлек». Аның сүзләренә караганда, җәяүлеләр кичүләрен төзекләндерүгә, яктыртуга, тротуарларның торышына, шулай ук ясалма тигезсезлекләр урнаштыруга аерым игътибар бирергә кирәк. Киемдә яктылыкны кире кайтара торган материаллар куллану да хәлне яхшырта ала.

"Җәяүле балаларның һәлак булуы зур борчу тудыра, - дип искәртте Рөстәм Миңнеханов. - Алар катнашында 168 юл-транспорт һәлакәте теркәлгән, аларда 3 бала һәлак булган һәм 177 кеше яраланган". Ул шулай ук питбайк, квадроцикл һәм башка мототехника кебек куркыныч транспорт төрләрен куллануда да тәртип урнаштырырга кирәклеген билгеләп үтте.

«Прокат самокатларын тәртипкә китерергә кирәк, - диде ул. - Бу мәсьәләне җайга салырга кирәк. Әгәр балалар мотоспорт белән кызыксына икән, мотосекцияләр һәм махсус трассалар үсешенә игътибар итәргә кирәк"» Татарстан Рәисе фикеренчә, бүген таксида пассажирлар йөртү игътибарны таләп итә.

«Таксида да тәртип урнаштырырга кирәк, - диде ул. - Кайбер машина йөртүчеләр үзләре йөри алмый, ә алар әле кешеләр дә йөртә. Аларның гомерләрен куркыныч астына куялар. Катгыйрак көйләргә кирәк". Кешеләрнең иминлеге – безнең төп омтылышыбыз, дип белдерде Рөстәм Миңнеханов.

Гомумән алганда, үлемгә китергән юл-транспорт һәлакәтләренең 70%ы тизлек режимын бозган, каршы як полосага чыккан, узып китү кагыйдәләрен бозган машина йөртүчеләр гаебе белән килеп чыга, дип билгеләп үтте Рөстәм Миңнеханов. Ул халыкны юл хәрәкәте иминлеген тәэмин итү мәсьәләләренә активрак җәлеп итәргә тәкъдим итте - мәсәлән, «Халык инспекторы» программасы аша.

Соңыннан юл хәрәкәте иминлеген тәэмин итү буенча иң яхшы муниципаль комиссияләрне бүләкләделәр. 2024 елдагы эш нәтиҗәләре буенча Татарстан Республикасы Хөкүмәт комиссиясе Кукмара һәм Саба муниципаль районнарын иң яхшылар дип таныды.